សារព័ត៌មានបែបថ្មី និងឥទ្ធិពលលើនយោបាយ គឺជាប្រធានបទនៃវេទិកាតុមូល ដែលត្រូវបានក្លឹបអ្នកកាសែតកម្ពុជា លើកយកមកពិភាក្សាក្នុងវេទិកាតុមូល កាលពីថ្ងៃទី៣១ ខែធ្នូ នៅសណ្ឋាគារសាន់វ៉េ (Sunway) ដោយចូលរួមពីក្រុមអ្នកកាសែតមកពីអង្គភាពសារព័ត៌មាននានាក្នុងប្រទេសកម្ពុជា។
សារព័ត៌មានបែបថ្មីសំដៅលើការបង្កើតកាសែតតាមអ៊ិនធឺណិត (Internet) ការបង្កើតវ៉ឹបសាយផ្ទាល់ខ្លួន និងជាពិសេសតាមរយៈហ្វេស ប៊ុក (Face book) ឬក៏មានបណ្ដាញវ៉ឹបសាយជាច្រើនទៀត កំពុងមានប្រជាប្រិយភាពនៅកម្ពុជា។
លោក ប៉ែន សមិទ្ធិ ប្រធានក្លឹបអ្នកកាសែតកម្ពុជា មានប្រសាសន៍ថា គោលបំណងបង្កើតវេទិកាតុមូលនេះឡើង ប្រយោជន៍ផ្តល់ឱកាសដល់អ្នកសារព័ត៌មានទូទៅ ឲ្យយល់ដឹងកាន់តែច្បាស់អំពីសារព័ត៌មានបែបថ្មី និងឥទ្ធិពលលើនយោបាយ ព្រមទាំងផលប៉ះពាល់នៃបច្ចេកវិទ្យាទាំងនេះ។
លោកបន្ថែមថា បច្ចេកវិទ្យាព័ត៌មានបែបថ្មីនៅកម្ពុជា ត្រូវបានអ្នកនយោបាយមួយចំនួននៅកម្ពុជា បានចាប់អារម្មណ៍ច្រើនទៅលើឥទ្ធិពលរបស់វ៉ឹបសាយ ឬកាសែត អនឡាញទាំងនេះ ក្នុងនោះរួមមានលោកនាយករដ្ឋមន្ត្រី ហ៊ុន សែន និងលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ក៏បានចូលរួមប្រើប្រាស់នូវសារព័ត៌មានបែបថ្មីនៅសម័យទំនើបនេះដែរ។
យ៉ាងណាក៏ដោយ លោក ប៉ែន សមិទ្ធិ បានសង្កត់ធ្ងន់ថា ទន្ទឹមនឹងបច្ចេកវិជ្ជាព័ត៌មាននៅកម្ពុជា មានការរីកចម្រើន បច្ចេកវិជ្ជានេះអាចនឹងមានផលវិជ្ជមាន និងអវិជ្ជមានដល់អ្នកប្រើប្រាស់ផងដែរ។
ចំពោះផលអវិជ្ជមាន លោកបានលើកករណីបុគ្គលិកសន្តិសុខអង្គការស្បៀងអាហារពិភពលោក ត្រូវបានតុលាការធ្វើការចោទប្រកាន់ចាប់ដាក់ពន្ធនាគារ ដោយសារថតចម្លងព័ត៌មានដែលផ្សាយតាមគេហទំព័ររិះគន់មេដឹកនាំរដ្ឋាភិបាលកម្ពុជា ប៉ុន្តែក៏មានអ្នកខ្លះទៀតអាចស្វែងរកមិត្តភ័ក្ដិ ឬគូសង្សារ ផ្តើមចេញពីបច្ចេកវិទ្យាសារព័ត៌មានទំនើបនេះដែរ។
លោក កឹម សុខា ប្រធានគណបក្សសិទ្ធិមនុស្ស ដែលជាអ្នកគាំទ្របច្ចេកវិទ្យាទំនើបម្នាក់ដែរ មានប្រសាសន៍ថា នៅកម្ពុជា អ្នកប្រើប្រាស់មានការចាប់អារម្មណ៍នឹងឥទ្ធិពលរបស់វា គឺនៅមានចំនួនតិចតួច មិនដូចនៅក្រៅប្រទេសនោះទេ ប៉ុន្តែលោកបានទទួលស្គាល់ថា ផ្ដើមពីបច្ចេកវិទ្យាបែបថ្មី ពិតជាមានឥទ្ធិពលបានទូលំទូលាយនៅទូទាំងពិភពលោក។
លោក កឹម សុខា បន្តថា ភាពរីកចម្រើននៃបច្ចេកវិទ្យាព័ត៌មាននៅកម្ពុជា សព្វថ្ងៃនេះ រដ្ឋាភិបាលមិនគួរមានគម្រោងបិទវ៉ឹបសាយ ឬតាមរយៈបច្ចេកវិទ្យានេះ រដ្ឋាភិបាលធ្វើការចាប់ចងបំភិតបំភ័យទៅលើអ្នកអាននោះទេ។
លោកបានបញ្ចេញទស្សនៈបន្ថែមដូច្នេះ ៖ «ឥទ្ធិពលវាអាចមានតិចតួច ប៉ុន្តែខ្ញុំជឿថា អនាគតទៅវាអាចមានច្រើន។ អ្វីដែលយើងធ្វើនេះ ភាគច្រើនឥទ្ធិពលនៅក្រៅប្រទេសទេ។ ខ្មែរយើងនៅក្រៅប្រទេស និងអន្តរជាតិខ្លះដែលគេចាប់អារម្មណ៍លើស្រុកខ្មែរ អាហ្នឹងឥទ្ធិពលច្រើន»។
លោក ឆាយ សុផល សមាជិកគណៈកម្មាធិការនាយកក្លឹបអ្នកកាសែតកម្ពុជា នៅក្នុងវេទិកាតុមូល ក៏បានបង្ហាញពីឥទ្ធិពលនៃសារព័ត៌មានបែបថ្មីដល់ក្រុមអ្នកកាសែត ដោយបានលើកយកវ៉ឹបសាយ វីឃីលិគ (Wikileaks) ដែលបានទម្លាយនូវព័ត៌មានសម្ងាត់នៃទំនាក់ទំនងរបស់សហរដ្ឋអាមេរិក ជាមួយបណ្ដាប្រទេសផ្សេងទៀតនៅលើពិភពលោក រួមទាំងប្រទេសកម្ពុជាផង។ លោកថា ទន្ទឹមនឹងភាពរីកចម្រើននៃសារព័ត៌មានបែបថ្មី បច្ចេកវិទ្យានេះក៏អាចនាំឲ្យកើតមានគ្រោះថ្នាក់ទៅដល់វិជ្ជាជីវៈសារព័ត៌មានអាជីពផងដែរ។
លោក ប៉ែន បូណា អ្នកឆ្លើយឆ្លងព័ត៌មានវិទ្យុបារាំងអន្តរជាតិ ជាភាសាខ្មែរ បានថ្លែងក្នុងវេទិកាតុមូលថា ការរីកចម្រើននៃបច្ចេកវិទ្យាព័ត៌មានទំនើបបែបថ្មី គឺបានផ្ដល់ភាពងាយស្រួលដល់សាធារណជនទូទៅ ជាពិសេសសម្រាប់អ្នកប្រកបវិជ្ជាជីវៈសារព័ត៌មាន។
លោកថា សម្រាប់អ្នកកាសែតផ្នែកកាសែតបោះពុម្ព វិទ្យុ និងទូរទស្សន៍ ដែលប្រកាន់យកអាជីពជាអ្នកសារព័ត៌មាន ត្រូវបង្កើនការយកចិត្តទុកដាក់ និងពង្រឹងសមត្ថភាពបន្ថែមទៀត ក្នុងពេលដែលសារព័ត៌មានបែបថ្មីតាមអ៊ិនធឺណិត កំពុងរីកដុះដាលនាពេលនេះ។
លោក ប៉ែន សមិទ្ធិ ប្រធានក្លឹបអ្នកកាសែតកម្ពុជា បានលើកឡើងពីស្ថិតិស្រាវជ្រាវរបស់ផ្នែកប្រព័ន្ធផ្សព្វផ្សាយកម្ពុជា ហៅកាត់ជាភាសាអង់គ្លេស DMC បានបង្ហាញថា នៅកម្ពុជា គិតត្រឹមខែមិថុនា ឆ្នាំ២០១០ អ្នកប្រើប្រាស់អ៊ិនធឺណិត មានចំនួនជាង ១១ម៉ឺននាក់ និងមានវ៉ឹបសាយដែលទាក់ទងនឹងកម្ពុជា មានចំនួនជាង ២ពាន់វ៉ឹបសាយ ហើយក្នុងនោះ ក៏មានវ៉ឹបសាយ ដែលមានកន្ទុយ kh (www.ken.com.kh) មានចំនួនជាង ១ពាន់វ៉ឹបសាយ។ រីឯកាហ្វេអ៊ិនធឺណិត (អ៊ិនធឺណិតជួលតាមផ្ទះ) នៅទូទាំងប្រទេស គិតត្រឹមឆ្នាំ២០១០ មានចំនួនជាង ៣២០ នៅភ្នំពេញ មានហាងកាហ្វេ អ៊ិនធឺណិត មានចំនួន ១២០ កំពុងធ្វើសកម្មភាពនៅកម្ពុជា។
ទាក់ទងផ្នែកនយោបាយវិញ បច្ចេកវិជ្ជាព័ត៌មានទំនើបអាចបញ្ជូនព័ត៌មានសេរីផ្សព្វផ្សាយទៅក្នុងប្រទេសកុម្មុយនីស្ត ឬប្រទេសកាន់អំណាចផ្ដាច់ការ គាបសង្កត់សិទ្ធិសេរីភាពសារព័ត៌មាន សិទ្ធិបញ្ចេញមតិ ការរំលោភសិទ្ធិមនុស្សនៅក្នុងប្រទេសទាំងនោះបានក្នុងពេលដែលរដ្ឋាភិបាលប្រទេសទាំងនោះមិនអនុញ្ញាតឲ្យបង្កើតសារព័ត៌មានសេរី ហើយតាមរយៈបច្ចេកវិជ្ជាព័ត៌មានទំនើបគេក៏អាចរិះគន់មេដឹកនាំនានាបានដោយអនាមិកផងដែរ៕