លោក ជាម យៀប ប្រធានគណៈកម្មការសេដ្ឋកិច្ចហិរញ្ញវត្ថុរដ្ឋសភាកម្ពុជា នៅថ្ងៃសុក្រទី៦ សីហា បានព្រមានសហរដ្ឋអាមេរិកថា លោកនឹងផ្ដួចផ្ដើមគំនិតដើម្បីប្ដឹងទាមទារសំណងជំងឺចិត្ត ពីសហរដ្ឋអាមេរិកចំពោះការទម្លាក់គ្រាប់បែក និងបាចជាតិគីមីក្នុងទឹកដីកម្ពុជា ក្នុងអំឡុងសង្គ្រាមវៀតណាម ប្រសិនបើសហរដ្ឋអាមេរិកទាមទារបំណុលដែលកម្ពុជាជំពាក់ទាំងស្រុង ដែលមានចំនួនប្រមាណ៣០០លានដុល្លារ។
ការទាមទាររបស់លោក ជាម យៀប ធ្វើឡើងក្នុងគ្រាដែលកម្ពុជា និងសហរដ្ឋអាមេរិក កំពុងបន្តធ្វើការចរចាគ្នាដើម្បីរកចំណុចកណ្ដាលមួយ ក្នុងការសងបំណុលសហរដ្ឋអាមេរិក ដែលអាចឲ្យប្រទេសទាំងពីរនេះទទួលយកបានរៀងៗខ្លួន។
កាលពីថ្ងៃអង្គារ ទី៣ សីហា មន្ត្រីជាន់ខ្ពស់ស្ថានទូតសហរដ្ឋអាមេរិក លោក ថេត អាលេហ្រ្គា (Theodore Allegra) អនុប្រធានបេសកកម្មស្ថានទូតសហរដ្ឋអាមេរិក ប្រចាំកម្ពុជា បានប្រាប់វិទ្យុអាស៊ីសេរីថា កម្ពុជាបានជំពាក់បំណុលសហរដ្ឋអាមេរិកប្រមាណ៣០០លានដុល្លារ ដែលជាបំណុលរបស់រដ្ឋាភិបាលជំនាន់មុន។ លោកថា តាមច្បាប់អន្តរជាតិ កម្ពុជាមានភារកិច្ចសងបំណុលរបស់រដ្ឋាភិបាលចាស់ លោក លន់ នល់។
លោក ជាម យៀប បន្ថែមថា កម្ពុជាធ្លាប់បានស្នើឲ្យសហរដ្ឋអាមេរិកលុបចោលទាំងស្រុង ប្រយោជន៍ដើម្បីជាសំណងការខូចខាតរបស់កម្ពុជា ដោយសារកងទ័ពសហរដ្ឋអាមេរិកបានទម្លាក់គ្រាប់បែកក្នុងទឹកដីកម្ពុជា ក្នុងសង្គ្រាមវៀតណាម។
សង្គ្រាមវៀតណាមចាប់ផ្ដើមនៅឆ្នាំ១៩៥៥ ហើយបញ្ចប់នៅខែមេសា ឆ្នាំ១៩៧៥។ សហរដ្ឋអាមេរិកបានចូលរួមសង្គ្រាមវៀតណាមដើម្បីការពារកុំឲ្យវៀតណាមកុម្មុយនិស្តខាងជើង ផ្ដួលរំលំរដ្ឋាភិបាលវៀតណាមខាងត្បូង។ កាលពីឆ្នាំ១៩៦៥ សហរដ្ឋអាមេរិកបានចាប់ផ្ដើមប្រតិបត្តិការសឹកតាមព្រំដែន។ ដោយសារប្រតិបត្តិការសឹកនេះ កម្ពុជា និងឡាវ ត្រូវបានទម្លាក់គ្រាប់បែកយ៉ាងខ្លាំង។
លោក ថេត អាលេហ្រ្គា (Theodore Allegra) មានប្រសាសន៍ថា បច្ចុប្បន្ននេះ កម្ពុជា និងសហរដ្ឋអាមេរិកកំពុងបន្តការពិភាក្សាគ្នាដើម្បីជម្រះបំណុលនេះ។ ប៉ុន្តែប្រទេសទាំងពីរនៅមិនទាន់ឈានដល់ការព្រមព្រៀងគ្នាមួយ ក្នុងការសងបំណុលនេះនៅឡើយទេ។
លោក ជាម យៀប បានបន្ថែមថា សហរដ្ឋអាមេរិកគួរយកគំរូតាមអង្គការមូលនិធិរូបិយវត្ថុអន្តរជាតិ (IMF) កាលពីឆ្នាំ២០០៥ បានលុបបំណុលកម្ពុជាប្រមាណ៨២លានដុល្លារ ដើម្បីអភិវឌ្ឍប្រព័ន្ធធារាសាស្ត្រកម្ពុជា។ ប្រទេសចិន និងហុងគ្រី ក៏បានលុបបំណុលកម្ពុជាចោលផងដេរ។
បច្ចុប្បន្ននេះ កម្ពុជាជំពាក់បំណុលបរទេសប្រមាណ៤ពាន់លានដុល្លារសហរដ្ឋអាមេរិក។ ប្រទេសម្ចាស់បំណុលសំខាន់ រួមមានសហរដ្ឋអាមេរិក អតីតសហភាពសូវៀត ជប៉ុន និងកូរ៉េ៕