កសិករ ១៥០នាក់នៃភូមិគោលដៅចំនួន ១៦ដែលអង្គការ សូហ្វដិក បានបង្រៀន និងផ្តល់ជំនួយអភិវឌ្ឍន៍លើគម្រោងសន្តិសុខស្បៀង និងការលើកកម្ពស់សិទ្ធិអំណាចសហគមន៍បានមកជួបជុំដើម្បីចែកចាយ និងផ្តល់បទពិសោធន៍ឲ្យគ្នានៅក្នុងអង្គសន្និបាតប្រចាំឆ្នាំរបស់អង្គការនេះនៅខេត្តកំពង់ឆ្នាំង។
ជួបសម្ភាសជាមួយអ្នកយកព័ត៌មានវិទ្យុអាស៊ីសេរីនៅព្រឹកថ្ងៃ២២ ធ្នូ ក្នុងពេលសម្រាកទទួលទានអាហារសម្រន់ ប្រធានអង្គការសូហ្វដិក បណ្ឌិត ឃុន លាងហាក់ មានប្រសាសន៍ថា បេសកកម្មរបស់អង្គការសូហ្វដិក គឺធ្វើការជាដៃគូជាមួយសហគមន៍មូលដ្ឋានភូមិនិងស្ថាប័នពាក់ព័ន្ធតាមរយៈការអភិវឌ្ឍសហគមន៍ចម្រុះ ការសិក្សាស្រាវជ្រាវ ការអភិវឌ្ឍធនធានមនុស្សនិងសេដ្ឋកិច្ចគ្រួសារ សំដៅលើកកម្ពស់ជីវភាពរស់នៅរបស់ប្រជាពលរដ្ឋនៅតំបន់គោលដៅ។
លោក ឃុត លាងហាក់ មានប្រសាសន៍ថា ៖ «អង្គការសូហ្វដិកគឺសំខាន់បំផុតយើងធ្វើការងារលើកសិទ្ធអំណាចដល់សហគមន៍ ហើយពង្រឹងសន្តិសុខស្បៀងក្នុងការពង្រឹងសន្តិសុខស្បៀងយើងផ្តោតសំខាន់លើវិស័យកសិកម្ម ក្នុងនោះយើងផ្តោតលើការដាំស្រូវ បង្កើនទិន្នផលស្រូវ ទិន្នផលបន្លែ និងចិញ្ចឹមសត្វ។ ហើយយើងបានបញ្ចូលប្រព័ន្ធកសិកម្មចម្រុះដើម្បីលើកកម្ពស់ជីវភាពប្រជាជនយើង»។
អង្គការសូហ្វដិក គឺជាអង្គការក្រៅរដ្ឋាភិបាលមួយដែលបានបង្កើតឡើងនៅឆ្នាំ២០០៦ អង្គការនេះទទួលជំនួយដោយផ្ទាល់ពីអង្គការហេក្ស (HEKS) នៃប្រទេសស្វីសក្នុងមួយឆ្នាំប្រមាណ ១០ម៉ឺនដុល្លារអាមេរិកក្នុងគោលដៅលើកកម្ពស់ជីវភាពរស់នៅរបស់ប្រជាពលរដ្ឋនៅតំបន់ជនបទតាមរយៈការបង្កើនប្រាក់ចំណូលលើវិស័យកសិកម្មមីក្រូហិរញ្ញវត្ថុ សុខមាលភាព អភិវឌ្ឍន៍ធនធានមនុស្ស និងការគ្រប់គ្រងធនធានធម្មជាតិប្រកបដោយនិរន្តរភាពដោយផ្តល់ទាំងជំនួយជាថវិការួមទាំងការបង្រៀនចំណេះដឹងលើវិស័យកសិកម្ម និងការចិញ្ចឹមសត្វ។
ប្រជាពលរដ្ឋឈ្មោះ ទាំ ហ៊ីម នៅភូមិអូរលយ ឃុំជើងគ្រាវ ស្រុករលាប្អៀរ ដែលបានចូលរួមក្នុងអង្គសន្និបាត សម្តែងពីទឹកចិត្តរីករាយប្រាប់វិទ្យុអាស៊ីសេរីថា ការចូលរួមនេះផ្តល់ប្រយោជន៍យ៉ាងធំធេងសម្រាប់គ្រួសារលោក ក៏ដូចជាអ្នកភូមិទាំងអស់ក្នុងខេត្តផងដែរ។
ទាំ ហ៊ីម អះអាងថា ៖ «បន្ទាប់ពីអង្គការសូហ្វដិក បានផ្តល់បទពិសោធន៍និងបច្ចេកទេសកន្លងមក នៅភូមិខ្ញុំមានការរីកចម្រើនជាក់ស្តែងលើពូជ កម្មវិធីស្រូវ ប.វ.ស»។
អ្នកស្រី ប្លុង សំអាត អ្នកភូមិត្រពាំងអំពិល ឃុំប្រស្និប ស្រុករលាប្អៀរ បន្ថែម ៖ «ការទទួលពីគាត់ហ្នឹងគឺព័ត៌មានល្អៗជាពិសេសបទពិសោធន៍ការងារតែម្តង ជាពិសេសដាំស្រូវ ប.វ.ស តែម្តង យើងធ្វើតាំងពីបានផលតិចរហូតដល់បានផលច្រើន»។
ក្នុងឱកាសបើកអង្គសន្និបាតប្រធានមន្ទីរកសិកម្មខេត្តកំពង់ឆ្នាំងលោក ង៉ាន ណានី ថ្លែងថា ខេត្តកំពង់ឆ្នាំងមានអង្គការក្រៅរដ្ឋាភិបាលជាច្រើនដែលបានមកជួយធ្វើការអភិវឌ្ឍន៍លើវិស័យកសិកម្មនៅជនបទ តែសូហ្វដិក គឺជាអង្គការដៃគូដ៏ល្អមួយសម្រាប់ខេត្តនេះ៕