នៅក្នុងសេចក្តីប្រកាសព័ត៌មានរួមមួយរបស់ក្រុមអង្គការសង្គមស៊ីវិលជាតិនិងអន្តរជាតិ សហព័ន្ធសហជីព សមាគមចំនួន៣២ស្ថាប័ននៅក្នុងប្រធានបទ “រួមគ្នាលើកស្ទួយលក្ខខណ្ឌការងារសមរម្យដើម្បីស្រ្តីនៅប្រទេសកម្ពុជា” បានផ្សព្វផ្សាយថា នៅថ្ងៃទី៨ មីនានេះ ពួកគេនឹងធ្វើការប្រគំតន្រ្តីផ្សព្វផ្សាយជាសាធារណៈ នៅឯមជ្ឈមណ្ឌលទួលគោកដើម្បីជាការកម្សាន្ត លើសពីនេះទៅទៀតក៏មានការឆ្លើយសំណួរយករង្វាន់និងសម្ដែងរឿងអប់រំ ការផ្សព្វផ្សាយនៅតាមវិទ្យុមួយចំនួនទាក់ទងទៅនឹងការលើកកម្ពស់សិទ្ធិនារីផងដែរ។
អគ្គលេខាធិការសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក ហេង សំអន បានឲ្យដឹងពីគោលបំណងនៃការរៀបចំនេះថា ជាការបង្ហាញឲ្យសាធារណជនបានយល់ដឹងអំពីការងារសមរម្យសម្រាប់អ្នកធ្វើការងារតាមផ្ទះ កម្មករចំណាកស្រុកជាស្រ្តី កម្មការិនីកាត់ដេរ បុគ្គលិកនារីដែលកំពុងបម្រើការងារនៅក្នុងសេវាកម្សាន្តនិងវិស័យផ្សេងៗទៀត។
លោក ហេង សំអន បានឲ្យដឹងដូច្នេះ ៖ «ស្រ្ដីនៅក្នុងវិស័យកាត់ដេរ គឺគាត់មានបញ្ហាច្រើន ជាពិសេសថ្មីៗនេះ អង្គការពលកម្មអន្តរជាតិមានអនុសញ្ញាមួយលេខ១៤៣ហ្នឹង គឺនិយាយអំពីការឈប់សម្រាកលម្ហែមាតុភាព គឺត្រូវទទួលបានសារប្រយោជន៍១០០% ក៏ប៉ុន្តែសម្រាប់ច្បាប់នៅប្រទេសកម្ពុជាយើង គឺយើងទទួលបានតែ ៥០% ទេ។ សម្រាប់បងប្អូនដែលជាអ្នកធ្វើការជាអ្នកបម្រើអ្នកតាមផ្ទះវិញ យើងឃើញថា មិនទាន់មានលក្ខណៈការងារល្អប្រសើរទេ គឺអត់មានច្បាប់សម្រាប់ពួកគាត់តែម្ដង។ បងប្អូននារីដែលធ្វើការនៅក្នុងវិស័យកម្សាន្ត ធ្វើការនៅតាមខារ៉ាអូខេអីផ្សេងៗហ្នឹង គឺគាត់ទទួលការរើសអើងខ្លាំងពីសង្គម គាត់ត្រូវទទួលរងនូវអំពើហិង្សាពីភ្ញៀវ បង្ខំឲ្យគាត់ហូបស្រា ឬបង្ខំឲ្យគាត់រួមភេទជាដើម»។
ចំណែកឯលោក ហម ស៊ុនរិទ្ធ នាយកផ្នែកឃ្លាំមើលនិងការពារសិទ្ធិមនុស្សនៃអង្គការលីកាដូ មានប្រសាសន៍ថា ក្នុងឱកាសបុណ្យខួប៨ មីនានេះ អង្គការលីកាដូ មានគម្រោងចុះចែកអំណោយនិងលើកទឹកចិត្តដល់ស្រ្តីជាអ្នកទោសនៅតាមពន្ធនាគារចំនួន១៣ខេត្តក្រុង គិតទាំងទីក្រុងភ្នំពេញ ដែលក្នុងនោះមានស្រ្តីចំនួន១.០២០នាក់។
លោក ហម ស៊ុនរិទ្ធ មានប្រសាសន៍ដូច្នេះ ៖ «ទី១ ដោយសារយើងគិតថា ជីវភាពរស់នៅរបស់គាត់សព្វថ្ងៃហ្នឹងគាត់មានការខ្វះខាត មិនគ្រប់គ្រាន់ទេទៅលើអាហារបន្ថែម អ៊ីចឹងទៅការដែលយើងមានអីបន្តិចបន្តួចសម្រាប់ផ្ដល់ជាការរំឭកនៅថ្ងៃសិទ្ធិនារី ៨ មីនា ហ្នឹង យើងមានសម្ភារៈ មានអាហារមួយចំនួន ជានំអីបន្តិចបន្តួចគ្រាន់ជានិមិត្តរូបនៅក្នុងថ្ងៃហ្នឹង»។
នៅក្នុងសេចក្តីប្រកាសព័ត៌មានរួមមួយរបស់ក្រុមអង្គការសង្គមស៊ីវិលជាតិនិងអន្តរជាតិ សហព័ន្ធសហជីព សមាគមចំនួន៣២ស្ថាប័នបានបង្ហាញថា ស្រ្តីតំណាងឲ្យ៤០% នៃកម្លាំងពលកម្មសរុបនៅក្នុងពិភពលោក។ ដោយឡែកកម្លាំងពលកម្មសរុបជាស្រ្តីមាន៥០% ដែលកំពុងតែបានរួមចំណែកយ៉ាងសកម្មនៅក្នុងការកសាងប្រទេសជាតិ ដូចជានៅក្នុងវិស័យកាត់ដេរនិងវិស័យកសិកម្ម៕