លោកមេធាវី គង់ សំអុន បានមានប្រសាសន៍យ៉ាងដូច្នេះ ៖ «បាទ! យើងសម្រេចប្ដឹងឧទ្ធរណ៍ ប្ដឹងទៅអគ្គព្រះរាជអាជ្ញា។ ខ្ញុំនឹងដាក់ក្នុងអាទិត្យហ្នឹង ប្រហែលជាស្អែក»។
សូមរំឭកជូនថា រឿងក្តីរវាងលោកស្រី មូរ សុខហួរ និងលោក ហ៊ុន សែន បានកើតឡើងនៅពេលដែលលោកស្រី មូរ សុខហួរ បានប្តឹងលោក ហ៊ុន សែន ពីបទបរិហារកេរ្តិ៍ បន្ទាប់ពីនាយករដ្ឋមន្ត្រីខ្មែររូបនោះបានថ្លែងជាសាធារណៈនៅឯខេត្តកំពតកាលពីដើមខែមេសាកន្លងទៅនេះថាមានស្រ្តីជើងខ្លាំងម្នាក់ពូកែរករឿងគេគឺរត់ទៅឱបគេសោះ តែថាគេប្រឡេះឡេវអាវ។
លោកនាយករដ្ឋមន្រ្តី ហ៊ុន សែន ក៏បានប្តឹងតបទៅលោកស្រី មូរ សុខហួរ វិញ ពីបទបរិហារកេរ្តិ៍ដែរនៅបន្ទាប់ពីលោកស្រីនិងមេធាវីរបស់លោកស្រីបានធ្វើសន្និសីទកាសែតចោទប្រកាន់ចំពោះកំហុសរបស់លោក ហ៊ុន សែន មុនការដាក់ពាក្យបណ្តឹងទៅតុលាការនោះ។
លុះដល់ថ្ងៃទី១០ មិថុនានេះ ព្រះរាជអាជ្ញាសាលាដំបូងរាជធានីភ្នំពេញបានសម្រេចតម្កល់សំណុំរឿងនៃបណ្តឹងរបស់លោកស្រី មូរ សុខហួរ ដោយមិនចាត់ការ ប៉ុន្តែជាមួយគ្នានេះតុលាការបែរជាបានបន្តក្តីតាមពាក្យបណ្តឹងរបស់លោកនាយករដ្ឋមន្រ្តី ហ៊ុន សែន។ លុះដល់ថ្ងៃច័ន្ទ ទី២២ ខែមិថុនានេះ លោកស្រី មូរ សុខហួរ តំណាងរាស្រ្តនៃគណបក្សសមរង្ស៊ីត្រូវបានរដ្ឋសភាសម្រេចលើកអភ័យឯកសិទ្ធិដែលជាការបើកផ្លូវឲ្យតុលាការកោះហៅលោកស្រីទៅសាកសួរពីរឿងក្តីនោះ៕