លោក ប៉ែន ប៊ុនណ្ណារ៍ មន្ត្រីស៊ើបអង្កេតនៃសមាគមសិទ្ធិមនុស្សអាដហុកជាមួយនឹងគណៈប្រតិភូមួយក្រុមទៀតបានទៅជួបនិងបានទទួលការលើកឡើងពីកង្វល់របស់ជនជាតិនៅទីនោះ ឲ្យដឹងថា កង្វល់របស់ប្រជាពលរដ្ឋមានច្រើន ពិសេសប៉ះពាល់ទៅនឹងព្រៃត្រណមរបស់ជនជាតិ។
លោក ប៉ែន ប៊ុនណ្ណារ៍ បានបញ្ជាក់ថា ៖ «យើងកំពុងតែធ្វើការស្រាវជ្រាវបន្តទៅទៀត ទី១ គឺការឈូសឆាយទៅលើដីព្រៃអារក្ស ដីកប់ខ្មោចរបស់គាត់ ជាពិសេសដីចម្ការវិលជុំរបស់គាត់ដែលច្បាប់ភូមិបាលទទួលស្គាល់ ហើយដែលគេចាត់ទុកជាដីសាធារណៈរបស់គាត់។ វាជាកំហុសខាងផ្លូវច្បាប់មួយធំ ក្រុមហ៊ុនត្រូវសិក្សា ទោះយ៉ាងណាក៏ត្រូវបានកាត់ចេញពីដីសម្បទានសេដ្ឋកិច្ចហ្នឹងដែរ»។
ប្រជាពលរដ្ឋនិងតំណាងសហគមន៍ជនជាតិបញ្ជាក់ថា ផ្នូរសាកសពត្រូវគេឈូសឆាយ សូម្បីតែផ្លូវដើរក៏គេហាមឃាត់ដែរ។ អ្នកស្រី ចាន់ នី បានបញ្ជាក់ពីផលលំបាកបន្ថែមមួយចំនួនទៀត ៖ «ពីអូររេតហ្នឹងទៅឲ្យកាត់ឲ្យខាងសហគមន៍ជនជាតិព្នងហ្នឹងតែម្ដង ដើម្បីឲ្យគាត់មានដីគ្រោងទុក មានកន្លែងធនធានធម្មជាតិ មានតំបន់ទេសចរណ៍ ដូចជាប្រពៃណីដីអារក្ស បើមិនអាចផ្ដល់ ជនជាតិព្នងអត់មានប្រពៃណី អស់តម្លៃហើយបើបាត់ប្រពៃណីបាត់អីទាំងអស់អ៊ីចឹងនោះ។ ខាងសហគមន៍ពួកខ្ញុំអត់សុខចិត្តទេ»។
ស្ត្រីជនជាតិព្នងម្នាក់ទៀតបានលើកឡើងពីផលលំបាកនិងការប្រឆាំងខ្លះៗថា នៅថ្ងៃទី១៨ វិច្ឆិកា ពួកគេនឹងទៅជួបជាមួយក្រុមហ៊ុនដើម្បីឲ្យបង្ហាញពីការប្តូរជំហររបស់ខ្លួនវិញ ប៉ុន្តែការទាមទាររបស់ពួកគេគឺចង់ឲ្យកាត់ដីដែលប៉ះពាល់មកឲ្យប្រជាពលរដ្ឋវិញដាច់ខាត។
ស្ត្រីជនជាតិព្នងដដែលបានឲ្យដឹងថា ៖ «ថ្ងៃអាទិត្យមុនហ្នឹងប្រជាពលរដ្ឋតវ៉ាថា ឥឡូវខាងក្រុមហ៊ុនហ្នឹងបើថាចង់បានផ្លូវមិនឲ្យប្រជាពលរដ្ឋហ្នឹងឆ្លងកាត់... អ៊ីចឹងក៏គេលុបផ្លូវហ្នឹងចេញទៅ។ អ្នកធ្វើការក្រុមហ៊ុនហ្នឹងគាត់និយាយប្រាប់ថា អ្នកឈូសឆាយហ្នឹងគាត់ដាក់ខ្សែភ្លើងឆក់គាត់ជុំវិញព្រៃ ថារត់បុកខ្សែភ្លើងក៏ងាប់ទៅ ធ្វើរបៀបហ្នឹងវាពាយអស់ហើយ បើត្រូវមនុស្សយើងក៏ងាប់មនុស្សដែរហ្នឹង»។
លោក ប៉ែន ប៊ុនណ្ណារ៍ មន្ត្រីនៃសមាគមអាដហុក បានឲ្យដឹងថា នឹងមានជំនួបជាមួយក្រុមហ៊ុនដែលប្តូរតែឈ្មោះតែមនុស្សធ្វើកាងារដដែលនោះដើម្បីសុំការបំភ្លឺនិងដោះស្រាយ។
តំណាងក្រុមហ៊ុនមិនទាន់អាចទាក់ទងដើម្បីសុំការបំភ្លឺបានភ្លាមៗនោះឡើយ។
អាជ្ញាធរខេត្តកំពុងជួបដោះស្រាយជាមួយនឹងក្រុមហ៊ុនទាំង៦២ដែលកំពុងវិនិយោគនៅក្នុងខេត្ត ដែលគេដឹងថា ក្រុមហ៊ុនខ្លះមានលិខិតអនុញ្ញាត ខ្លះក៏មិនទាន់មាន ដើម្បីជម្រុះក្រុមហ៊ុនណាដែលមិនបានគោរពតាមគោលការណ៍អភិវឌ្ឍន៍របស់រាជរដ្ឋាភិបាលឬអាជ្ញាធរខេត្ត៕