កញ្ញា អ៊ិន សូលីដា បានថ្លែងនៅក្នុងសន្និសីទកាសែត នារសៀលថ្ងៃពុធនេះ ថា នាងប្រថុយប្រថានចំពោះការស្លាប់ក្នុងការបកអាក្រាត អ្នកស្រី ជា រដ្ឋា អតីតគូស្នេហ៍ ដែលបានបែកផ្លូវគ្នាហើយនោះ ថាជាមនុស្សកាចសាហាវ កំពុងតែគំរាមកំហែងដល់ជីវិតរបស់នាងជាបន្តទៀត នៅគ្រាដែលមន្ត្រីប៉េអឹមស្រី្តរូបនេះពុំបានទទួលការផ្តន្ទាទោស។
សម្ព័ន្ធខ្មែរជំរឿននិងការពារសិទ្ធិមនុស្សលីកាដូនិងមជ្ឈមណ្ឌលសិទ្ធិមនុស្សកម្ពុជាបានចេញសេចក្តីប្រកាសរួមគ្នានាថ្ងៃ២ កញ្ញា ថ្កោលទោសតុលាការក្រុងភ្នំពេញក្រោយពេលដែលតុលាការនេះបានសម្រេចកាលពីពេលថ្មីៗក្នុងការដោះលែងនិងលើកលែងការចោទប្រកាន់លើអ្នកស្រី ជា រដ្ឋា អតីតមន្ត្រីជាន់ខ្ពស់កងរាជអាវុធហត្ថនិងបក្ខពួកក្នុងការវាយ ប្រហារដោយទឹកអាស៊ីតមកលើម្តាយមីងរបស់អតីតគូស្នេហ៍របស់អ្នកស្រី។
លោក អ៊ូ វីរៈ ប្រធានមជ្ឈមណ្ឌលការពារសិទ្ធិមនុស្សកម្ពុជា ថ្លែងរិះគន់ថា នេះជាទង្វើអាក្រក់បំផុតដែលនាំឲ្យមាននិទណ្ឌភាពកាន់តែធ្ងន់ធ្ងរថែមទៀតនៅកម្ពុជា។
លោក អ៊ូ វីរៈ បានមានប្រសាសន៍ថា ៖ «ជាសង្គមមួយដែលវាអន់ហួស បើសិនជាយើងនៅតែអនុញ្ញាតឲ្យអ្នកប្រព្រឹត្តនូវអំពើឃោរឃៅ ដូចជាករណីចាក់ទឹកអាស៊ីត ឲ្យនៅរួចខ្លួន ហើយនៅមានតួនាទីរដ្ឋ អាហ្នឹង... វាអត់មានឈានទៅមុខអីបន្តិចសោះ»។
មានប្រសាសន៍នារសៀលថ្ងៃដដែល កញ្ញា អ៊ិន សូលីដា អតីតតារាសម្ដែងល្បីល្បាញផ្នែកខារ៉ាអូខេបានបញ្ជាក់ថា ការដោះលែងអ្នកស្រី ជា រដ្ឋា និងបក្ខពួកក្នុងរឿងនេះ កំពុងតែគំរាមកំហែងដល់ជីវិតកញ្ញានិងក្រុមគ្រួសារទាំងមូល។
កញ្ញា អ៊ិន សូលីដា បានបញ្ជាក់ថា ៖ «នេះហើយដែលនាងខ្ញុំភ័យខ្លាច ភ័យខ្លាចដល់ថ្ងៃនេះ ឥឡូវនេះរឹតតែមានភាពភ័យខ្លាចនៅពេលដែលវារួចខ្លួនទៀត។ ហ្នឹងឬដែលគ្មានភស្តុតាង? គឺអ្នកដែលជះទឹកអាស៊ីតទាំងអស់គឺសុទ្ធតែទាក់ទងជាមួយ ជា រដ្ឋា ទាំងអស់ ហេតុអីបាន ជា រដ្ឋា គ្មានទោស? ទាំងអស់នេះហើយដែលគេទាំងអស់គ្នាមិនហ៊ានប្ដឹង។ បីករណីហើយនៅតែមិនជាប់ទោស!»។
មេធាវីការពារក្តីរបស់អ្នកស្រី ជា រដ្ឋា វិញ គឺលោក កែវ យ៉ា បានថ្លែងថា នេះគ្រាន់តែជាការចោទប្រកាន់ប៉ុណ្ណោះ ៖ «វាគ្រាន់តែជាការបរិហារកេរ្តិ៍ទៅលើកូនក្ដីរបស់ខ្ញុំទេ ទី១។ ទី២ តុលាការគាត់បានសម្រេចលើកលែងទោសទៅដល់កូនក្ដីរបស់ខ្ញុំហើយ អ៊ីចឹងបានន័យថា កូនក្ដីរបស់ខ្ញុំគ្មានទោស»។
កាលពីខែឧសភាកន្លងទៅ ស្រ្តីឈ្មោះ យ៉ា សុខនីម ម្តាយមីងរបស់កញ្ញា អ៊ិនសូលីដា ជាអតីតគូស្នេហ៍ស្រ្តីដូចគ្នារបស់អ្នកស្រី ជា រដ្ឋា មន្ត្រីជាន់ខ្ពស់ផ្នែកអាវុធហត្ថលើផ្ទៃប្រទេស ត្រូវបានគេជះទឹកអាស៊ីតបណ្តាលឲ្យរងរបួសធ្ងន់ធ្ងរបន្សល់នូវការខូចមុខមាត់រហូតមកដល់បច្ចុប្បន្ន ដោយសារតែគេជឿថា អ្នកស្រីបានរួមគំនិតក្នុងការជម្លៀសនិងចែកផ្លូវរបស់ អ៊ិន សូលីដា ចេញពីរឿងស្នេហានេះ។
ការស៊ើបអង្កេតរយៈពេលមួយឆ្នាំក្រោយពីប្រមូលបានភស្តុតាង និងចាប់ខ្លួនមនុស្សពីរនាក់រួចមក តុលាការបានរកឃើញនូវបទឧក្រិដ្ឋជាច្រើនដែលមានការពាក់ព័ន្ធទៅនឹងអ្នកស្រី ជា រដ្ឋា ដោយមានការចេញដីកាតាមចាប់ខ្លួន អ្នកស្រី ជា រដ្ឋា។ ប៉ុន្តែកាលពីថ្ងៃ១ កញ្ញាកន្លងទៅ តុលាការក្រុងភ្នំពេញដដែលបានចេញដីកាកំបាំងមុខដោះលែងនិងលើកលែងការចោទប្រកាន់នោះទៅវិញ។
នាយិកាអង្គការសិទ្ធិមនុស្សលីកាដូ អ្នកស្រី ណាលីពីឡូក អត្ថាធិប្បាយថា នេះជាការបង្ហាញឲ្យឃើញច្បាស់នៃវប្បធម៌ហិង្សារបស់ប្រទេសកម្ពុជា៕