អង្គការក្នុងស្រុកមួយធ្វើការងារផ្នែកមនុស្សធម៌ កំពុងជួបការលំបាកនៅពេលដែលអង្ករ និងស្បៀងអាហារមួយចំនួនរបស់អង្គការនេះ ដែលបានដឹកទៅដល់មូលដ្ឋានហើយនោះ ត្រូវហាមឃាត់មិនអោយចែកជូនកុមារកំព្រា ក្នុងឃុំមួយចំនួនក្នុងស្រុកក្រូចឆ្មារ។
ប្រធានអង្គការអប់រំ និងបណ្ដុះបណ្ដាលយុវជន លោក សាឡេះ សឡះ មានប្រសាសន៍ថា អង្ករ និងស្បៀងអាហាររបស់អង្គការលោកបានដឹកទៅដល់ឃុំស្វាយឃ្លាំង ស្រុកក្រូចឆ្មារ ខេត្តកំពង់ចាម កាលពីថ្ងៃ១១ ខែមេសា ដើម្បីចែកជូនកុមារកំព្រាក្នុងឃុំក្បែរៗនោះ ក៏ប៉ុន្តែត្រូវហាមឃាត់។
នៅថ្ងៃទី១៣ ខែមេសា នេះ អង្គការដដែលនេះបានជូនដំណឹងពីការចុះចែកអំណោយទៅឃុំទ្រា ដែលស្ថិតក្នុងស្រុកក្រូចឆ្មារ នោះដែរ ហើយក៏ត្រូវហាមឃាត់ទៀត។ លោក សាឡេះ សឡះ បន្តថា លោកងឿងឆ្ងល់ ដ្បិតអង្គការរបស់លោកបានចុះបញ្ជីនៅក្រសួងមហាផ្ទៃត្រឹមត្រូវ ហើយមិនឃើញផ្នែកច្បាប់ណាមួយបញ្ជាក់ថា ត្រូវតែសុំការអនុញ្ញាតមុននឹងធ្វើសកម្មភាពនៅតាមមូលដ្ឋានដែរ។
លោក សាឡេះ សាឡះ បញ្ជាក់ទៀតថា អង្គការរបស់លោកពុំមែនជាអង្គការសាសនា ឬធ្វើការងារពាក់ព័ន្ធនឹងនយោបាយទេ ជាអង្គការមនុស្សធម៌ជួយពលរដ្ឋក្រីក្រ ជាពិសេសកុមារកំព្រា ហើយអង្គការនេះមានគោលដៅធ្វើការក្នុងស្រុកក្រូចឆ្មារ ទាំងមូល។
មេឃុំស្ដីទីឃុំទ្រា លោក ហ៊ីម ហារូម មានប្រសាសន៍ថា ឃុំពុំបានរារាំងសកម្មភាពសប្បុរសធម៌ទេ គឺគ្រាន់តែអនុវត្តតាមបទបញ្ជាដែលស្រុកបានដាក់អោយ។
អភិបាលស្រុកក្រូចឆ្មារ លោក ស្រេង លី អះអាងថា រាល់សកម្មភាពផ្សេងៗក្នុងមូលដ្ឋាន ទាមទារអោយមានទំនាក់ទំនងទៅស្រុក ដើម្បីស្រុកជួយចាត់ចែងរៀបចំ។ លោក ស្រេង លី បញ្ជាក់ថា ពុំមានការទំនាក់ទំនងទៅស្រុក គឺមិនអាចធ្វើសកម្មភាពបានទេ បើទោះជាការងារសប្បុរសធម៌ក៏ដោយ។
ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ។ លោកហៅការហាមឃាត់សកម្មភាពមនុស្សធម៌នៅក្នុងស្រុកក្រូចឆ្មារនេះថា ផ្ទុយពីច្បាប់។ លោកបន្តថា ការហាមឃាត់បែបនេះ គឺកើតចេញពីគំនិតកេងចំណេញ និងការរើសអើងផ្នែកនយោបាយពីសំណាក់គណបក្សដែលកំពុងកាន់អំណាច។
ការហាមឃាត់សកម្មភាពអង្គការមិនមែនរដ្ឋាភិបាលក្នុងការធ្វើសកម្មភាពក្នុងមូលដ្ឋានបែបនេះ បានកើតមានជារឿយៗ។ អ្នកឃ្លាំមើលសិទ្ធិមនុស្សលើកឡើងថា ការនេះធ្វើអោយប៉ះពាល់សិទ្ធិ និងខាតបង់ប្រយោជន៍របស់ពលរដ្ឋ ដែលចាំបាច់ត្រូវមានការផ្លាស់ប្ដូរ។ ដើម្បីផ្លាស់ប្ដូរចាំបាច់ណាស់ដែលត្រូវពង្រឹងការអនុវត្តច្បាប់ ការគិតគូរពីផលប្រយោជន៍ពលរដ្ឋ និងកាត់បន្ថយការគិតប្រយោជន៍បុគ្គល ឬក្រុមណាមួយ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។