លោក ផៃ ស៊ីផាន រដ្ឋលេខាធិការនិងជាអ្នកនាំពាក្យទីស្តីការគណៈរដ្ឋមន្រ្តី បានមានប្រសាសន៍ថា នៅពេលនេះគេមិនអាចនិយាយអ្វីបានច្បាស់លាស់អំពីពេលវេលាក្នុងការចរចាអំពីបញ្ហាព្រំដែនជាមួយនឹងប្រទេសថៃនោះឡើយ។
លោក ផៃ ស៊ីផាន បានឲ្យដឹងថា ៖ «សមត្ថកិច្ចក្នុងការតំណាងហ្នឹងគឺត្រូវរអាក់រអួល គឺដោយសាររាជរដ្ឋាភិបាលថៃជួបនឹងឧបសគ្គផ្លាស់ប្ដូរនាយករដ្ឋមន្ត្រី។ ការជ្រើសរើសនាយករដ្ឋមន្ត្រីថ្មីនេះហើយដែលជាឧបសគ្គ»។
លោក ផៃ ស៊ីផាន ក៏បានថ្លែងដែរថា ទោះជាយ៉ាងណាក៏ដោយនៅពេលនេះមិនមានការប្រឈមមុខផ្នែកយោធាណាមួយបានកើតឡើងនៅតាមព្រំដែននោះទេ។
លោក ផៃ ស៊ីផាន បានមានប្រសាសន៍ថា ៖ «មិនមានអីចាប់អារម្មណ៍ ក្រៅពីយើងឃើញមានការសម្របសម្រួលបន្ទាប់ពីប្រជុំនៅសៀមរាបកន្លងទៅនេះ»។
គួរបញ្ជាក់ថា កិច្ចចរចារវាងប្រទេសកម្ពុជានិងថៃទាក់ទងទៅនឹងទំនាស់ព្រំដែនបានកើតមានឡើងក្រោយពីមានកងទ័ពថៃត្រូវបានចោទប្រកាន់ថា បានចូលលុកលុយប្រទេសកម្ពុជានៅតំបន់ព្រំដែនក្បែរប្រាសាទព្រះវិហារ កាលពីថ្ងៃទី១៥ ខែកក្កដាកន្លងទៅនេះ និងតំបន់ផ្សេងៗទៀតជាច្រើនកន្លែងនៅតាមព្រំដែនជាបន្តបន្ទាប់ ដែលបញ្ហានេះបានបង្កើតឲ្យមានការប្រឈមមុខដាក់គ្នាផ្នែកយោធា និងរហូតដល់មានការវាយប្រយុទ្ធគ្នារវាងកងទ័ពប្រទេសទាំងពីរដែលបណ្តាលឲ្យស្លាប់និងរបួសមនុស្សជាច្រើននាក់ កាលពីថ្ងៃទី១៥ ខែតុលាកន្លងទៅ។
នៅក្នុងរឿងនេះដែរ ថ្វីត្បិតតែមានការចរចាជាច្រើនលើករវាងមន្រ្តីប្រទេសទាំងពីរ ប៉ុន្តែនៅមិនទាន់បានសម្រេចការព្រមព្រៀងគ្នាក្នុងការដកកងទ័ពទាំងស្រុងចេញពីតំបន់ព្រំដែនប្រទេសទាំងពីរ និងធ្វើឲ្យស្ថានភាពវិលទៅរកភាពប្រក្រតីដូចមុនថ្ងៃទី១៥ កក្កដានោះនៅឡើយទេ។ ហើយគម្រោងការចរចាជាមួយប្រទេសថៃនៅខែធ្នូនេះក៏ត្រូវបានលុបចោលជាថ្មីទៀតដោយសារតែសភាពការណ៍នយោបាយនៅប្រទេសថៃ។
នៅពេលនេះលោកនាយករដ្ឋមន្រ្តី ស៊ុមឆៃ វង់សាវ៉ាត់ ដែលទើបតែចូលកាន់តំណែងបានប៉ុន្មានខែឥឡូវនេះត្រូវបានទម្លាក់ពីតំណែងដោយស្វ័យប្រវត្តិទៅហើយ ដោយសារតែតុលាការធម្មនុញ្ញថៃបានសម្រេចរំលាយគណបក្សរបស់លោក និងគណបក្សពីរផ្សេងទៀតដែលជាដៃគូក្នុងរដ្ឋាភិបាលកាលពីថ្ងៃអង្គារកន្លងទៅនេះ។
លោក ខៀវ កាញារីទ្ធ អ្នកនាំពាក្យរដ្ឋាភិបាលខ្មែរបានថ្លែងថា ទោះជាយ៉ាងណាក៏ដោយការបញ្ចៀសនូវសង្រ្គាមរវាងប្រទេសទាំងពីរអំពីបញ្ហាព្រំដែននោះគឺជារឿងដ៏ល្អ។
លោក ខៀវ កាញារីទ្ធ បានមានប្រសាសន៍ថា ៖ «ព្រះវិហារ ខ្ញុំនិយាយម្ដងហើយថា ការពារព្រំដែនជាបញ្ហាផ្ទៃប្រទេសទេដំបូង ប៉ុន្តែអាស្រ័យដោយគណបក្សប្រឆាំងថៃជំរុញរឿងនេះទៅជារឿងនយោបាយ អ៊ីចឹងគិតថាវាអាចយូរបន្តិចហើយ។ ដូចខ្ញុំបាននិយាយអ៊ីចឹង បញ្ហានេះវា១០០ឆ្នាំហើយ អ៊ីចឹងមួយឆ្នាំពីរក៏ទុកអ៊ីចឹងសិនចុះ សំខាន់គឺចៀសផុតអំពីការប្រឈមមុខដោយអាវុធ»៕