សាលាឧទ្ធរណ៍ផ្ដន្ទាទោសលោក មឿង សុន ពីបទញុះញង់ដោយចេតនា ឲ្យមានការប្រព្រឹត្តបទឧក្រិដ្ឋ ដោយសារតែលោករិះគន់ថា ក្រុមហ៊ុន ស៊ូជីង ( Sujing ) បានដាក់អំពូលអគ្គិសនី នៅថែវប្រសាទអង្គរវត្ត នៅឆ្នាំ ២០០៩ កន្លងមក បានធ្វើក្ដៅថ្មអង្គរ។
សាលាឧទ្ធរណ៍ បានកែប្រែបទចោទពីផ្សាយព័ត៌មានមិនពិត មកជាបទញុះញង់ ដោយចេតនា និងបានកែប្រែប្រាក់ផាកពិន័យ ពីចំនួន ១៥ លានរៀល មកចំនួន ៤ លានរៀលវិញ។
ចៅក្រមប្រឹក្សា លោកស្រី ចាន់ ម៉ាលីណា បានអានសាលដីកា នៅថ្ងៃទី ២៤ ខែឧសភាថា តាមរយៈភស្តុតាងខ្សែអាត់សំឡេង និង វី. ស៊ី. ឌី (VCD) តុលាការបានរកឃើញថា លោក មឿង សុន ពិតជាមានចេតនាញុះញង់ឲ្យមានការប្រព្រឹត្តបទឧក្រិដ្ឋ ដែលបានចែងក្នុងមាត្រាទី ៤៩៤ និងមាត្រាទី ៤៩៥ នៃក្រមព្រហ្មទណ្ឌថ្មី។
សាលាឧទ្ធរណ៍បើកផ្លូវឲ្យប្ដឹងសាទុក្ខទៅតុលាការកំពូលទៀត ក្នុងរយៈពេល ៣០ ថ្ងៃ ចាប់ថ្ងៃប្រកាស សាលដីកានេះ។ សាលាឧទ្ធរណ៍ដដែល បានបង្គាប់ឲ្យអាជ្ញាធរនគរបាលកម្ពុជា ស្វែងរកចាប់ខ្លួនលោក មឿង សុន ។
ប្រធានអង្គការមូលនិធិទ្រទ្រង់អរិយធម៌ខ្មែរ លោក មឿង សុន មានប្រសាសន៍តាមទូរស័ព្ទ នៅថ្ងៃទី ២៤ ខែឧសភា ពីស្រុកអារ៉ាញ់ ប្រទេសថៃមកថា លោកមិនអាចទទួលយកសាលដីកានេះបានទេ លោកបន្តប្ដឹងសាទុក្ខទៅតុលាការកំពូលទៀត។
លោក មឿង សុន ៖ «ចោទប្រកាន់ខ្ញុំលើកដំបូងថា ខ្ញុំផ្សាយព័ត៌មានមិនពិត ដល់តែមេធាវីរបស់ខ្ញុំរកឃើញគ្រប់ហេតុផលទៅ ឃើញថាខ្ញុំមិនផ្សាយព័ត៌មានមិនពិតទេ ឥឡូវទៅជាកាត់សេចក្ដីខ្ញុំរឿងថ្មីទៅវិញថា ខ្ញុំញុះញង់ទៅវិញ។ អ៊ីចឹងបានន័យថា ចៅក្រមចោទអំពីអ្វីដែលគេមិនបានប្ដឹងទៅទៀត។ អាហ្នឹងខ្ញុំមិនអាចទទួលយកបានទេ វាជាការឈឺចាប់មួយសម្រាប់កូនខ្មែរម្នាក់ ដែលមានមនសិការជាតិ»។
លោកបានសន្យាថា លោកនឹងទៅប្រទេសបារាំង ដើម្បីប្ដឹងរឿងនេះ ទៅអង្គការយូនីស្កូ (UNESCO) អំពីធ្វើឲ្យខូចខាតថ្មប្រសាទអង្គរកន្លងមក។
មេធាវីការពារក្ដីឲ្យលោក មឿង សុន គឺលោក សុខ សំអឿន មានប្រសាសន៍ថា សាលដីកានេះ គ្មានយុត្តិធម៌ «យើងមិនហ៊ានថាមិនទទួលទេ ពីព្រោះច្បាប់ចែងថា បើសិនយើងមើលងាយសេចក្ដីសម្រេចរបស់តុលាការ គឺត្រូវជាប់គុក។ យើងទទួល ប៉ុន្តែយើងសុំប្តឹងសាទុក្ខទៅលើ ទៀត»។
មេធាវីការពារក្ដីឲ្យរដ្ឋាភិបាលកម្ពុជា លោក ប៉ាល់ ចាន់ដារ៉ា មានប្រសាសន៍ថា ការសម្រេចរបស់សាលាឧទ្ធរណ៍ គឺមានយុត្តិធម៌ «ខ្ញុំយល់ឃើញថា ទាំងសាលាឧទ្ធរណ៍ និងសាលាដំបូងរាជធានីភ្នំពេញ ពិតជាបានរកយុត្តិធម៌ជូនរដ្ឋាភិបាលប្រាកដមែន»។
កាលពីថ្ងៃទី ១២ ខែកក្កដា ឆ្នាំ ២០០៩ កន្លងទៅ តុលាការក្រុងភ្នំពេញ បានកាត់ទោសកំបាំងមុខឲ្យលោក មឿង សុន ជាប់គុកចំនួន ២ ឆ្នាំ និងផាកពិន័យចំនួន ១៥ លានរៀល ស្មើនឹង ៣៧៥០
ដុល្លារអាមេរិក ក្រោមបទផ្សាយព័ត៌មានមិនពិត ដោយសារតែលោករិះគន់ថា ការដាក់អំពូលអគ្គិសនី របស់ក្រុមហ៊ុនចិន ឈ្មោះ ស៊ូជីង នៅថែវប្រសាទអង្គរវត្ត ខុសបច្ចេកទេស និងធ្វើឲ្យក្ដៅថ្មអង្គរ៕