ការបដិសេធរបស់លោក ជាម យៀប ធ្វើឡើងក្រោយពីតំណាងរាស្ត្រគណបក្ស សម រង្ស៊ី ចំនួន ៤រូប បានស្នើឲ្យប្រធានសភាជាតិ លោក ហេង សំរិន បង្កើតគណៈកម្មការពិសេស ដើម្បីស្រាវជ្រាវមូលហេតុដែលនាំឲ្យមានការស្លាប់ និងរងរបួសនៅលើស្ពានពេជ្រ។
លោក ជាម យៀប បានមានប្រសាសន៍បន្តថា រដ្ឋសភាមិនចាំបាច់បង្កើតគណៈកម្មការបន្ថែមទៀតនោះទេ ពីព្រោះរដ្ឋាភិបាលកម្ពុជា បានបញ្ចប់ការស៊ើបអង្កេតរបស់ខ្លួនហើយ។
តំណាងរាស្រ្តគណបក្ស សម រង្ស៊ី បានបន្តទៀតថា គណៈកម្មការពិសេស ត្រូវមានការចូលរួមពីសមាសភាពតំណាងរាស្រ្តមកពីគ្រប់គណបក្សដែលមានអាសនៈក្នុងសភា រួមទាំងមន្រ្តីជំនាញ ដើម្បីស្រាវជ្រាវជាបន្ទាន់ពីការស្លាប់ពលរដ្ឋដ៏ច្រើនសន្ធឹកសន្ធាប់ ដើម្បីនាំយកមន្រ្តីអសមត្ថភាព និងគ្មានការទទួលខុសត្រូវ យកមកទទួលទោស និងជាមេរៀនដើម្បីចៀសវាងកុំឲ្យមានហេតុការណ៍ដ៏សែនអាក្រក់នេះកើតមានជាថ្មីទៀត។
លោកនាយករដ្ឋមន្ត្រី ហ៊ុន សែន កាលពីថ្ងៃច័ន្ទ ទី២៩ ខែវិច្ឆិកា បានប្រកាសទទួលស្គាល់កំហុសរដ្ឋាភិបាលក្នុងការធ្វេសប្រហែសរៀបចំសុវត្ថិភាពក្នុងពិធីបុណ្យអុំទូក ប៉ុន្តែលោកមិនបានឲ្យមន្រ្តីណាម្នាក់លាលែងចេញពីតំណែងដោយសារកំហុសនេះនោះទេ។
សូមស្ដាប់សេចក្ដីរាយការណ៍បន្ថែមដោយលោក យន់ សាមៀន ៖