សេចក្តីបដិសេធនេះបានធ្វើឡើងបន្ទាប់ពីវិទ្យុអាស៊ីសេរីបានផ្សាយកាលពីខែឧសភាកន្លងមកនេះថា មានបុរសម្នាក់នៅក្នុងភូមិត្រពាំងកក់ ឃុំពោធិ៍អង្គ្រង ស្រុកបរសេដ្ឋ ខេត្តកំពង់ស្ពឺ បានស្លាប់ដោយការខ្វះជីវជាតិឬខ្វះអាហារទទួលទានដោយសារក្រុមគ្រួសារនោះក្រីក្រខ្លាំងពេក។
លិខិតស្រាយបំភ្លឺដដែលដោយមានចុះហត្ថលេខារបស់លោក កង ហ៊ាង អភិបាលខេត្តកំពង់ស្ពឺ ភ្ជាប់ដោយរបាយការណ៍ស្រាវជ្រាវលម្អិតបានបញ្ជាក់ថា បុរសនោះបានស្លាប់ដោយសារជំងឺទាចទឹករ៉ាំរ៉ៃដែលបានកើតចំនួន២ឆ្នាំមកហើយ។
របាយការណ៍ស្រាវជ្រាវរបស់មន្ត្រីរដ្ឋាភិបាលដដែលនេះបានបញ្ជាក់ទៀតថា ក្រុមមន្ត្រីគណបក្សប្រជាជនកម្ពុជាបានដឹកនាំយកអង្ករទៅជូនប្រជាពលរដ្ឋក្រីក្រនិងទៅដល់ក្រុមគ្រួសារនោះ ហើយសរសេរបញ្ជាក់ទទួលស្គាល់ថាក្រុមគ្រួសារនោះក្រីក្រមែន។
គួរជម្រាបជូនថា វិទ្យុអាស៊ីសេរីដែលបានចុះសម្ភាសន៍ផ្ទាល់និងបានផ្សព្វផ្សាយកាលពីថ្ងៃទី១២ ឧសភាកន្លងមក បានដកស្រង់សម្ដីរបស់ភរិយាបុរសម្នាក់ឈ្មោះ មាន គា ដែលបានស្លាប់ បានថ្លែងអះអាងថា ក្រុមគ្រួសាររបស់អ្នកស្រីក្រីក្រណាស់ ជួនកាលមិនមានអាហារបរិភោគគ្រប់គ្រាន់ឲ្យគ្រប់ជីវជាតិនោះទេ និងគ្មានថ្នាំព្យាបាលឡើយនៅពេលមានជំងឺ។ កសិកររូបនេះបានបញ្ជាក់ថា កត្តាទាំងនោះដែលនាំឲ្យប្តីអ្នកស្រីស្លាប់៕