ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ ជាសមាជិកនៃគណៈកម្មការនិងជាអ្នកដឹកនាំកិច្ចប្រជុំនៅថ្ងៃសុក្រ ទី២៧ វិច្ឆិកា បានមានប្រសាសន៍ប្រាប់វិទ្យុអាស៊ីសេរីថា កិច្ចប្រជុំលើកនេះបានធ្វើឡើងនៅរមណីយដ្ឋានធម្មជាតិ គិរីរម្យ រយៈពេលពេញមួយថ្ងៃ។
លោកបន្តថា សមាជិកចូលរួមកិច្ចពិភាក្សាលើកនេះសុទ្ធតែមកពីសង្គមស៊ីវិលទាំងអស់ ហើយពួកគេមានការជជែកគ្នាយ៉ាងតឹងតែងទៅលើចំណុចមួយចំនួនក្នុងសេចក្តីព្រាង ដូចជាការកំណត់ពាក្យថា ឯករាជភាពនិងប្រសិទ្ធភាពផ្សេងៗនៅក្នុងសេចក្តីព្រាងស្តីពីការបង្កើតគណៈកម្មការសិទ្ធិមនុស្សជាតិកម្ពុជា ដែលគេសង្ឃឹមថាជាស្ថាប័នជាតិឯករាជមួយតាមខ្នាតអន្តរជាតិនៅកម្ពុជានៅពេលអនាគត។
លោក អ៊ូ វីរៈ បានបញ្ជាក់ថា ៖ «ការពិភាក្សារបស់យើងទាំងអស់នេះគឺនឹងមានរបាយការណ៍ ហើយយើងនឹងយកឡើងទៅពិភាក្សាជាមួយនឹងរដ្ឋាភិបាលនៅក្នុងពេលខាងមុខនេះ។ អ្វីដែលវាពិបាកនិយាយគ្នាគឺឯករាជភាព គោលការណ៍នៃឯករាជភាពនិងអំណាច អាហ្នឹងដែលយើងតែងតែមានបញ្ហានៃការព្រាងច្បាប់ហ្នឹង គឺសួរថា តើច្បាប់ហ្នឹងអាចធានានូវស្ថាប័នមួយដែលឯករាជ ហើយនិងមានអំណាចគ្រប់គ្រាន់ ប៉ុន្តែមានការទទួលខុសត្រូវ»។
ប្រធានអង្គការសិទ្ធិមនុស្សលីកាដូ លោកស្រីវេជ្ជបណ្ឌិត ពុង ឈីវកេក ជាប្រធាននិងជាស្ថាបនិកសំខាន់មួយរូបក្នុងការផ្តួចផ្តើមបង្កើតគណៈកម្មការសិទ្ធិមនុស្សជាតិកម្ពុជានេះ មានប្រសាសន៍ឲ្យដឹងដែរថា គំនិតផ្តួចផ្តើមនេះកើតមានតាំងពីឆ្នាំ២០០០ ដោយមានសង្គមស៊ីវិលជាច្រើនចូលរួមនិងមានការគាំទ្រពីរដ្ឋាភិបាល ព្រឹទ្ធសភា រដ្ឋសភា ជាដើម ហើយនៅឆ្នាំ២០០៦បានបើកជាសន្និសីទធំមួយនៅខេត្តសៀមរាប ដោយមានលោកនាយករដ្ឋមន្រ្តី ហ៊ុន សែន ថ្លែងបើកឲ្យដំណើរការរៀបចំបង្កើតស្ថាប័ននេះជាផ្លូវការ។
លោកស្រី ពុង ឈីវកេក បានមានប្រសាសន៍ថា ៖ «ព្រោះនៅប្រទេសកម្ពុជាយើងសព្វថ្ងៃយើងមានគណៈកម្មការសិទ្ធិមនុស្សមួយនៅរដ្ឋសភា មួយនៅព្រឹទ្ធសភា មួយទៀតរបស់រដ្ឋាភិបាល។ អ៊ីចឹងយើងចង់បានមួយទៀតឲ្យបានឯករាជ្យពិតប្រាកដតាមខ្នាតអន្តរជាតិ សំខាន់ណាស់ដើម្បីលើកស្ទួយនិងការពារសិទ្ធិមនុស្សនៅក្នុងប្រទេសហ្នឹង»។
លោកស្រីបន្តថា អ្វីដែលសង្គមស៊ីវិលត្រូវប្រើពេលវេលាយូរនោះ ព្រោះចាំបាច់ត្រូវការពេលវេលាគ្រប់គ្រាន់បើកចំហដល់សារណជនគ្រប់មជ្ឈដ្ឋានទូទៅចូលរួមផ្តល់មតិយោបល់កែលម្អឲ្យបានគ្រប់ជ្រុងជ្រោយ ធ្វើយ៉ាងណាឲ្យបង្កើតបានជាស្ថាប័នជាតិស្តីពីសិទ្ធិមនុស្សមួយដែលឯករាជពិតប្រាកដ មានលទ្ធភាពគ្រប់គ្រាន់ក្នុងការជួយដល់ពលរដ្ឋរងគ្រោះដោយការរំលោភសិទ្ធិមនុស្ស ប្រកបដោយប្រសិទ្ធភាពខ្ពស់ ដូចបណ្តាប្រទេសក្នុងសហគមន៍អាស៊ាននិងនៅលើពិភពលោក ដែលគេប្រកាន់យកលទ្ធិប្រជាធិបតេយ្យ ហើយគេបានបង្កើតស្ថាប័នពិសេសបែបនេះរួចមកហើយ។
គេមិនទាន់ដឹងច្បាស់ថា សេចក្តីព្រាងច្បាប់ស្តីពីការបង្កើតគណៈកម្មការសិទ្ធិមនុស្សជាតិមួយនេះគ្រោងនឹងបញ្ចប់នៅពេលណានោះទេ៕