ចំពោះការសុំឲ្យព្រះសង្ឃធ្វើការពង្រឹងការបដិបត្តិធម៌វិន័យឲ្យបានត្រឹមត្រូវនេះ ពីព្រោះគេបានលេចឮថា មានករណីព្រះសង្ឃអង្គខ្លះបានប្រព្រឹត្តប្រាសចាកភេទជាសង្ឃ ដូចជាថ្មីៗនេះ ព្រះសង្ឃចំនួន ៦អង្គ នៅក្នុងវត្ដរការ សង្កាត់ឪម៉ាល់ ខេត្តបាត់ដំបង ជាដើម បានប្រព្រឹត្តទ្រុស្ដសីលធម៌វិន័យ សេពគ្រឿងស្រវឹង បង្ករបួសស្នាម ផ្ទុយនឹងពុទ្ធឱវាទ។
ព្រះភិក្ខុ យឿម រដ្ឋសភា ព្រះអនុគណក្រុងបាត់ដំបង បានបញ្ជាក់ថា ព្រះសង្ឃទ្រុស្ដសីលទាំងនោះ ឥឡូវនេះត្រូវបានសមត្ថកិច្ចចាប់ខ្លួនហើយ បន្ទាប់ពីគេបានតាមដានឃើញការពិតជាក់ស្ដែង ក្នុងខណៈពេលវិលត្រឡប់មកពីកន្លែងផឹកស៊ីនិងស្លៀកពាក់ជាគ្រហស្ថ។
ព្រះភិក្ខុ យឿម រដ្ឋសភា មានពុទ្ធដីកាដូច្នេះថា ៖ «ដូចអស់ភេទហ្នឹងហើយ ព្រោះមានពណ៌សម្បុរអីនៅជាប់ទៀត។ អាត្មាខាងសាលាអនុគណនេះ ខំដាក់ការណែនាំទៅលោកគ្រូចៅអធិការអីតាមវត្តដែរ ពង្រឹងខាងផ្នែកព្រះវិន័យអីហ្នឹង សំខាន់រឿងការបដិបត្តិអីហ្នឹង។ សាលាមានច្រើនដែរ បានបើកពុទ្ធិកបឋមសិក្សាអីបាន ១១សាលាហើយ នៅក្រុងបាត់ដំបងយើងនេះ»។
អគ្គនាយកក្រសួងធម្មការនិងសាសនា លោក អ៊ុន ដារី បានមានប្រសាសន៍ដែរថា តាមពិតទៅព្រះសង្ឃភាគច្រើន លោកបានខិតខំប្រឹងប្រែងធ្វើការបដិបត្ដិធម៌វិន័យគម្ពីរព្រះត្រៃបិដកយ៉ាងខ្លាំងនៅតាមវត្តអារាម ឬក៏ពុទ្ធិកវិទ្យាល័យនានា ទាំងនៅក្នុងក្រុងភ្នំពេញនិងខេត្ត ហើយសម្រាប់ព្រះសង្ឃមិនសូវសិក្សារៀនសូត្រធម៌វិន័យនោះគឺមានចំនួនតិចតួចទេ។
លោកបានបន្ដថា ទោះជាយ៉ាងណាក៏ដោយ ក្រសួងធម្មការនិងសាសនា រួមសហការជាមួយគណៈសង្ឃនាយក កន្លងមក ក៏ដូចសព្វថ្ងៃ បានធ្វើការទប់ស្កាត់ដោយសុំឲ្យព្រះចៅអធិការវត្តទាំងអស់ រៀបចំធ្វើយ៉ាងណាឲ្យព្រះសង្ឃមានសាលារៀនដើម្បីសិក្សាធម៌វិន័យឲ្យបានច្រើន។ ហើយម្យ៉ាងទៀ ក៏បានធ្វើការទប់ស្កាត់ចំពោះជនខិលខូចមួយចំនួនទៀតដែលបានក្លែងបន្លំស្លៀកពាក់គ្រងស្បង់ធ្វើជាសង្ឃដើរបិណ្ឌបាត្របច្ច័យអ្នកស្រុក បង្កភាពច្របូកច្របល់ក្នុងព្រះពុទ្ធសាសនា។
លោក អ៊ុន ដារី ថ្លែងដូច្នេះថា ៖ «វាមិនជារូបភាពអីធំដុំទេ ដូចថាជាបុគ្គលមួយពីរ ប៉ុន្តែយើងជាទូទៅ ក៏ខិតខំចាត់វិធានការទាន់ពេលវេលាដែរ កន្លងមកហ្នឹង»។
តាមការឲ្យដឹងពីមន្ដ្រីក្រសួងធម្មការនិងសាសនា បានបញ្ជាក់ថា នៅក្នុងប្រទេសកម្ពុជា សព្វថ្ងៃមានព្រះសង្ឃនៃព្រះពុទ្ធសាសនាទាំងគណៈធម្មយុត្តិនិងមហានិកាយមានចំនួនជាង ៥០.០០០អង្គ និងមានវត្តអារាមជាង ៤.០០០វត្ត ក្នុងនោះមានវត្ដធម្មយុត្ដិចំនួន១៣វត្ត និងអាស្រមចំនួន ៧៦អាស្រម៕