នៅក្នុងការជួបជាមួយអ្នកកាសែតនោះ ស្ថាប័នឃ្លាំមើលការបោះឆ្នោតបានអំពាវនាវឲ្យកាសែត វិទ្យុ និងទូរទស្សន៍ រាយការណ៍ព័ត៌មានឲ្យបានត្រឹមត្រូវ មានតុល្យភាព និងផ្ដល់សិទ្ធិស្មើគ្នាសំរាប់គណបក្សនយោបាយទាំង ១០ ដើម្បីបញ្ចេញសំឡេង និងកម្មវិធីនយោបាយរៀងៗខ្លួននៅក្នុងយុទ្ធនាការឃោសនាបោះឆ្នោតខាង មុខនេះ។
មន្ត្រីជាន់ខ្ពស់នៃគណៈកម្មាធិការជាតិរៀបចំការបោះឆ្នោត (គ.ជ.ប.) នៅថ្ងៃទី១៦ ខែឧសភា ឆ្នាំ២០១២ បានប្រកាសឲ្យដឹងថា ប្រជាពលរដ្ឋចំនួនជាង ៩លាននាក់ នឹងទៅបោះឆ្នោតជ្រើសរើសក្រុមប្រឹក្សា ឃុំ សង្កាត់ អាណត្តិទី៣ នៅថ្ងៃទី៣ ខែមិថុនា ឆ្នាំ២០១២ ហើយ គ.ជ.ប. កំពុងតែរៀបចំការបោះឆ្នោតនេះប្រកបដោយសេរី ត្រឹមត្រូវ និងយុត្តិធម៌។
ប័ណ្ណព័ត៌មានបោះឆ្នោតត្រូវបាន គ.ជ.ប. បានចែកជូនប្រជាពលរដ្ឋចំនួនជាង ៧លាននាក់ហើយ។ គ.ជ.ប. កំពុងតែបន្តចែកប័ណ្ណនេះទៀតឲ្យបានគ្រប់ចំនួន។ ការបោះឆ្នោត នឹងចាប់ផ្ដើមជាផ្លូវការចាប់ពីម៉ោង ៧ព្រឹក ដល់ម៉ោង ៣រសៀល ថ្ងៃទី៣ ខែមិថុនា ឆ្នាំ២០១២។
គ.ជ.ប. បានអនុញ្ញាតឲ្យមានអ្នកសង្កេតការណ៍ជាតិ និងបរទេសសរុបជាង ១ម៉ឺននាក់ ចូលរួមសង្កេតការបោះឆ្នោតនេះ មកពីអង្គការចំនួន ១៦អង្គភាព។ គ.ជ.ប. គ្រោងចំណាយថវិកាសរុបជិត ១៩លានដុល្លារអាមេរិកសំរាប់ការបោះឆ្នោតនេះ ក្នុងនោះ ថវិការបស់រដ្ឋាភិបាល ៧៦% និងថវិកាជំនួយពីបរទេស ២៤% ដែល គ.ជ.ប. កំពុងតែស្វែងរកជំនួយនេះនៅឡើយ។
អគ្គលេខាធិការនៃគណៈកម្មាធិការជាតិរៀបចំការបោះឆ្នោត លោក ទេព នីថា បានមានប្រសាសន៍នៅក្នុងសន្និសីទកាសែតនៅថ្ងៃទី១៦ ខែឧសភា ថា ការរាប់សន្លឹកឆ្នោត គឺធ្វើនៅការិយាល័យបោះឆ្នោតតែម្ដង ក្រោយពីចប់ការបោះឆ្នោតនៅវេលាម៉ោង ៣រសៀលថ្ងៃទី៣ ខែមិថុនា ឆ្នាំ ២០១២ រីឯលទ្ធផលបណ្ដោះអាសន្ន នឹងប្រកាសក្នុងរយៈពេល ៣ថ្ងៃ ក្រោយពីចប់ការបោះឆ្នោតនោះ គឺប្រកាសនៅតាមការិយាល័យបោះឆ្នោត។
លោក ទេព នីថា៖ «តួអង្គសំខាន់នៅការិយាល័យបោះឆ្នោត គឺមានគណៈកម្មការការិយាល័យបោះឆ្នោត ដែលមាន ៦នាក់ មានមន្ត្រីសន្តិសុខនៅការិយាល័យបោះឆ្នោត មាន ៣នាក់ ដែលគាត់នៅចម្ងាយពី ១៥ម៉ែត្រ ទៅ ១៥០ម៉ែត្រពីការិយាល័យបោះឆ្នោត។ ភ្នាក់ងារគណបក្សដែលគណបក្សឈរឈ្មោះនីមួយៗ អាចដាក់ភ្នាក់ងាររបស់គាត់ម្នាក់ និងបម្រុងម្នាក់នៅតាមការិយាល័យបោះឆ្នោត។ មានអ្នកសង្កេតការណ៍ដែលមកដល់ពេលនេះជាង ១ម៉ឺននាក់ហើយ។ មានតួអង្គសំខាន់ទៀតនៅទីនោះ គឺអ្នកសារព័ត៌មាននៅការិយាល័យបោះឆ្នោត»។
លោកបានបញ្ជាក់ថា លទ្ធផលជាផ្លូវការនៃការបោះឆ្នោតនោះ នឹងប្រកាសឲ្យដឹងក្នុងរយៈពេល ១សប្ដាហ៍ ឬ ៣សប្ដាហ៍ បើគ្មានបណ្ដឹងតវ៉ា។
ទាក់ទងនឹងការបោះឆ្នោតនេះ នាយកប្រតិបត្តិនៃអង្គការឃ្លាំមើលការបោះឆ្នោតដោយសេរី ត្រឹមត្រូវ និងយុត្តិធម៌នៅកម្ពុជា ហៅកាត់ថា ខុមហ្វ្រែល (Comfrel) លោក គល់ បញ្ញា បានមានប្រសាសន៍ថា លោកត្រៀមអ្នកសង្កេតការណ៍បោះឆ្នោតសរុបជាង ៥.០០០នាក់ ចែកជា ៥ក្រុម។
លោក គល់ បញ្ញា៖ «ការងាររបស់គេ គឺថា គេមើលលើដំណើរការចុះឈ្មោះ គេមើលលើដំណើរការបរិយាកាសនៃការបំភិតបំភ័យ ហិង្សាទាក់ទងនឹងនយោបាយ យុទ្ធនាការឃោសនា ការចុះឈ្មោះគណបក្សនយោបាយ។ គេមើលលើយុទ្ធនាការឃោសនា ការឃោសនាបោះឆ្នោត ហើយគេជួយគ្រប់គ្រងលើការងារអ្នកសង្កេតការណ៍នៅពេលថ្ងៃបោះឆ្នោត និងរាប់សន្លឹកឆ្នោតផងដែរ។ ហើយពួកគេក៏តាមមើលផងដែរ អំពីតើរបៀបផ្ទេរអំណាចក្រុមប្រឹក្សាឃុំសង្កាត់ជាប់ថ្មីហ្នឹង ផ្ទេរអំណាចពីក្រុមប្រឹក្សាឃុំសង្កាត់ចាស់ហ្នឹង តើរបៀបផ្ទេរអំណាចហ្នឹងវាទៅដោយរលូន តើមានបញ្ហាអ្វីទេ? ហើយពួកគេនឹងរាយការណ៍អំពីបញ្ហានេះ»។
លោកបានថ្លែងថា ចំនួនអ្នកចុះឈ្មោះបានកើនឡើងជាងមុន ប៉ុន្តែអ្នកទៅបោះឆ្នោតអាចនឹងធ្លាក់ចុះជាងមុន ដោយសារតែមានវត្តមានមេភូមិតាមឃ្លាំមើលប្រជាពលរដ្ឋនៅតាមមូលដ្ឋាន ជាការបន្លាចមួយ និងនីតិវិធីបោះឆ្នោតសាំញ៉ាំ ដូចជាការរកឈ្មោះមិនឃើញក្នុងបញ្ជីជាដើម។
ការបោះឆ្នោតខាងមុខនេះ នឹងដំណើរការនៅការិយាល័យបោះឆ្នោតសរុប ១៨.១០៧ ការិយាល័យ និងមណ្ឌលបោះឆ្នោតសរុប ១.៦៣៣កន្លែង នៅក្នុងឃុំសង្កាត់ ១.៦៣៣។
អគ្គលេខាធិការនៃគណៈកម្មាធិការជាតិរៀបចំការបោះឆ្នោត លោក ទេព នីថា បានមានប្រសាសន៍ថា គណបក្សនយោបាយទាំង ១០ នឹងចាប់ផ្ដើមយុទ្ធនាការឃោសនាបោះឆ្នោត នៅថ្ងៃទី១៨ ខែឧសភា ដល់ថ្ងៃទី១ ខែមិថុនា ឆ្នាំ២០១២។ បេក្ខជនសរុបនៃគណបក្សទាំង ១០នោះ គឺមានចំនួន ១.១៥៦នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។