សង្គមស៊ីវិលស្នើរដ្ឋាភិបាលនិងម្ចាស់ជំនួយគាំទ្រថវិកាដល់ពួកគេ
h083012in1.mp3
ការស្នើឡើងរបស់ក្រុមអង្គការសង្គមស៊ីវិលជិត១០០ស្ថាប័ននេះ បានធ្វើឡើងតាមរយៈសេចក្ដីថ្លែងការណ៍រួមរបស់ពួកគេ ដែលដាក់ជូនដំណាងរដ្ឋាភិបាល និងម្ចាស់ជំនួយ នៅក្នុងកិច្ចពិគ្រោះយោបល់ថ្នាក់ជាតិ ស្ដីពីការលើកកម្ពស់អភិបាលកិច្ច និងភាពជាដៃគូសម្រាប់ប្រសិទ្ធភាពនៃការអភិវឌ្ឍ។
នាយកប្រតិបត្តិអង្គការអភិវឌ្ឍន៍ និងភាពជាដៃគូក្នុងសកម្មភាព ឌី.ភី.អេ (DPA) លោក ម៉ម សម្បត្តិ បានលើកឡើងពីអត្ថន័យនៃសេចក្ដីថ្លែងការណ៍រួម របស់អង្គការមិនមែនរដ្ឋាភិបាលនោះថា អង្គការសង្គមស៊ីវិលបានបំពេញការងារនៅតាមមូលដ្ឋាន ក្នុងការភ្ជាប់ពលរដ្ឋក្រីក្រអោយទទួលបានអត្ថប្រយោជន៍ពីការអភិវឌ្ឍ។ ករណីនេះហើយដែលពួកគេតែងតែចង់បានការទទួលស្គាល់ថា ខ្លួនជាតួអង្គមួយសំខាន់ក្នុងការអភិវឌ្ឍ។ លោក ម៉ម សម្បត្តិ បន្តថា ការធានាបាននូវទំនុកចិត្ត និងការគាំទ្រថវិកា នឹងជំរុញអោយសង្គមស៊ីវិលបំពេញការងារកាន់តែសកម្ម។
ជាមួយគ្នានេះ ក៏បានស្នើអោយភាគីពាក់ព័ន្ធទាំងអស់ គឺរួមទាំងសង្គមស៊ីវិលផង ធានាដល់ការអនុវត្តគោលការណ៍សំខាន់ៗមួយចំនួនដែលមានស្រាប់ ស្ដីពីភាពជាដៃគូសម្រាប់ប្រសិទ្ធភាពនៃការអភិវឌ្ឍ រួមមានលទ្ធផលនៃវេទិកាជាន់ខ្ពស់នៅទីក្រុងអាក្រា (AGRA) ការសម្រេចរួមគ្នានៅទីក្រុងប៊ូសាន (Busan) និងគោលការណ៍ក្រុងអ៊ីស្តាន់ប៊ុល។
ប្រធាននាយកដ្ឋានគោលនយោបាយ នៃគណៈកម្មាធិការនីតិសម្បទា និងអភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កម្ពុជា លោក រស់ សាលីន មានប្រសាសន៍ថា ភាគីរដ្ឋាភិបាលតែងបើកទូលាយ និងចាត់ទុកអង្គការមិនមែនរដ្ឋាភិបាល ជាដៃគូក្នុងការអភិវឌ្ឍ។ ទោះជាយ៉ាងណា លោកក៏បានស្នើអោយអង្គការសង្គមស៊ីវិលបំពេញតួនាទីអោយបានច្រើន ក្នុងសកម្មភាពបំពេញចំណុចខ្វះខាតរបស់រដ្ឋាភិបាល ជាជាងការរិះគន់បន្ទច់បង្អាក់។
ចំណែក លោក ខាល អាន់ឌើ ឡាសុន (Karl Ander Larsson) អ្នកប្រឹក្សាយោបល់ និងជាភារធារីនៃស្ថានទូតស៊ុយអែត ប្រចាំនៅកម្ពុជា មានប្រសាសន៍ថា សង្គមស៊ីវិលគឺពិតជាតួអង្គសំខាន់ក្នុងការអភិវឌ្ឍ ប៉ុន្តែសង្គមស៊ីវិលត្រូវកំណត់អោយបាននូវភាពជាតំណាង ដែលជាសំឡេងរួមតែមួយនៅក្នុងការជួបប្រជុំជាមួយរដ្ឋាភិបាល លើសពីនេះគឺត្រូវកែលំអសមត្ថភាពអង្គការ សង្គមស៊ីវិល នៅគ្រប់លំដាប់ថ្នាក់។
ទាក់ទិននឹងប្រសិទ្ធភាពការអភិវឌ្ឍ រដ្ឋាភិបាលកម្ពុជាបានសម្រេចពន្យារពេលនៃកិច្ចប្រជុំរវាងរដ្ឋាភិបាល ម្ចាស់ជំនួយ និងអង្គការមិនមែនរដ្ឋាភិបាល និងបានងាកមកប្រើប្រាស់យុទ្ធសាស្ត្រថ្មីមួយ គឺការសម្របសម្រួលដោយផ្ទាល់ជាមួយប្រទេសម្ចាស់ជំនួយ រហូតដល់ឆ្នាំ២០១៤ នៅខណៈដែលវិបត្តិហិរញ្ញវត្ថុ និងបំណុល បន្តប៉ះពាល់ប្រទេសម្ចាស់ជំនួយធំៗមួយចំនួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
