តំណាងសហគមន៍៦ នៅភូមិតាពែន ឃុំត្បែង ស្រុកបន្ទាយស្រី ខេត្តសៀមរាប បានជួបជុំគ្នាធ្វើសេចក្ដីថ្លែងការណ៍រួមមួយ ស្ដីពីភាពអវិជ្ជមាននៃដំណោះស្រាយវិវាទដីធ្លីក្នុងខេត្តសៀមរាប កាលពីថ្ងៃសុក្រ ទី២ កញ្ញា។ ក្នុងនោះមានប្រជាពលរដ្ឋប្រមាណជិត ៤០០នាក់ រួមទាំងអង្គការជាតិ និងអន្តរជាតិចូលរួមផងដែរ។ ការជួបជុំគ្នានេះ គឺទាមទាររកដំណោះស្រាយដល់ជនរងគ្រោះពីការបាត់បង់ដីជាង ៣ម៉ឺនហិកតារ និងដែលរងប៉ះពាល់ដល់គ្រួសារជិត១០០។ ព្រះអង្គ លួន សុវ៉ាត ទោះបីជាស្ថិតនៅក្នុងការគំរាមពីអាជ្ញាធរយ៉ាងណាក៏ដោយ ក៏បានចូលរួមក្នុងពិធីនោះដែរ។
សេចក្ដីថ្លែងការណ៍មាន ៤ចំណុច។ ផ្ដោតទៅលើចំណុចទី៤ នៃសេចក្ដីថ្លែងការណ៍ បានអំពាវនាវសុំដល់ប្រមុខរដ្ឋាភិបាល និងក្រសួងធម្មការ និងសាសនា ឲ្យជួយអន្តរាគមន៍ដល់សម្ដេចព្រះមេគុណរាជធានីភ្នំពេញ នន្ទ ង៉ែត្រ និងប្រធានថេរសភា ជាព្រះមេគុណខេត្តសៀមរាប ពេជ្រ សននុប សុំឲ្យលុបសង្ឃប្រកាសហាមព្រះភិក្ខុសង្ឃ លួន សុវ៉ាត ឲ្យស្នាក់នៅតាមបណ្ដាវត្តក្នុងរាជធានីភ្នំពេញ និងខេត្តសៀមរាប ដើម្បីឲ្យព្រះអង្គមានសិទ្ធិសេរីភាពឡើងវិញ ក្នុងការបន្តការចូលរួមការលើកស្ទួយជួយជាតិ សាសនា និងសិទ្ធិមនុស្សក្នុងព្រះរាជាណាចក្រកម្ពុជា។
គ្រួសារសហគមន៍ខ្មែរម្នាក់ក្នុងចំណោមជាង ១ពាន់គ្រួសារ ដែលចូលរួមក្នុងសេចក្ដីថ្លែងការណ៍នោះ ហើយក៏ប្រឈមនឹងការបាត់បង់ដីស្រែ និងលំនៅឋានក្នុងខេត្តសៀមរាបនោះ លោក ដូង ឌឿង សម្ដែងការគាំទ្រព្រះភិក្ខុ លួន សុវ៉ាត ថាព្រះអង្គបានជួយការពារក្រុមសហគមន៍ខ្មែរនៅក្នុងខេត្តសៀមរាបនេះ មិនមានធ្វើអ្វីខុសឆ្គងនឹងសាសនាឡើយ ៖ "ទស្សនៈខ្ញុំផ្ទាល់ ខ្ញុំថា លោកតស៊ូនេះគ្មានអ្វីខុសប្រាសចាកពីច្បាប់រដ្ឋទេ ដោយសារប្រជាពលរដ្ឋរងគ្រោះ ការបណ្ដេញចេញនេះអត់បានពិចារណាថាតើប្រជាជនខ្មែរនេះ មានទុក្ខលំបាកយ៉ាងណា ហើយប្រជាជនហើយលោកធ្វើនេះគ្មានខុសអីទេ ព្រោះព្រះសង្ឃនេះវាកើតចេញពីប្រជាពលរដ្ឋ ដូច្នេះលោកឃើញប្រជាពលរដ្ឋ លោកត្រូវតែជួយគ្នាថាទោះធ្វើម៉េចឲ្យព្រះតេជព្រះគុណក្ដាប់ប្រទេសហ្នឹង ពិចារណាឲ្យមែនទែន ព្រោះលោកអត់មានធ្វើអ្វីខុសពីប្រទេសទេ បណ្ដេញលោកចេញខ្ញុំសោកស្ដាយណាស់ខ្មែរយើង"។
ព្រះតេជព្រះគុណ លួន សាវ៉ាត កាលពីថ្ងៃទី១៩ ខែសីហាកន្លងទៅនេះ មន្ត្រីសង្ឃនិងអាជ្ញាធរខេត្តសៀមរាប បានចេញលិខិតសង្ឃសម្រេចដោយថេរសភាសង្ឃនៃខេត្តសៀមរាបហាមជាដាច់ខាតដល់គ្រប់វត្តនៅទូទាំងខេត្តសៀមរាប មិនអនុញ្ញាតឲ្យព្រះអង្គ គង់នៅទីវត្តនោះទេ បន្ទាប់ពីសម្ដេចសង្ឃនាយក នន្ទ ង៉ែត កាលពីខែមេសា ឆ្នាំ២០១១ បានចេញសង្ឃដីកាបម្រាមដល់គ្រប់ទីវត្តអារាមក្នុងរាជធានីភ្នំពេញ មិនអនុញ្ញាតឲ្យព្រះសង្ឃអង្គនេះគង់នៅក្នុងរាជធានីភ្នំពេញនោះ។
ព្រះអង្គ លួន សុវ៉ាត មានថេរដីកាប្រាប់វិទ្យុអាស៊ីសេរីថា ព្រះអង្គពុំបានធ្វើអ្វីខុសនឹងច្បាប់សង្ឃទេ ៖ "ការចោទប្រកាន់ការហាមប្រាមហ្នឹង គឺវាខុសទៅក្នុងព្រះពុទ្ធសាសនាទាំងស្រុងតែម្ដង ហើយមិនមែនជាសង្ឃសម្រេចប្រកាសទេ ជាបុគ្គលប្រកាស អំណាចប្រកាស ឬក៏ផ្ដាច់ការប្រកាស… មិនមែនជាសេចក្ដីប្រកាសរបស់សង្ឃទេ អាត្មាបដិសេធមិនទទួលស្គាល់ជាដាច់ខាត... ក្នុងព្រះសង្ឃទូទៅជាង ៦ម៉ឺនអង្គក្នុងប្រទេសកម្ពុជា ក៏លោកមិនឯកភាពដែរ លោកមិនឯកភាពមិនគាំទ្រនូវសង្ឃសម្រេចនោះទេ មិនមែនជាសង្ឃសម្រេច"។
តបទៅនឹងសេចក្ដីសម្រេចរបស់អាជ្ញាធរក្នុងការចោទប្រកាន់ព្រះអង្គថាប្រព្រឹត្តខុសនឹងវិន័យសង្ឃនេះ វិទ្យុអាស៊ីសេរីបានទូលសួរទៅកាន់ព្រះតេជព្រះគុណបណ្ឌិត ហុក សុវណ្ណ គង់នៅវត្តខ្មែរកាណាដា ព្រះអង្គមានថេរដីកាថាប្រតិកម្មរបស់អាជ្ញាធរខ្មែរដែលបានប្រើស្លាកមន្ត្រីសង្ឃចោទព្រះអង្គ លួន សុវ៉ាត នេះ គឺខុសហើយ សកម្មភាពរបស់ព្រះអង្គមិនបានធ្វើនយោបាយអ្វីទេ សកម្មភាពនេះជាផ្លូវមនុស្សធម៌ ភ្ជាប់នឹងបញ្ហាសង្គម។ ការជួយសង្គ្រោះ មនុស្សតាមផ្នែកសង្គមកិច្ច និងវប្បធម៌ វាជាការត្រឹមត្រូវតាមព្រះពុទ្ធសាសនា ៖ "សកម្មភាពនេះស្របនឹងរាជរដ្ឋាភិបាលខ្មែរបច្ចុប្បន្ននេះ ដែលលើកតម្កើងសិទ្ធិមនុស្ស និងកម្ចាត់អំពើពុករលួយ រៀបចំតុលាការឲ្យមានយុត្តិធម៌ និងការពារព្រៃឈើក្នុងន័យនេះបើព្រះអង្គ លួន សាវ៉ាត គាំទ្រឲ្យគេកាប់ព្រៃឈើ គាំទ្រឲ្យគេកេងប្រវ័ញ្ចដីធ្លីពីប្រជាពលរដ្ឋ ទើបលោកខុសវិន័យ ទើបលោកខុសនឹងរាជរដ្ឋាភិបាល ចុះបើលោកដើរស្របតាមរាជរដ្ឋាភិបាលគួរជំរុញ និងលើកទឹកចិត្តលោកឲ្យបន្តធ្វើសកម្មភាពនេះ"។
ព្រះអង្គមានថេរដីកាបន្ថែមទៀតថា រាជរដ្ឋាភិបាលខ្មែរមិនត្រូវទៅគាំទ្រមន្ត្រីខិលខូចថ្នាក់ក្រោមដេញលោកចេញពីវត្តឡើយ ហើយព្រះសង្ឃទាំងអស់គួរតែពិចារណា មិនត្រូវធ្វើតាមបញ្ជាដែលមិនត្រឹមត្រូវនោះទេ ៖ "ចំពោះមន្ត្រីសង្ឃមុននឹងសម្រេចអ្វីគួរតែពិចារណាហ្មត់ចត់ ព្រោះអ្នកកាន់ព្រះពុទ្ធសាសនាពិភពលោកគេឃ្លាំចាំមើល បើសម្រេចចិត្តខុសនឹងខូចកិត្តិយសព្រះសង្ឃខ្មែរ បើមន្ត្រីសង្ឃចេញសារាចរដេញលោក បានន័យថាមន្ត្រីសង្ឃគាំទ្រឲ្យគេកាប់ព្រៃឈើ គាំទ្រអំពើពុករលួយ បើត្រឹមតែធ្វើតាមបញ្ជារបៀបហៃអើ ពុំបានពិចារណាក្នុងសង្ឃគ្នាឯងឲ្យមានភាពឯករាជ្យ នឹងរឹតតែខុសឆ្គងទៅទៀត នេះជាអំពើបាបខុសនឹងព្រះវិន័យ មួយទៀតកុំដេញពួកនិស្សិតឲ្យចេញពីវត្ត ព្រោះពូកនិស្សិតទាំងនោះពុំដឹងអីទេ"។
លោកបណ្ឌិត ឡៅ ម៉ុងហៃ អ្នកវិភាគឯករាជ្យពីស្ថានការណ៍នយោបាយកម្ពុជា ប្រតិកម្មទៅនឹងការហាមឃាត់នេះថា សកម្មភាពព្រះសង្ឃជួយដល់អ្នកស្រុកមានទុក្ខលំបាកនេះ មិនទាស់អីនឹងធម៌ព្រះពុទ្ធទេ ៖ "សកម្មភាពដែលព្រះសង្ឃដែលជួយដល់អ្នកស្រុកមានការទុក្ខលំបាកអីហ្នឹង ដូចជាមិនទាស់ទៅនឹងធម៌ព្រះពុទ្ធទេ សង្ឃឯទៀតហ្នឹង គួរតែជួយប្រជាពលរដ្ឋមានការលំបាក ជួយដឹកនាំគ្នា ជួយការពារគ្នា ជាមាគ៌ារបស់ព្រះពោធិសត្វ តាមខ្ញុំដឹង ព្រះបាទជ័យវរ្ម័នទី៧ មានពាក្យស្លោកមួយថា សេចក្ដីទុក្ខរបស់រាស្ត្រជាសេចក្ដីទុក្ខរបស់ស្ដេច។ ព្រះពុទ្ធសាសនាមិនមែនគិតតែពីធម៌អាថ៌ឡើងទៅឋាននិព្វានប៉ុណ្ណឹងទេ ជួយដល់អ្នកឯទៀតៗផង ដែលគេមានការទុក្ខលំបាកហ្នឹង។ ការហាមឃាត់មិនឲ្យប្រស្រ័យទាក់ទងហ្នឹង តាមខ្ញុំដឹង តាមធម៌ព្រះពុទ្ធដូចជាអត់មានអ៊ីចឹងទេ។ ហើយព្រះសង្ឃឯទៀតគួរធ្វើតាមព្រះសង្ឃ លួន សាវ៉ាត អ៊ីចឹងទៅ អានេះល្អ។ សម្រាប់ព្រះពុទ្ធសាសនាគឺរឹងមាំ។ បើទៅឋាននិព្វានម្នាក់ឯង ជួយរំដោះទុក្ខដល់រាស្ត្រ"។
ព្រះតេជព្រះគុណ លួន សុវ៉ាត តែងតែចូលរួមក្នុងសកម្មភាពតវ៉ាផ្សេងៗ របស់សហគមន៍ និងប្រជាជនដែលត្រូវគេរឹបអូសយកដីធ្លី និងលំនៅឋាន។ ហើយថ្មីៗនេះដែរ សកម្មជនសិទ្ធិមនុស្សអន្តរជាតិបានឲ្យដឹងថា ការគំរាម និងការបិទសិទ្ធិព្រះអង្គ លួន សុវ៉ាត មិនឲ្យបញ្ចេញមតិ គឺរំលោភសិទ្ធិរបស់ព្រះអង្គ ដែលការពារដោយរដ្ឋធម្មនុញ្ញ។
អាជ្ញាធរក៏បានបន្តគំរាមបណ្ដេញនិស្សិត និងអ្នកស្នាក់នៅក្នុងកុដិរបស់សកម្មជនសង្ឃ លួន សុវ៉ាត ក្នុងវត្តឧណ្ណាលោម និងចង់ដកហូតរុះរើកុដិព្រះអង្គទៀតផង បន្ទាប់ពីព្រះអង្គបានទទួលលិខិតព្រមានពីអាជ្ញាធរមិនឲ្យព្រះអង្គស្នាក់នៅក្នុងវត្តក្នុងខេត្តសៀមរាប៕