អ្នកនាំពាក្យគណបក្សប្រឆាំង លោក យឹម សុវណ្ណ បានបញ្ជាក់នៅថ្ងៃសៅរ៍ ទី២៦ ខែមិថុនានេះ ថា គណបក្ស សម រង្ស៊ី នៅប្រកាន់ជំហរដដែលថា គណបក្សនឹងមិនបង់លុយជំនួសតំណាងរាស្ត្រលោកស្រី មូរ សុខហួរ ដែលត្រូវបានតុលាការកំពូលតម្កល់សេចក្ដីសម្រេចរបស់តុលាការក្រុងភ្នំពេញ ឲ្យចាញ់ក្ដីករណីបរិហារកេរ្តិ៍លោក ហ៊ុន សែន ទេ។
ការបដិសេធរបស់លោក យឹម សុវណ្ណ ធ្វើឡើងបន្ទាប់ពីកាសែតក្នុងស្រុកមួយចំនួន រាយការណ៍ថា គណបក្ស សម រង្ស៊ី នឹងសងលុយជំនួសលោកស្រី មូរ សុខហួរ ដែលលោកស្រីធ្លាប់ប្រកាសកន្លងមកថា លោកស្រីនឹងចូលគុកជាជាងបង់លុយឲ្យតុលាការ។
លោក យឹម សុវណ្ណ បញ្ជាក់ថា គណបក្សទុកសិទ្ធិសម្រេចឲ្យលោកស្រី ថាតើលោកស្រីនឹងបង់លុយឲ្យតុលាការដែរឬទេ។ តុលាការបង្គាប់ឲ្យលោកស្រី មូរ សុខហួរ ត្រូវសងជំងឺចិត្តលោក ហ៊ុន សែន ចំនួន ៨លានរៀល និងសងការផាកពិន័យទៅរតនាគារជាតិចំនួន ៨លាន ៥សែនរៀល។
ទោះបីជាយ៉ាងណាក៏ដោយ លោក យឹម សុវណ្ណ បដិសេធមិនធ្វើអត្ថាធិប្បាយអំពីលទ្ធភាពនៅថ្ងៃក្រោយ ថាតើគណបក្សអាចបង់លុយឲ្យលោកស្រីឬទេ។
រតនាគាររាជធានីភ្នំពេញ កាលពីថ្ងៃទី១៧ ខែមិថុនានេះ បានដាក់កំហិតឲ្យលោកស្រី មូរ សុខហួរ បង់ប្រាក់ពិន័យចំនួន ៨លាន ៥សែនរៀល ឲ្យរតនាគារក្នុងរយៈពេល ២សប្ដាហ៍ចាប់ពីថ្ងៃជូនដំណឹង។ ប្រសិនបើលោកស្រីមិនបង់ប្រាក់ទេ រតនាគារនឹងអនុវត្តតាមច្បាប់។
មន្ត្រីរតនាគាររាជធានីភ្នំពេញសុំមិនបញ្ចេញឈ្មោះ បានឲ្យដឹងនៅថ្ងៃសៅរ៍ ទី២៦ ខែមិថុនានេះ ថា មានមន្ត្រីសង្គមស៊ីវិលបានយកលុយទៅបង់ជំនួសលោកស្រី មូរ សុខហួរ ប៉ុន្តែលោកប្រធានរតនាគាររាជធានីភ្នំពេញ កែ ប៊ុនឡេង បដិសេធមិនព្រមទទួលយកលុយនេះទេ ដោយអ្នកយកលុយមកបង់នេះ មិនបានយកមកជាមួយនូវឯកសារតុលាការ។
លោក កែ ប៊ុនឡេង បដិសេធមិនធ្វើអត្ថាធិប្បាយអំពីការបង់លុយនេះទេ នៅពេលអ្នកយកព័ត៌មានវិទ្យុអាស៊ីសេរីសាកសួរនៅថ្ងៃសៅរ៍ ទី២៦ ខែមិថុនានេះ។
លោក យឹម សុវណ្ណ មានប្រសាសន៍ថា គ្មានមន្ត្រីគណបក្សណាបានយកលុយទៅបង់នៅរតនាគាររាជធានីភ្នំពេញទេ។
មេធាវីលោកនាយករដ្ឋមន្ត្រី ហ៊ុន សែន លោក គី តិច មានប្រសាសន៍កាលពីថ្ងៃសៅរ៍ ទី២៦ ខែមិថុនានេះ ថា តុលាការ និងរតនាគារមិនអាចទទួលយកប្រាក់ផាកពិន័យពីបុគ្គលណាក្រៅពីលោកស្រី មូរ សុខហួរ ទេ ពីព្រោះករណីជាករណីព្រហ្មទណ្ឌ។ លោកថា លោក ស្រីអាចរកតំណាងមេធាវីណាម្នាក់ជំនួសលោកស្រីដើម្បីបង់លុយជួសគាត់។
លោកស្រី មូរ សុខហួរ កំពុងបំពេញបេសកកម្មនៅសហរដ្ឋអាមេរិក មិនអាចធ្វើការទាក់ទងបានទេ ប៉ុន្តែលោកស្រីធ្លាប់ថា លោកស្រីនឹងមិនបង់លុយផាកពិន័យរបស់តុលាការក្រុងភ្នំពេញទេ ពីព្រោះលោកស្រីជាជនរងគ្រោះ៕