ការស្នើសុំលុបបញ្ជីឈ្មោះបោះឆ្នោតឆ្នាំ ២០១០ មន្ត្រីបក្សប្រឆាំងយល់ថា មានឈ្មោះស្ទួនរាប់សិបម៉ឺននាក់ ដែល គ.ជ.ប មិនបានលុបចេញពីបញ្ជីឈ្មោះបោះឆ្នោតឆ្នាំ ២០១០។
នៅព្រឹកថ្ងៃសុក្រទី ១៥ ខែកក្កដា លោក គួយ ប៊ុនរឿន សមាជិកសភាមកពីគណបក្ស សម រង្ស៊ី មានប្រសាសន៍ក្នុងសន្និសីទកាសែត នាទីស្ដីការគណៈកម្មាធិការបោះឆ្នោតជាតិ ហៅកាត់ថា គ.ជ.ប បានទទូចស្នើសុំទៅថ្នាក់ដឹកនាំ គ.ជ.ប ឲ្យបង្កើតបញ្ជីឈ្មោះថ្មីឡើងវិញនៅឆ្នាំ ២០១១ ដើម្បីឲ្យការបោះឆ្នោតជ្រើសរើសក្រុមប្រឹក្សាឃុំសង្កាត់ នៅឆ្នាំ ២០១២ ខាងមុខមានភាពប្រសើរ។
លោក គួយ ប៊ុនរឿន មានប្រសាសន៍បន្ថែម ៖ «បញ្ជីបោះឆ្នោតរបស់យើងបច្ចុប្បន្ននេះ មិនមានសុចរិតភាព និងមិនមានតម្លាភាពនោះទេ។ ឈ្មោះប៉ោងនៅតែដដែលច្រើនណាស់។ អ៊ីចឹងថ្ងៃនេះ ចង់សួរគណៈកម្មាធិការជាតិរៀបចំការបោះឆ្នោតថា តើមានយន្តការទេក្នុងការសំអាតបញ្ជីឲ្យបានស្អាត ថាមានប៉ុន្មានម៉ឺននាក់ តាមរបាយការណ៍លើកមុន គឺថាមិនតិចជាង ៤០ ម៉ឺននាក់ទេ អ្នកដែលមានឈ្មោះស្ទួននៅក្នុងបញ្ជីឈ្មោះអ្នកបោះឆ្នោត»។
បន្ថែមលើនេះ សមាជិកសភាបក្ស សម រង្ស៊ី ក៏បានស្នើទៅ គ.ជ.ប និងក្រសួងមហាផ្ទៃ ឱ្យពន្លឿនសកម្មភាពផ្ដល់ជូនឯកសារជូនពលរដ្ឋ ដែលកាន់អត្តសញ្ញាណប័ណ្ណផុតកំណត់ប្រើប្រាស់ហើយបានស្នើសុំបន្តសុពលភាព ឬពន្យារពេល ធ្វើយ៉ាងណាឲ្យក្រសួងមហាផ្ទៃ ឬស្ថាប័នពាក់ព័ន្ធ ត្រូវផ្ដល់ជូនពលរដ្ឋឲ្យបានឆាប់។
ឆ្លើយតបមន្ត្រីបក្សប្រឆាំង លោក អ៊ឹម សួស្ដី ប្រធាន គ.ជ.ប មានប្រតិកម្មថា មិនមានឈ្មោះស្ទួនរហូតដល់រាប់សិបម៉ឺននាក់មាននៅក្នុងបញ្ជីឈ្មោះអ្នកបោះឆ្នោតឆ្នាំ ២០១០ ដូចមន្ត្រីបក្សប្រឆាំងលើកឡើងនោះទេ។
លោកបន្តថា ចំពោះការលុបឈ្មោះអ្នកមានសិទ្ធិបោះឆ្នោតណាម្នាក់ចេញពីបញ្ជីឈ្មោះបោះឆ្នោត លោក អ៊ឹម សួស្ដី បញ្ជាក់ថា មិនមែន គ.ជ.ប នឹកឃើញលុបក៏លុបតាមទំនើងចិត្តនោះទេ គឺទាមទារឲ្យមានឯកសារបញ្ជាក់អត្តសញ្ញាណបានច្បាស់លាស់ ដើម្បីជៀសវាងការបាត់ឈ្មោះពលរដ្ឋមានសិទ្ធិបោះឆ្នោតពីបញ្ជីឈ្មោះអ្នកបោះឆ្នោត។
លោក អ៊ឹម សួស្ដី ៖ «ឥឡូវនេះយើងខំពង្រឹងការលុបឈ្មោះ ហើយការលុបឈ្មោះនេះ វាទាមទារឯកសារ។ តែបើអត់ឯកសារគឺលុបមិនបានទេ។ ដូច្នេះ ឈ្មោះវាអាចមានប៉ោងខ្លះហើយ។ វាប៉ោងខ្លះវាប្រសើរជាងការលុបច្រឡំឈ្មោះរបស់គេ។ ឥឡូវយើងធ្វើការជ្រើសរើសទៅ ឬមួយត្រូវលុបធ្វើឲ្យប៉ះឈ្មោះរបស់គេ ឬមួយត្រូវទុកឲ្យវាប៉ោង តើយើងរើសផ្លូវណា គឺត្រូវទុកឈ្មោះហ្នឹងសិនហើយ ជៀសវាងយើងលុបទៅប៉ះឈ្មោះរបស់គេ ឬបាត់ឈ្មោះរបស់គេ»។
លោក អ៊ឹម សួស្ដី ទទួលស្គាល់ថា បើទោះជាការធ្វើបច្ចុប្បន្នភាពបញ្ជីឈ្មោះអ្នកបោះឆ្នោតជារៀងរាល់ឆ្នាំ គ.ជ.ប ធ្វើមិនបានល្អមួយរយភាគរយក៏ពិតមែន ក៏ប៉ុន្តែ សកម្មភាពនេះ មិនអាក្រក់ដូចសមាជិកសភាមកពីគណបក្ស សម រង្ស៊ី លើកឡើងនោះទេ។
ទាក់ទងនឹងបញ្ហានេះដែរ មន្ត្រីសង្គមស៊ីវិលធ្វើការពាក់ព័ន្ធការងារបោះឆ្នោតមួយចំនួននៅកម្ពុជា ក៏បានអះអាងដូចៗ គ្នាថា ការធ្វើបច្ចុប្បន្នភាពបញ្ជីឈ្មោះអ្នកបោះឆ្នោត ឬក៏ចុះឈ្មោះអ្នកបោះឆ្នោត គ.ជ.ប ធ្វើមិនទាន់បានល្អនោះទេ ជាពិសេសបានបង្កផលលំបាកដល់ពលរដ្ឋ ដែលបានផ្លាស់ប្ដូរលំនៅ មិនអាចទៅចុះឈ្មោះបោះឆ្នោតបាន ដោយមន្ត្រីចុះបោះឆ្នោតបានសួរនាំរកឯកសារមានភាពសាំញ៉ាំ ដែលនាំឲ្យពលរដ្ឋភាគច្រើនខកខានមិនបានទៅចុះឈ្មោះបោះឆ្នោតឲ្យបានគ្រប់គ្នា។
មន្ត្រី គ.ជ.ប បានឲ្យដឹងថា ការពិនិត្យ និងការចុះឈ្មោះបោះឆ្នោតឆ្នាំ ២០១១ នឹងចាប់ផ្ដើមពីថ្ងៃទី១ ខែកញ្ញាតទៅ។ រីឯការបោះឆ្នោតរើសសមាជិកក្រុមប្រឹក្សាឃុំ សង្កាត់ នឹងប្រព្រឹត្តទៅនៅថ្ងៃទី៣ ខែមិថុនា ឆ្នាំ ២០១២។
រីឯការបោះឆ្នោតរើសសមាជិកព្រឹទ្ធសភា នឹងប្រព្រឹត្តទៅនៅថ្ងៃទី ២៩ ខែមករា ឆ្នាំ ២០១២ និងការបោះឆ្នោតជ្រើសរើសតំណាងរាស្ត្រនីតិកាលទី ៥ នឹងប្រព្រឹត្តទៅនៅថ្ងៃទី ២៨ ខែកក្កដា ឆ្នាំ ២០១៣៕