លោក ងិន សៅរ័ត្ន នាយកប្រតិបត្តិអង្គការជនពិការកម្ពុជា ហើយដែលរូបលោកជាជនពិការផងនោះ មានប្រសាសន៍ថា គេសង្គេតឃើញថា ជនពិការនៅក្នុងប្រទេសកម្ពុជានៅមានការរើសអ៊ើង ជាពិសេសសិទ្ធិជនពិការដែលការពារដោយច្បាប់ ហាក់នៅមានការខ្វះចន្លោះនៅឡើយ។
លោកបញ្ជាក់ថា នៅក្នុងសង្គមកម្ពុជាសព្វថ្ងៃនេះ ជនពិការនៅមិនទាន់ត្រូវបានគេទទួលស្គាល់នៅឡើយ ដូចជាការរកការងារធ្វើ ការទទួលបានផ្នែកថែទាំសុខភាពនិងការសិក្សាជាដើម គឺនៅមានកម្រិត។
លោក ងិន សៅរ័ត្ន មានប្រសាសន៍ដូច្នេះ ៖ «សាធារណជនក៏ដោយ ក៏មិនទាន់បានផ្ដល់តម្លៃដល់បងប្អូនជនពិការទេ ច្រើននិយាយថា ជនពិការមកពីបាបកម្ម ជនពិការមិនអាចធ្វើអ្វីកើតទេ»។
លី ញ៉ ជាជនពិការជើងតាំងពីអាយុ៦ឆ្នាំ មានប្រសាសន៍ថា ជនពិការនៅកម្ពុជានៅមានការរើសអ៊ើង ៖ «ជនពិការយើងចាំបាច់បំផុតនៅពេលនេះ បញ្ហាសុខភាពជាចម្បង ការទទួលបាន ដូចជាអប់រំ ឬក៏ការងារ»។
លោក វន សម្ផស្ស នាយករងក្រុមប្រឹក្សាសកម្មភាពជនពិការ បានកត់សម្គាល់ឃើញថា ជនពិការនៅកម្ពុជាបច្ចុប្បន្នត្រូវបានរដ្ឋាភិបាលយកចិត្តទុកដាក់គួរឲ្យកត់សម្គាល់។
លោក វន សម្ផស្ស មានប្រសាសន៍ថា ៖ «ឱកាសការងារនិងការអប់រំ យើងឃើញថា ក្រសួងគាត់ធ្វើច្រើនហើយ ឥឡូវហ្នឹងគាត់មានគោលនយោបាយអប់រំកុមារពិការ»។
លោក ចាប តូនី អនុរដ្ឋលេខាធិការក្រសួងសង្គមកិច្ច អតីតយុទ្ធជននិងយុវនីតិសម្បទា មានប្រសាសន៍ថា នៅក្នុងឆ្នាំ២០០៩នេះ សិទ្ធិជនពិការត្រូវបានរាជរដ្ឋាភិបាលយកចិត្តទុកដាក់បំផុត។ លោកបញ្ជាក់ថា បច្ចុប្បន្ននេះជនពិការមានច្បាប់ការពារ ដូច្នេះប្រសិនបើជនពិការទទួលការមើលងាយ ជនពិការអាចធ្វើការប្តឹងផ្តល់ដើម្បីសងជំងឺចិត្ត។
លោក ចាប តូនី មានប្រសាសន៍ដូច្នេះ ៖ «ឥឡូវច្បាប់មានហើយ ជនពិការមានសិទ្ធិនឹងប្ដឹងទៅសមត្ថកិច្ច ហើយអាចដាក់ផាកពិន័យអីទៀត»។
លោកស្រី មីហ្សែល ឡាប៊ូ (Michelle Labeeu) ប្រធានប្រតិបត្តិការនៃប្រតិភូគណៈកម្មការអ៊ឺរ៉ុប ប្រចាំកម្ពុជា មានប្រសាសន៍ថា នៅលើពិភពលោកបច្ចុប្បន្ននេះ មានជនពិការចំនួន៦៥០លាននាក់ ដែលភាគច្រើនមកពីសហគមន៍ក្រីក្រ។ លោកស្រីបញ្ជាក់ថា ជនពិការនៅក្នុងប្រទេសកម្ពុជាសព្វថ្ងៃ ត្រូវបានរដ្ឋាភិបាលយកចិត្តទុកដាក់ច្រើន ដោយបានចុះហត្ថលេខាលើអនុសញ្ញាអន្តរជាតិ ជាមួយអង្គការសហប្រជាជាតិ ស្តីពីសិទ្ធិជនពិការក្នុងឆ្នាំ២០០៧។ ជាមួយគ្នានេះដែរ រដ្ឋាភិបាលកម្ពុជាក៏បានអនុម័តច្បាប់ស្តីពីការលើកកម្ពស់ និងការការពារសិទ្ធិជនពិការនៅក្នុងឆ្នាំ២០០៩។
បើយោងតាមស្ថិតិរបស់ក្រសួងផែនការឆ្នាំ២០០៩នេះ បានឲ្យដឹងថា ជនពិការនៅកម្ពុជា គឺមានចំនួន៤% ក្នុងចំណោមប្រជាពលរដ្ឋ១៤លាននាក់នៅទូទាំងប្រទេស៕