ការថ្លែងដូច្នេះគឺបន្ទាប់ពីព្រះរាជអាជ្ញារងនៃតុលាការក្រុងភ្នំពេញ លោក សុខ រឿន បានសាកសួរលោកស្រីនិងមេធាវីរបស់លោកស្រីជាង៣ម៉ោងជុំវិញពាក្យបណ្តឹងរបស់លោក គី តិច មេធាវីរបស់លោកនាយករដ្ឋមន្រ្តី ហ៊ុន សែន ដែលបានប្តឹងលោកស្រីពីបទបរិហារកេរ្តិ៍។
លោកស្រី មូរ សុខហួរ មានប្រសាសន៍ដោយសុំឲ្យលោកនាយករដ្ឋមន្រ្តី ហ៊ុន សែន មកតទល់នៅចំពោះមុខតុលាការដូចគ្នា។
លោកស្រី មូរ សុខហួរ បានបញ្ជាក់ថា ៖ «ច្បាប់គេអត់មាននិយាយថា កាត់អ្នកតំណាងរាស្ត្ររបៀបណា? កាត់ប្រជាពលរដ្ឋរបៀបណា? កាត់នាយករដ្ឋមន្ត្រីរបៀបណាទេ? ខ្ញុំថា បើសិនជាយើងទទួលខុសត្រូវ សម្ដេចនាយកតែងតែមានប្រសាសន៍ថាលោកសឿង ដូច្នេះអញ្ជើញមកទាំងអស់គ្នាមក!»។
លោកស្រី មូរ សុខហួរ បានលើកឡើងទៀតថា លោកស្រីគ្មានការព្រួយបារម្ភចំពោះការព្យួរអភ័យឯកសិទ្ធិសភារបស់លោកស្រីនោះទេ ប៉ុន្តែលោកស្រីមានសំណូមពរទៅព្រះរាជអាជ្ញារង ដោយសុំឲ្យរកយុត្តិធម៌តាមប្រព័ន្ធតុលាការ។
លោកស្រី មូរ សុខហួរ បានថ្លែងថា ៖ «ខ្ញុំសុំឲ្យលោក គង់ សំអុន នៅតែជាមេធាវីរបស់ខ្ញុំដដែល។ បើសិនជាលោក គង់ សំអុន មិនមែនជាមេធាវីរបស់ខ្ញុំ ខ្ញុំមិនដឹងទៅរកមេធាវីពីណាមកទៀតទេ!»។
វិទ្យុអាស៊ីសេរីមិនអាចទាក់ទងដើម្បីសុំការបំភ្លឺពីលោក គី តិច មេធាវីរបស់លោកនាយករដ្ឋមន្រ្តី ហ៊ុន សែន បានទេនៅថ្ងៃទី៣ មិថុនានេះ។
រីឯព្រះរាជអាជ្ញារង លោក សុខ រឿន ក៏មិនបានធ្វើការអធិប្បាយជុំវិញបញ្ហាខាងលើនេះដែរ ដោយលោកថាជាប់រវល់ ប៉ុន្តែលោកបានបញ្ជាក់ថា លោកស្រី មូរ សុខហួរ បានឆ្លើយបំភ្លឺជូនលោកអស់ហើយ។
លោកស្រី មូរ សុខហួរ បានដាក់ពាក្យបណ្ដឹងទៅតុលាការក្រុងភ្នំពេញកាលពីថ្ងៃទី២៧ ខែមេសាកន្លងទៅ ប្តឹងលោកនាយករដ្ឋមន្ត្រី ហ៊ុន សែន ពីបទបរិហារកេរ្តិ៍ដោយទាមទារសំណងជំងឺចិត្តជាប្រាក់៥០០រៀល បន្ទាប់ពីលោកនាយករដ្ឋមន្ត្រីបានមានប្រសាសន៍នៅឯខេត្តកំពតកាលពីខែមេសាដោយចំហទាក់ទងនឹងស្រ្តីជើងខ្លាំងម្នាក់ពូកែរករឿងគេ រត់ទៅឱបគេសោះថាគេប្រឡេះឡេវអាវ។
ក្រោយពីលោកស្រី មូរ សុខហួរ បានប្តឹងលោកនាយករដ្ឋមន្រ្តី ហ៊ុន សែន គឺមេធាវីលោកនាយករដ្ឋមន្តី្រ ហ៊ុន សែន លោក គី តិច បានប្តឹងលោកស្រី មូរ សុខហួរ វិញដែរ ដោយទារជំងឺចិត្ត១០លានរៀល ហើយបន្ថែមពីនោះទៀត លោក គី តិច ក៏បានប្តឹងមេធាវីរបស់លោកស្រីថែមទៀតដោយទាមទារឲ្យគណៈមេធាវីបណ្តេញ លោក គង់ សំអុន ចេញពីគណៈមេធាវីដោយចោទថា លោក សំអុន បានការពារអ្នកនយោបាយនិងបានធ្វើសន្និសីទកាសែតជាមួយអ្នកនយោបាយ គឺបានរំលោភទៅលើក្រមសីលធម៌មេធាវី។
មេធាវីរបស់លោកស្រី មូរ សុខហួរ លោក គង់ សំអុន មានប្រសាសន៍ថា នៅក្នុងពាក្យបណ្តឹងរបស់លោក គី តិច គឺពុំមានចំណុចណាមួយបង្ហាញថា លោកបានធ្វើខុសនឹងវិជ្ជាជីវៈមេធាវីនោះទេ។
លោក គង់ សំអុន បានមានប្រសាសន៍ថា ៖ «មិនទាន់ឃើញមានការកោះហៅឬក៏អញ្ជើញភាគីចុងចោទដែលខ្ញុំបានប្ដឹងហ្នឹងឡើងមកឆ្លើយបំភ្លឺចំពោះមុខអយ្យការនៅឡើយទេ ប៉ុន្តែដោយឡែកក្នុងករណីដែលលោកមេធាវី គី តិច ប្ដឹងខ្ញុំនិងជំទាវ មូរ សុខហួរ យើងបានឡើងទៅបំភ្លឺរួចហើយ»។
សូមជម្រាបថា លោកស្រី មូរ សុខហួរ បានឲ្យដឹងទៀតថា មកទល់ពេលនេះតុលាការមិនទាន់ធ្វើការចោទប្រកាន់លោកស្រីនៅឡើយទេ គ្រាន់តែកោះហៅសាកសួរតែប៉ុណ្ណោះ៕