កិច្ចប្រជុំនេះ ធ្វើឡើងមួយថ្ងៃ បន្ទាប់ពីមានការប៉ុនប៉ងដាក់បំផ្ទុះគ្រាប់បែកផ្ដាច់ស្ពានមួយមិនបានសម្រេច នៅតាមផ្លូវជាតិលេខ៤ ក្បែរភ្នំពេជ្រនិល។
អគ្គស្នងការនគរបាលជាតិ លោកនាយឧត្តមសេនីយ៍ នេត្រ សាវឿន បានបញ្ជាឲ្យនគរបាលជាតិបើកការស៊ើបអង្កេតជាបន្ទាន់មួយ និងដោយម៉ត់ចត់ ជុំវិញការបំផ្ទុះគ្រាប់បែកច្នៃ កាលពីយប់ថ្ងៃទី២៩ ខែសីហា កន្លងទៅនេះ នៅឯស្ពានអូកាគី នៅឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។
ការបំផ្ទុះនោះ បណ្ដាលឲ្យខូចខាតស្ពានតិចតួច និងត្រូវបានជួសជុលវិញ។
ប្រធាននាយកដ្ឋានកណ្ដាលនគរបាលយុត្តិធម៌ លោកឧត្តមសេនីយ៍ឯក ម៉ក់ ជីតូ បានមានប្រសាសន៍ប្រាប់អ្នកកាសែត នៅថ្ងៃទី៣១ ខែសីហា ថា សមត្ថកិច្ចចម្រុះកំពុងតែអនុវត្តតាមបទបញ្ជាដោយម៉ត់ចត់៖ «រឿងនេះជារឿងមួយដែលពាក់ព័ន្ធករណីធ្ងន់ធ្ងរដែរ។ អ៊ីចឹង កម្លាំងចម្រុះចាប់តាំងពីកងកម្លាំងប្រដាប់អាវុធ នគរបាល កងរាជអាវុធហត្ថ ក៏ដូចជាប្រតិបត្តិការសឹក ប្រតិបត្តិការសឹករង បានចូលរួមគ្នា ដើម្បីស្រាវជ្រាវករណីនេះ ក្រោមការដឹកនាំរបស់ព្រះរាជអាជ្ញាខេត្តកំពង់ស្ពឺ។ ឥឡូវនេះ យើងប្រមែប្រមូលវត្ថុតាង ធ្វើការងារបច្ចេកទេសហើយ ហើយកំណត់បានមុខសញ្ញាមួយចំនួនដែលកំពុងតែធ្វើការតស៊ូ»។
វត្ថុតាងដែលសមត្ថកិច្ចចម្រុះប្រមូលបាននៅកន្លែងកើតហេតុ មានដូចជា គ្រាប់បែកច្នៃដែលមិនទាន់ផ្ទុះ និងបំណែកគ្រាប់បែកច្នៃដែលបានផ្ទុះហើយ និងវត្ថុតាងមួយចំនួនទៀត។
ប្រជាពលរដ្ឋនៅខេត្តកំពង់ស្ពឺ ឈ្មោះ រត្ន័ សារឿន អាយុ៤៩ឆ្នាំ បាននិយាយថា លោកសុំឲ្យសមត្ថកិច្ចនគរបាល វែកមុខជនសង្ស័យមកផ្ដន្ទាទោស៖ «រាល់ជនល្មើសទាំងអស់ដែលធ្វើឲ្យបង្កអសន្តិសុខនៅក្នុងមូលដ្ឋាន អ៊ីចឹង គួរតែផ្ដន្ទាទោសទៅតាមច្បាប់ ដែលមានកំពុងតែអនុវត្តន៍ជាធរមាន មូលហេតុថាមានជនដែលបង្កភាពអានាធិបតេយ្យ អសន្តិសុខ ធ្វើឲ្យប្រជាពលរដ្ឋមានការភ័យខ្លាច»។
សមត្ថកិច្ចចម្រុះ ជាពិសេសនគរបាលជាតិ បានកំណត់មុខសញ្ញាជនសង្ស័យរួចហើយ ដើម្បីតាមចាប់ខ្លួន ប៉ុន្តែមន្ត្រីជាន់ខ្ពស់នគរបាលជាតិ បានសុំរក្សាការសំងាត់ នៃមុខសញ្ញាជនសង្ស័យនោះ កុំឲ្យប៉ះពាល់ដល់ការស៊ើបអង្កេត។
សមត្ថកិច្ចចម្រុះកំពុងតែតាមចាប់ខ្លួនជនសង្ស័យនោះ ក្រោមបទបង្កឲ្យមានការភិតភ័យ និងបង្កឲ្យមានភាពចលាចលនៅក្នុងសង្គម។
ការបំផ្ទុះគ្រាប់បែកនៅយប់ថ្ងៃទី២៩ ខែសីហា កន្លងទៅនេះ គឺមុនពេលដែលព្រះមហាក្សត្រ ព្រះបាទសម្ដេចព្រះបរមនាថ នរោត្តម សីហមុនី បានយាងទៅស្រុកភ្នំស្រួច ខេត្តកំពង់ស្ពឺ កាលពីថ្ងៃទី៣០ ខែសីហា កន្លងទៅនេះ។
ប្រធាននាយកដ្ឋានកណ្ដាលនគរបាលយុត្តិធម៌ លោកឧត្តមសេនីយ៍ឯក ម៉ក់ ជីតូ ឲ្យដឹងថា កន្លងមកនេះ មានករណីបាត់ឈ្នួនផ្ទុះ និងរំសេវចំនួន៣លើក ពីឃ្លាំងនៅខេត្តកំពង់ស្ពឺ ខេត្តព្រះសីហនុ និងខេត្តពោធិ៍សាត់។
ប៉ុន្តែករណីបាត់នៅខេត្តកំពង់ស្ពឺ កន្លងទៅនេះ នគរបាលបានចាប់ខ្លួនជនសង្ស័យម្នាក់ ដែលបានលួចគ្រឿងផ្ទុះនោះ និងប្រមូលបានគ្រឿងផ្ទុះមករក្សាទុកវិញ ហើយនគរបាលនៅតែបន្តស្វែងរកចាប់ខ្លួនជនសង្ស័យចំនួន២នាក់ទៀត។
ថ្មីៗនេះ នគរបាលនៅខេត្តព្រះសីហនុ បានចាប់ខ្លួនជនសង្ស័យជួញដូរគ្រាប់រំសេវចំនួន១២នាក់ និងបានរឹបអូសយកឈ្នួនផ្ទុះចំនួន១៦៥៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។