អគ្គលេខាធិការនៃគណៈកម្មាធិការជាតិរៀបចំការបោះឆ្នោត លោក ទេព នីថា មានប្រសាសន៍ដូច្នេះ នៅថ្ងៃ៧ ខែកញ្ញា ឆ្នាំ២០១០ ៖ «ការងារសំខាន់ គឺអ្នកមានឈ្មោះក្នុងបញ្ជីបោះឆ្នោត សុំមេត្តាទៅពិនិត្យមើលឈ្មោះរបស់ខ្លួន ក្នុងករណីមានទិន្នន័យមិនត្រឹមត្រូវ គឺសុំកែតម្រូវ ហើយបងប្អូនប្រជាពលរដ្ឋដែលទៅចុះឈ្មោះថ្មី អ្នកមិនទាន់បានចុះឈ្មោះក៏អញ្ជើញទៅចុះឈ្មោះ។អ្នកដែលចុះឈ្មោះនៅឃុំសង្កាត់ផ្សេង ក៏សុំមេត្តារាយការណ៍ពីឈ្មោះនៅឃុំសង្កាត់ចាស់ ដើម្បីលុបចេញពីបញ្ជីបោះឆ្នោត»។
លោក ទេព នីថា បានឲ្យដឹងទៀតថា នៅក្នុងឆ្នាំ២០១០ អ្នកមានអាយុពី ១៨ឆ្នាំឡើង ចំនួនជាង ៣១ម៉ឺននាក់ នឹងត្រូវចុះឈ្មោះក្នុងបញ្ជីបោះឆ្នោតថ្មី។
លោក ទេព នីថា បានបញ្ជាក់ថា ៖ «តាមរយៈលេខាធិការដ្ឋានខែត្រ រាជធានី រៀបចំការបោះឆ្នោត យើងសុំឲ្យក្រុមប្រឹក្សាឃុំសង្កាត់ មានមេឃុំ និងស្មៀននេះ ធ្វើការស្រង់ស្ថិតិប្រជាពលរដ្ឋរួមនៅក្នុងឃុំសង្កាត់របស់គាត់ហ្នឹង អ្នកដែលផ្លាស់ប្ដូរទីលំនៅចេញ អ្នកគ្រប់អាយុបោះឆ្នោត អ្នកទទួលមរណភាព។ សំខាន់ យើងត្រៀមសម្រាប់បម្រើការពិនិត្យបញ្ជីឈ្មោះ និងចុះឈ្មោះបោះឆ្នោត»។
លោក ទេព នីថា ឲ្យដឹងថា ចំនួនការិយាល័យបោះឆ្នោតឆ្នាំ២០១០ ប៉ាន់ប្រមាណ ១៧.៣២៣ការិយាល័យ កើនឡើង ៧៨០ លើសឆ្នាំមុន ព្រោះតែកំណើនអ្នកចុះឈ្មោះថ្មី ដែលមានអាយុចាប់ពី ១៨ឆ្នាំឡើងទៅ។ លោកបន្តថា ចំពោះអ្នកដែលបានប្ដូរទីលំនៅ ត្រូវទៅលុបឈ្មោះរបស់ខ្លួនពីក្នុងបញ្ជីបោះឆ្នោតចាស់ ហើយត្រូវទៅសុំចុះឈ្មោះនៅក្នុងកន្លែងស្នាក់នៅថ្មី។ លោកថា ការទៅលុបឈ្មោះរបស់ខ្លួនពីបញ្ជីចាស់នេះ គឺដើម្បីការពារតួលេខប៉ោងឡើងនៃចំនួនឈ្មោះស្ទួនក្នុងបញ្ជីបោះឆ្នោត។
ពាក់ព័ន្ធការអំពាវនាវរបស់គណៈកម្មាធិការជាតិរៀបចំការបោះឆ្នោត ឲ្យប្រជាជនទៅពិនិត្យបញ្ជីឈ្មោះ និងទៅចុះឈ្មោះបោះឆ្នោតនោះ ប្រជាជនដែលបានធ្វើចំណាកស្រុកពីខេត្តកំពង់ចាម ស្រុកព្រៃឈរ មករកស៊ី និងស្នាក់នៅបណ្ដោះអាសន្ននៅភ្នំពេញ លោក នួន ហេង បានឲ្យដឹងថា កាលពីបោះឆ្នោតលើកមុន គាត់ជាប់រវល់មិនអាចត្រឡប់ទៅស្រុកបោះឆ្នោតទាន់ពេល ធ្វើឲ្យគាត់ និងក្រុមគ្រួសារបាត់បង់សំឡេងឆ្នោត។ គាត់ចង់ឲ្យ គ.ជ.ប. សម្រួលការចុះឈ្មោះបោះឆ្នោតថ្មីនៅកន្លែងគាត់កំពុងស្នាក់នៅ ៖ «បើថា យើងនៅកន្លែងណា រកស៊ីកន្លែងណា ចុះឈ្មោះត្រង់នោះទៅ!»។
ឆ្លើយតបបញ្ហានេះ លោក កែវ ផល្លា ប្រធាននាយកដ្ឋានសេវាកម្មច្បាប់ និងវិវាទកម្មនៃគ.ជ.ប. បានប្រាប់ថា អ្នកចំណាកស្រុកទាំងឡាយអាចចុះឈ្មោះនៅកន្លែងស្នាក់នៅថ្មីបាន ដោយត្រូវមានឯកសារដើម្បីសុំចុះឈ្មោះ មានដូចជា ៖ «បើច្បាស់លាស់ថា គាត់ស្នាក់នៅក្នុងឃុំសង្កាត់ណាហើយ គាត់មានតែឯកសារបញ្ជាក់តែអត្តសញ្ញាណ ឧទាហរណ៍ដូចជាអត្តសញ្ញាណប័ណ្ណ គាត់ភ្ជាប់តែជាមួយលិខិតបញ្ជាក់ទីលំនៅនោះទៅ នោះគាត់ចុះឈ្មោះថ្មីបានហើយ! គាត់ប្រាប់គេផងថា គាត់មានឈ្មោះក្នុងបញ្ជីបោះឆ្នោតនៅឃុំសង្កាត់ណាមួយរួចហើយ»។
គណៈកម្មាធិការជាតិរៀបចំការបោះឆ្នោត (គ.ជ.ប.) គ្រោងធ្វើសន្និសីទសារព័ត៌មាននៅព្រឹកថ្ងៃ៩ ខែកញ្ញាខាងមុខ ដើម្បីផ្សព្វផ្សាយតារាងស្ថិតិប្រជាពលរដ្ឋដែលមានកន្លងមក និងផ្សាយអំពីចំនួនប៉ាន់ស្មាននៃការិយាល័យបោះឆ្នោត និងប្រាប់ទៅអង្គការនានាដែលចង់ចុះឈ្មោះអ្នកសង្កេតការណ៍របស់ខ្លួន និងគណបក្សនយោបាយចង់ចុះឈ្មោះតំណាងរបស់គេ៕