មេដឹកនាំគណបក្សសិទ្ធិមនុស្ស និងគណបក្ស សម រង្ស៊ី បានឲ្យដឹងថា ការបោះឆ្នោតជ្រើសរើសសមាជិកក្រុមប្រឹក្សាឃុំសង្កាត់អាណត្តិទី៣ ឆ្នាំ២០១២ នឹងមិនអាចមានយុត្តិធម៌ និងត្រឹមត្រូវបានទេ ព្រោះមុនការបោះឆ្នោតនេះមានអាជ្ញាធរជាសមាជិកបក្សកាន់អំណាច បានធ្វើសកម្មភាពគំរាមកំហែងសកម្មជន ឬសមាជិកគាំទ្រគណបក្សប្រឆាំងកើតមានច្រើនតាមមូលដ្ឋាន។
លោក កឹម សុខា ជាប្រធានគណបក្សសិទ្ធិមនុស្ស និងជាអ្នកតំណាងរាស្ត្រមណ្ឌលកំពង់ចាម។ លោកមានប្រសាសន៍នៅថ្ងៃទី១៥ ខែឧសភា ថា មានករណីគំរាមកំហែងសកម្មជនតាមមូលដ្ឋានរបស់ខ្លួនជាង ១០០ករណីនៅទូទាំងប្រទេសពីអាជ្ញាធរមូលដ្ឋានគណបក្សកាន់អំណាចមុន ការបោះឆ្នោតឃុំសង្កាត់ ចូលមកដល់។ លោកថា រូបភាពនៃការគំរាមនោះ មានតាមរយៈការបោះពាក្យសម្តីប្រមាថ និងព្រមានផ្តាច់ផ្តិលជីវិតជាដើម។
លោក កឹម សុខា ឲ្យដឹងថា ការបោះឆ្នោតឃុំសង្កាត់ អាណត្តិទី៣នេះ ក៏មានសកម្មភាពទិញទឹកចិត្តពលរដ្ឋ ឬសកម្មជនបក្សប្រឆាំងពីសំណាក់បក្សកាន់អំណាច មានរូបភាពចេញមុខតាមមូលដ្ឋាន។ លោកចង់ឃើញការប្រកួតប្រជែងការបោះឆ្នោតស្មើភាពរវាងបក្សកាន់អំណាច និងបក្សនៅក្រៅរដ្ឋាភិបាល។
មិនខុសគ្នាទេ លោក សុន ឆ័យ ប្រធានក្រុមអ្នកតំណាងរាស្ត្រ និងជាសមាជិកសភាគណបក្ស សម រង្ស៊ី មានប្រសាសន៍ថា មានករណីគំរាមកំហែដល់អាយុជីវិត ឬករណីប្ដឹងសកម្មជនតាមមូលដ្ឋានរបស់ខ្លួនរាប់រយករណីមុនការបោះ ឆ្នោតឃុំសង្កាត់អាណត្តិទី៣។
ទោះលោក សុន ឆ័យ មិនបានបញ្ជាក់តួលេខសកម្មភាពគំរាមកំហែងសកម្មជនរបស់ខ្លួនពីអាជ្ញាធរ គាំទ្របក្សកាន់អំណាចមានចំនួនប៉ុន្មានឲ្យពិតប្រាកដទេ ក៏ប៉ុន្តែលោកឲ្យដឹងថា ករណីគំរាមកំហែងនេះកើតមានមិនក្រោម ១០០ករណីទេ។
លោកអះអាងថា អំពើហិង្សា ឬសកម្មភាពគំរាមកំហែងសកម្មជនបក្សប្រឆាំងពីសមត្ថកិច្ចគាំទ្របក្ស កាន់អំណាចក្នុងការបោះឆ្នោតឃុំសង្កាត់អាណត្តិទី៣ មិនទាន់ថយចុះ និងមានរូបភាពគួរឲ្យព្រួយបារម្ភដដែល។
ដោយឡែក លោក ប៉ែន សង្ហា មន្ត្រីនាំពាក្យគណបក្ស នរោត្តម រណឫទ្ធិ បានទទួលស្គាល់ថា អំពើហិង្សាមុនការបោះឆ្នោតនៅបន្តកើតមាន ព្រោះកាលពីចុងខែមេសា កន្លងទៅ មានសកម្មជនរបស់ខ្លួនម្នាក់នៅខេត្តពោធិ៍សាត់ ត្រូវជនមិនស្គាល់មុខបាញ់សម្លាប់។ លោកចាត់ទុកឃាតកម្មនេះជាការគំរាមកំហែងមុនការបោះឆ្នោតឃុំសង្កាត់ អាណត្តិទី៣ ចូលមកដល់។
ប្រតិកម្មតបបញ្ហានេះ លោក អ៊ុក គឹមហាន ប្រធាននាយកដ្ឋានបូកសរុបគណបក្សប្រជាជនកម្ពុជា បានបដិសេធចំពោះការចោទប្រកាន់របស់មន្ត្រីគណបក្សសិទ្ធិមនុស្ស និងបក្ស សម រង្ស៊ី ថា ជាការចោទគ្មានការពិត។ លោកសង្កត់ធ្ងន់ថា គណបក្សប្រជាជនគ្មានគោលការណ៍ ឬក៏គ្មានវិធានការក្នុងការទិញដូរសកម្មជន ឬក៏ប្រើឲ្យសមត្ថកិច្ចតាមមូលដ្ឋានគំរាមកំហែងសកម្មជនបក្សប្រឆាំង នោះទេ។
ទាក់ទងបញ្ហានេះ លោកបណ្ឌិត ហង្ស ពុទ្ធា នាយកប្រតិបត្តិគណៈកម្មាធិការបោះឆ្នោតដោយសេរី និងត្រឹមត្រូវ ហៅកាត់ថា និកហ្វិច (NICFEC) បានថ្លែងថា អំពើហិង្សា ឬសកម្មភាពគំរាមកំហែងទៅលើសកម្មជនបក្សប្រឆាំងមុនការបោះឆ្នោតនៅ បន្តកើតមាន។ លោកស្នើឲ្យគ្រប់គណបក្សនយោបាយមានភាពចាស់ទុំ និងចូលរួមបោះឆ្នោតឲ្យបានស្មើភាព និងមានយុត្តិធម៌។
យុទ្ធនាការឃោសនាបោះឆ្នោតឃុំសង្កាត់អាណត្តិទី៣ ចាប់ផ្តើមនៅថ្ងៃទី១៨ ខែឧសភា ដល់ថ្ងៃទី១ ខែមិថុនា ឆ្នាំ២០១២។ រីឯកាលបរិច្ឆេទនៃការបោះឆ្នោតប្រព្រឹត្តទៅនៅថ្ងៃអាទិត្យ ទី៣ ខែមិថុនា ឆ្នាំ២០១២៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។