កម្លាំងនគរបាលចរាចរផ្លូវគោកបានអះអាងថា ករណីគ្រោះថ្នាក់ចរាចរណ៍ក្នុងអំឡុងពិធីបុណ្យចូលឆ្នាំខ្មែរនេះ គឺមានការកើនឡើងជាងឆ្នាំមុនប្រៀបធៀបរយៈពេលដូចគ្នា។
ប្រធានផ្នែកវាស់វែងគ្រោះថ្នាក់ចរាចរណ៍រាជធានីភ្នំពេញ លោក សេង ចាន់ថន មានប្រសាសន៍នៅ ថ្ងៃទី១៤ មេសា ថា នៅក្នុងថ្ងៃទី១នៃការប្រារព្ធពិធីបុណ្យចូលឆ្នាំខ្មែរចំថ្ងៃទី ១៣មេសា នោះ សម្រាប់ទីក្រុងភ្នំពេញមានករណីគ្រោះថ្នាក់ចរាចរណ៍ចំនួន៤ករណី។ លោកថា ករណីនេះ បានបង្កឲ្យមនុស្សម្នាក់ស្លាប់ ៧នាក់របួសធ្ងន់និងម្នាក់របួសស្រាល ៖ "យើងពិនិត្យទៅឃើញថាឆ្នាំមុន បើយើងប្រៀបធៀបរហូតបីថ្ងៃ មានករណីគ្រោះថ្នាក់តែ៦លើកទេ នេះមួយថ្ងៃរហូត៤លើកហើយ អ៊ីចឹងគ្រោះថ្នាក់នេះវាកើនឡើង ជាងឆ្នាំទៅ។ ប៉ូលិសក៏បាន ចល័តសម្រួលចរាចរណ៍នៅក្នុងគោលដៅផង និងចល័តមើលចំណុចសំខាន់ៗ ដែលមានការកកស្ទះ ហើយចុះសម្រួលចរាចរណ៍ហើយឲ្យគាត់ធ្វើដំណើរទៅឲ្យបានសុវត្ថិភាព។ ការដាក់សំពីងសំពោងមនុស្សនៅ លើដំបូលអីយើងណែនាំគាត់ឲ្យចុះអង្គុយមានសណ្ដាប់ធ្នាប់"។
ចំណែកមន្ត្រីអង្គការមិនមែនរដ្ឋាភិបាល ដែលធ្វើការឃ្លាំមើលករណីគ្រោះថ្នាក់ចរាចរណ៍ក្នុងឱកាសពិធីបុណ្យចូលឆ្នាំថ្មីប្រពៃណីខ្មែរ បានរកឃើញថា សម្រាប់ថ្ងៃទី១ក្នុងពិធីបុណ្យចូលឆ្នាំខ្មែរនេះ មាន គ្រោះថ្នាក់ចរាចរណ៍ចំនួន៦០ករណី បានកើតឡើងនៅទីកន្លែងខុសៗគ្នា នៅទូទាំងប្រទេស។
ប្រធានមជ្ឈមណ្ឌលវប្បធម៌ជាតិ និងសីលធម៌សង្គម លោក ប៉ូ សំណាង ថ្លែងថា ពីចំណុចផ្លូវជាតិលេខ១ដល់ផ្លូវជាតិលេខ៦ មានគ្រោះថ្នាក់ចរាចរណ៍ចំនួន៦០ករណីដែលក្រុមការងាររបស់លោកបានទទួលទូរស័ព្ទហៅចូលឲ្យជួយអន្តរាគមន៍ពីប្រជាពលរដ្ឋ នឹងអ្នកដែលបានរងគ្រោះដោយគ្រោះថ្នាក់ចរាចរណ៍នៅតាមដងផ្លូវ ៖ "នេះជាកម្មវិធីថ្មីដែលយើងចាំស្រង់ស្ថិតិនិងរបាយការណ៍ពីបងប្អូនជនរងគ្រោះដែលមានបញ្ហាកើតឡើងនៅតាមដងផ្លូវដើម្បីភ្ជាប់ទំនាក់ទំនងទៅអង្គភាពដែលនៅបៀតៗនោះឲ្យជួយសង្គ្រោះ។ នៅ ភ្នំពេញ ល្អប្រសើរជាងឆ្នាំមុន អាជ្ញាធរមានសមត្ថកិច្ចគាត់សហការនៅពេលដែលឡានស្ទះឬក៏ នៅ ពេលកន្លែងណាដែលមានឧប្បត្តិហេតុអ្វីកើតឡើងយើងតែងតែស្នើសុំគាត់។ បន្តទៅខាងអគ្គស្នងការនគរបាលជាតិ ទៅមន្ទីរពេទ្យ និងអាជ្ញាធរផ្ទាល់"។
គណៈកម្មាធិការជាតិសុវត្ថិភាពចរាចរណ៍ផ្លូវគោក ក៏បានចេញសេចក្ដីអំពាវនាវមួយ ក្នុងគោលដៅដាស់តឿនអ្នកធ្វើដំណើរ ឲ្យបង្កើនការប្រុងប្រយ័ត្នក្នុងពេលបើកបរ ត្រូវគោរពច្បាប់ចរាចរ និងចេះយោគយល់អធ្យាស្រ័យក្នុងពេលធ្វើដំណើរនៅក្នុងឱកាសបុណ្យចូលឆ្នាំថ្មីប្រពៃណីជាតិដែរ។
សេចក្ដីអំពាវនាវដែលមាន១០ចំណុច បានរកឃើញថា គ្រោះថ្នាក់ចរាចរណ៍តែងតែកើតមានឡើង គឺដោយសារតែអ្នកបញ្ជាយានយន្តបើកបរក្នុងល្បឿនហួសកំណត់។ បើកបរក្រោមឥទ្ធិពលជាតិស្រវឹង ធ្វេសប្រហែស មិនគោរពច្បាប់ចរាចរណ៍ អ្នកជិះម៉ូតូមិនពាក់មួកសុវត្ថិភាព មិនប្រកាន់ខ្ជាប់តាមគន្លងផ្លូវ ឬចំណែកផ្លូវ ដែលតម្រូវសម្រាប់យានរបស់ខ្លួនជាដើម។ រីឯអ្នកថ្មើរជើងក៏មានការធ្វេសប្រហែស មិនបានដើរអែបចិញ្ចើមថ្នល់ និងខ្វះការប្រុងប្រយ័ត្ននៅពេលឆ្លងកាត់ថ្នល់។
នៅក្នុងរយៈពេល៥ថ្ងៃនៃពិធីបុណ្យចូលឆ្នាំខ្មែរ ឆ្នាំ២០១១កន្លងទៅ ករណីគ្រោះថ្នាក់ចរាចរណ៍មានចំនួន ២១១ករណី បានបណ្ដាលឲ្យមនុស្ស៥៨នាក់ស្លាប់ របួសធ្ងន់ចំនួន២៧៩នាក់ របួសស្រាល២០៥នាក់។ សរុបទៅ គិតជាមធ្យមក្នុងមួយថ្ងៃគឺមានមនុស្សជាង១១នាក់បានស្លាប់ដោយសារគ្រោះថ្នាក់ចរាចរណ៍។
ដោយឡែកនៅក្នុងថ្ងៃបុណ្យចូលឆ្នាំនេះដែរ មានដំណឹងថា មានករណីអគ្គិភ័យនៅរាជធានីភ្នំពេញកើតឡើងមួយដែរ។
ប្រធានការិយាល័យនគរបាលបង្ការ និងពន្លត់អគ្គីភ័យ នៃស្នងការដ្ឋាននគរបាលរាជធានីភ្នំពេញ លោកវរសេនីយ៍ នេត វន្ថា ឲ្យដឹងថា មានករណីអគ្គិភ័យមួយបានឆាបឆេះផ្ទះប្រជាពលរដ្ឋនៅក្នុងសង្កាត់ដង្កោ ខណ្ឌដង្កោរាជធានីភ្នំពេញ។ ប៉ុន្តែគេនៅពុំទាន់ដឹងថា បានខូចខាតទ្រព្យសម្បត្តិនិងប៉ះពាល់មនុស្សឬយ៉ាងណានោះទេ ហើយចំពោះមូលហេតុបណ្ដាលឲ្យមានអគ្គីភ័យនោះក៏មិនទាន់បានដឹងដែរ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។