សេចក្តីអះអាងនេះធ្វើឡើងតាមរយៈពាក្យបណ្តឹងកាលពីថ្ងៃទី២៣ ខែធ្នូ ឆ្នាំ២០០៩ ដាក់ជូនសមាគមអាដហុក ខេត្តមណ្ឌលគិរី ប្រយោជន៍សុំឲ្យសមាគមការពារសិទ្ធិមនុស្សមួយនេះ ជួយរកយុត្តិធម៌ក្នុងរឿងនេះ។
អ្នកភូមិមានឈ្មោះ ញ៉ វណ្ណដាក រស់នៅភូមិមេមុំ ឃុំរយ៉ ស្រុកកោះញែក ខេត្តមណ្ឌលគិរី នៅថ្ងៃសៅរ៍ ទី២ ខែមករា ឆ្នាំ២០១០ បញ្ជាក់ប្រាប់វិទ្យុអាស៊ីសេរីថា គាត់បានប្រគល់ប្រាក់២លានរៀលទៅមន្ត្រីក្រឡាបញ្ជីឈ្មោះ ខៀវ បាន កាលពីថ្ងៃទី៦ ខែវិច្ឆិកា ឆ្នាំ២០០៩ មុនមួយថ្ងៃនៃការកាត់ទោសកូនប្រុសគាត់ដែលជាប់ចោទពីរឿងលួចគោ។ គាត់បញ្ជាក់ថា មន្ត្រីអនុរក្សពន្ធនាគារខេត្តមណ្ឌលគិរី ឈ្មោះ ព្រំ វណ្ណៈ បានណែនាំឲ្យគាត់ស្គាល់លោក ខៀវ បាន នៅគ្រាដែលគាត់ទៅសួរសុខទុក្ខកូននៅពន្ធនាគារនិងឲ្យប្រគល់ប្រាក់ទៅក្រឡាបញ្ជីដើម្បីជួយរត់ការក្នុងការកាត់ទោសកូនប្រុសគាត់នៅថ្ងៃទី៧ ខែវិច្ឆិកា។ គាត់បន្តថា ក្រឡាបញ្ជីបោកប្រាស់គាត់យកប្រាក់នោះទើបគាត់ប្តឹងទារយកប្រាក់នោះវិញ។
លោក ញ៉ វណ្ណដាក ឲ្យដឹងដូច្នេះ ៖ «គេថា កាត់ទោសពី១០ឆ្នាំទៅ៨ឆ្នាំ ដល់អ៊ីចឹងខ្ញុំថា លោកបងអើយកុំធ្វើអ៊ីចឹង ខ្ញុំថា ឥឡូវ(សម្រួល)ត្រឹមលោកបងទៅ។ ខ្ញុំឲ្យកូនខ្ញុំហ្នឹងជាប់ត្រឹម២ឆ្នាំ ឬមួយឆ្នាំកន្លះ។ ខ្ញុំហុចលុយឲ្យ២លានរៀល»។
មន្រ្កីក្រឡាបញ្ជី លោក ខៀវ បាន បដិសេធថា មិនបានប្រព្រឹត្តដូចការចោទនោះទេ។ លោកបញ្ជាក់ថា មិនបានដឹងរឿងនិងមិនបានស្គាល់អ្នកភូមិនោះឡើយ ៖ «អត់ដែលបានជួបអ្នកហ្នឹងផង រឿងហ្នឹងខ្ញុំមិនសូវដឹងដែរ ខ្ញុំអត់ស្គាល់មុខ»។
មន្ត្រីផ្នែកអង្កេតសមាគមអាដហុក លោក ឆាយ ធី មានប្រសាសន៍ថា អ្នកភូមិបានផ្តិតមេដៃលើពាក្យបណ្តឹងទាមទារប្រាក់ពីលោក ខៀវ បាន វិញ ជាមួយនោះក៏មានមន្ត្រីអនុរក្សពន្ធនាគារឈ្មោះ សេង លី បានចូលខ្លួនបំភ្លឺជាសាក្សីថា លោក ខៀវ បាន បានទទួលប្រាក់សំណូកនោះមែន។ លោកបញ្ជាក់ថា នឹងអន្តរាគមន៍ពាក្យបណ្តឹងអ្នកភូមិទៅប្រធានតុលាការ។
លោក ឆាយ ធី មានប្រសាសន៍ដូច្នេះ ៖ «ពាក្យបណ្ដឹងរបស់ជនរងគ្រោះដែលបានប្ដឹងសុំទាមទារប្រាក់ចំនួន២លានរៀល ហើយយើងគិតថា បើសិនជាករណីនេះបានប្រព្រឹត្តដោយបុគ្គលជាមន្រ្តីតុលាការមែនគឺជាអំពើពុករលួយហើយ»។
វិទ្យុអាស៊ីសេរីមិនអាចទាក់ទងមន្រ្តីអនុរក្សពន្ធនាគារ លោក ព្រំ វណ្ណៈ ដើម្បីបំភ្លឺបញ្ហានេះបានទេនៅថ្ងៃសៅរ៍ ក៏ប៉ុន្តែលោក សេង លី ឲ្យដឹងថា លោកគឺជាសាក្សីផ្ទាល់ដែលឃើញការប្រគល់ប្រាក់នោះ។
លោក សេង លី បានឲ្យដូច្នេះ ៖ «គេថា កាត់ទោសហើយចេញតែម្ដង ហើយដល់ពេលកាត់ទោសកូនគាត់ហ្នឹង កាត់ទោសដល់ទៅជាប់គុក៥ឆ្នាំ ដល់ពេលអ៊ីចឹងឪគេមិនព្រម»។
កូនប្រុសអ្នភភូមិឈ្មោះ ញ៉ វណ្ណដាក ត្រូវប៉ូលិសចាប់ខ្លួនកាលពីខែមេសា ឆ្នាំ២០០៩ បន្ទាប់ពីគេនិងបក្ខពួកបានលួចគោអ្នកភូមិជាមួយគ្នាទៅលក់ឲ្យឈ្មួញកាប់យកសាច់។ តុលាការខេត្តមណ្ដលគិរីកាត់ទោសឲ្យជាប់ពន្ធនាគារ៥ឆ្នាំ៕