កងទាហានការពារព្រំដែនខ្មែរនៅតំបន់ជម្លោះព្រំដែនប្រាសាទតាមាន់ធំ នៃស្រុកបន្ទាយអំពិល ខេត្តឧត្តរមានជ័យ បានឲ្យដឹងនៅថ្ងៃទី១២ ខែមេសាថា ក្នុងរយៈពេល ៤ថ្ងៃកន្លងមកនេះ មានប្រជាពលរដ្ឋខ្មែររាប់ម៉ឺននាក់បានឡើងទៅកម្សាន្តប្រាសាទតាមាន់ធំជាបន្តបន្ទាប់នៅមុនថ្ងៃបុណ្យចូលឆ្នាំខ្មែរ ស្របពេលដែលទាហានព្រំដែនថៃ បានបើកចំហឲ្យប្រជាពលរដ្ឋរបស់គេបានចូលមកលក់ដូរ និងកម្សាន្តសប្បាយនៅជិតប្រាសាទតាមាន់ធំដែរនោះ។
នាយសេនាធិការកងយោធពលខេមរភូមិន្ទរបស់កងពលតូចលេខ៤២ ដែលកំពុងប្រចាំការពារព្រំដែនខ្មែរនៅប្រាសាទតាមាន់ធំ លោក នាក់ វង្ស បានមានប្រសាសន៍កាលពីព្រឹកថ្ងៃច័ន្ទ ទី១២ ខែមេសាថា ចាប់តាំងពីថ្ងៃទី៨ ខែមេសា រហូតមក ប្រជាពលរដ្ឋខ្មែរមកពីបណ្ដាខេត្តនានានៃប្រទេស និងប្រជាពលរដ្ឋខ្មែរនៅជាប់ព្រំដែនរាប់ម៉ឺននាក់ បាននាំគ្នាឡើងទៅកម្សាន្តនៅប្រាសាទតាមាន់ធំ ដោយសារស្ថានការណ៍ប្រឈមមុខដាក់គ្នាក្នុងរឿងជម្លោះព្រំដែនរវាងទាហានខ្មែរ-ថៃ បានស្ងប់ស្ងាត់មិនមានអ្វីគួរឲ្យភ័យខ្លាចនោះ។
លោក នាក់ វង្ស មានប្រសាសន៍ឲ្យដឹងដូច្នេះ ៖ «ពីថ្ងៃទី៨ ប្រហែលជាង ៣ម៉ឺននាក់ ថ្ងៃនេះ(១២ មេសា) ប្រហែល ៣ម៉ឺននាក់។ មកពីគ្រប់ខេត្ត។ មិនដឹងជាហេតុអីទេ ក៏ប៉ុន្តែក្នុងរដូវចូលឆ្នាំហ្នឹងបងប្អូនគាត់ដើរលេងទៅ ហើយខាងសៀមវាបើកលក់ដូរបន្តិចបន្តួចនៅក្បែរប្រាសាទមួយរដូវចូលឆ្នាំនេះឯង។ អត់ឃើញអីតឹងតែងអីទេគឺធម្មតាៗ»។
មេឃុំអំពិលដែលនៅជាប់តំបន់ព្រំដែនខ្មែរ-ថៃ លោក សេ មួយ បានមានប្រសាសន៍ថា ៣-៤សប្ដាហ៍មកនេះ នៅតំបន់របស់លោករៀងរាល់ថ្ងៃអាទិត្យ ទាហានថៃបានបើកព្រំដែនឲ្យប្រជាពលរដ្ឋខ្មែរអាចចេញចូលទៅផ្សារណាត់ក្នុងទឹកដីថៃ ដើម្បីដោះដូរទំនិញគ្នាបាន ហើយនៅប្រាសាទតាមាន់ គឺប្រជាពលរដ្ឋខ្មែរយ៉ាងច្រើនកុះករកំពុងនាំគ្នាធ្វើដំណើរទៅលេងកម្សាន្តជាច្រើនថ្ងៃមកហើយ។
លោក សេ មួយ មានប្រសាសន៍ដូច្នេះ ៖ «រាល់អាទិត្យហ្នឹងគេបើកផ្សារណាត់មួយនៅភូមិសាន នៅប្រទេសថៃ។ បងប្អូនគាត់ចេញទៅដោះដូរឥវ៉ាន់ហ្នឹងជាធម្មតា ហើយមួយទៀតរាល់ឆ្នាំហ្នឹងរវាងថៃ-ខ្មែរ តែងតែបើកទៅលេងនៅប្រាសាទតាមាន់ហ្នឹង។ ចាប់ពីថ្ងៃទី៨ រហូតមកដល់ថ្ងៃនេះនៅតែបងប្អូនខ្មែរយើងឡើងទៅលេងនៅឯប្រាសាទតាមាន់។ ទៅច្រើនលោកគ្រូ ជាពិសេសក្មេងៗ ហើយនិងបងប្អូនខ្លះដែលគាត់ចង់ទៅលេង។ ឃើញខ្លះគោយន្ត ខ្លះឡាន ខ្លះម៉ូតូអី គគ្រឹកគគ្រេងទៅណា»។
មន្ត្រីយោធាខ្មែរបាននិយាយថា ស្ថានភាពប្រឈមមុខដាក់គ្នារវាងទាហានខ្មែរ-ថៃ នៅតាមតំបន់ជម្លោះព្រំដែនជាច្រើនកន្លែង គឺមានភាពស្ងប់ស្ងាត់មិនមានអ្វីគួរឲ្យព្រួយបារម្ភទេ។
មេបញ្ជាការកងពលធំអន្តរាគមន៍លេខ៣ ដែលកំពុងគ្រប់គ្រងយោធាខ្មែរការពារព្រំដែនជុំវិញតំបន់ប្រាសាទព្រះវិហារ លោកឧត្ដមសេនីយ៍ទោ ស្រី ឌឹក បានមានប្រសាសន៍ថា ស្ថានភាពប្រឈមមុខដោយយោធាបានស្ងប់ស្ងាត់ ដោយកងទាហានការពារព្រំដែនខ្មែរនៅតំបន់ជួរមុខនេះ មានឱកាសបានចូលរួមកម្សាន្តសប្បាយជាមួយក្រុមតារាភាពយន្ត និងតារាចម្រៀងជាច្រើនទើបតែមកប្រគំជូនកងទ័ពសប្បាយមុនពេលចូលឆ្នាំផងដែរ។
លោក ស្រី ឌឹក បានមានប្រសាសន៍ថា ស្ថានភាពប្រឈមមុខដាក់គ្នារវាងទាហានខ្មែរ-ថៃ នៅតំបន់ជម្លោះព្រំដែនបានស្ងប់ស្ងាត់ ស្របពេលនៅឯទីក្រុងបាងកកប្រទេសថៃ កំពុងមានភាពចលាចលគួរឲ្យព្រួយបារម្ភនោះ៕