អង្គការទាំងនោះកំពុងព្រួយបារម្ភចំពោះការកាត់ទោសបន្តបន្ទាប់ទៀត លើករណីសំណុំរឿង ០០៣ និង ០០៤ ដោយមានការជ្រៀតជ្រែកផ្នែកនយោបាយទៅក្នុងតុលាការខ្មែរក្រហម។ កន្លងមកប្រមុខរដ្ឋាភិបាលកម្ពុជា លោក ហ៊ុន សែន ធ្លាប់បានព្រមានមិនឲ្យមានការសេចក្ដីជនសង្ស័យបន្ថែមទៀត ដោយសំអាងថា ខ្លាចកើតមានសង្គ្រាមស៊ីវិលឡើងវិញ។
អង្គការសង្គមស៊ីវិលអន្តរជាតិ ដែលឃ្លាំមើលដំណើរតុលាការខ្មែរក្រហម និងប្រទេសម្ចាស់ជំនួយ បានស្វាគមន៍ចំពោះការកាត់ទោសអតីតប្រធានមន្ទីរ ស-២១ កាំង ហ្កេកអ៊ាវ ហៅ ឌុច ឲ្យជាប់ពន្ធនាគារ ៣៥ឆ្នាំ ចំពោះការទទួលខុសត្រូវរបស់គាត់ក្នុងមន្ទីរ ស-២១ ដែលបណ្ដាលឲ្យមនុស្សស្លាប់ជាង ១ម៉ឺននាក់។
ទោះបីជាយុត្តិធម៌ដំបូងត្រូវបានផ្ដល់ទៅឲ្យជនរងគ្រោះ ក្នុងរយៈពេលជាង ៣០ឆ្នាំ កាលពីថ្ងៃច័ន្ទ ទី២៦ កក្កដា ក៏ដោយ ប៉ុន្តែអង្គការទាំងនោះបានសម្ដែងការព្រួយបារម្ភចំពោះដំណើរការបន្តរបស់សាលាក្ដីខ្មែរក្រហមក្នុងការកាត់ក្តីករណី ០០៣ និង ០០៤ ដោយសារមានការគាបសង្កត់ផ្នែកនយោបាយពីសំណាក់រដ្ឋាភិបាល មិនចង់ឲ្យមានកាត់ទោសជនសង្ស័យបន្ថែម។
សហព្រះរាជអាជ្ញាអន្តរជាតិជាតិកាលពីខែកញ្ញា ឆ្នាំ២០០៩ បានដាក់បន្ថែមសំណុំរឿង ០០៣ និង ០០៤ ដោយបានបង្ហាញជនសង្ស័យបន្ថែមចំនួន ៥នាក់ ដែលពាក់ព័ន្ធនឹងឃាតកម្មចំនួន ៤០ករណី ការធ្វើទារុណកម្ម និងការឃុំខ្លួនដោយខុសច្បាប់។
នាយករងប្រចាំតំបន់អាស៊ីរបស់អង្គការការពារសិទ្ធិមនុស្សអន្តរជាតិ Human Rights Watch លោក ហ្វៀល រ៉ូប៉ឺតសុន (Phil Robertson) នៅថ្ងៃអង្គារ ទី២៧ កក្កដា បានសម្ដែងការព្រួយបារម្ភចំពោះការស៊ើបអង្កេតលើជនសង្ស័យបន្ថែមក្នុងករណី ០០៣ និង ០០៤ ដោយកន្លងមានការជ្រៀតជ្រែកចូលក្នុងតុលាការខ្មែរក្រហម ដោយមិនឲ្យមានការកាត់ទោសបន្ថែម។
សេចក្ដីថ្លែងការណ៍របស់អង្គការ Human Rights Watch កាលពីថ្ងៃច័ន្ទ ថ្លែងថា ទោះបីការកាត់ទោស ឌុច ឲ្យជាប់ពន្ធនាគារជាយុត្តិធម៌ដំបូងក៏ដោយ ប៉ុន្តែនៅមានការទាមទារឲ្យរកយុត្តិធម៌ច្រើនជាងនេះទៅទៀត ដើម្បីរកឲ្យបានយុត្តិធម៌ពិតប្រាកដសម្រាប់កម្ពុជា។ ការជ្រៀតជ្រែកផ្នែកនយោបាយដោយរដ្ឋាភិបាលកម្ពុជា អាចរារាំងការចោទប្រកាន់ និងការកាត់ទោសសំខាន់ៗមួយចំនួនទៀត។
កាលពីខែមិថុនា សហចៅក្រមស៊ើបអង្កេតអន្តរជាតិ លោក ម៉ាកសែល ឡឺម៉ុង (Marcel Lemonde) ប្រកាសនឹងបន្តការស៊ើបអង្កេតសំណុំរឿង ០០៣ និង ០០៤ ទោះបីជាសមភាគីរបស់គាត់ សហចៅក្រមស៊ើបអង្កេតកម្ពុជា លោក យូ ប៊ុនឡេង ជំទាស់មិនព្រមឲ្យមានការស៊ើបអង្កេត ដោយសំអាងថា តុលាការកំពុងរវល់នឹងសំណុំរឿង ០០២។
លោក ហ្វៀល រ៉ូប៉ឺតសុន បន្ថែមថា បច្ចុប្បន្ននេះពិតជាមានការជ្រៀតជ្រែកផ្នែកនយោបាយចូលកិច្ចការរបស់តុលាការខ្មែរក្រហម ៖ «ការព្រួយបារម្ភរបស់យើងធំបំផុតគឺករណី ០០៣ និង ០០៤ ដែលសហព្រះរាជអាជ្ញាអន្តរជាតិ បានស្នើឲ្យករណីបន្តទៅមុខ។ ប៉ុន្តែមន្ត្រីជាន់ខ្ពស់កម្ពុជា រួមទាំងនាយករដ្ឋមន្ត្រី ធ្លាប់បានមានប្រសាសន៍ថា ពួកគេមិនយល់ព្រមចំពោះករណីនេះ ហើយបានបញ្ជាឲ្យតុលាការខ្មែរក្រហមផ្នែកខាងកម្ពុជា កុំឲ្យស៊ើបអង្កេតទៅលើករណីទាំងនោះ។ នេះជាការព្រួយបារម្ភ ហើយប្រសិនបើករណីនេះនៅតែបន្ត វាអាចក្លាយជាការជ្រៀតជ្រែកនយោបាយដែលយើងត្រូវប្រឆាំង»។
ចំណែកអង្គការសិទ្ធិមនុស្ស Amnesty International កាលពីថ្ងៃ២៦ កក្កដា ក៏បានសម្ដែងការព្រួយបារម្ភស្រដៀងនឹងអង្គការ Human Rights Watch ដែរថា មកទល់នឹងពេលនេះមានតែជនសង្ស័យមួយចំនួនតិចតួចប៉ុណ្ណោះ ដែលនឹងត្រូវកាត់ទោសដោយតុលាការខ្មែរក្រហម។
នាយករងប្រចាំនៅតំបន់អាស៊ីប៉ាស៊ីហ្វិចរបស់អង្គការ Amnesty International លោក ដនណា ហ្កេស (Donna Guest) បានមានប្រសាសន៍នៅថ្ងៃទី២៦ កក្កដា ថា ការនាំខ្លួនជនសង្ស័យតិចតួចមកកាត់ទោស វាជាការមិនបានបំពេញតួនាទីគ្រប់គ្រាន់របស់តុលាការខ្មែរក្រហម។ ការបង្ហាញជនសង្ស័យចំនួនតែពី ៥ ទៅ ១០នាក់ វាមិនគ្រប់គ្រាន់ក្នុងការផ្ដល់យុត្តិធម៌ដល់ប្រជាជនកម្ពុជា ដែលគួរតែទទួលបានយុត្តិធម៌ពេញលេញតាមច្បាប់អន្តរជាតិ។
តុលាការខ្មែរក្រហម បច្ចុប្បន្នកំពុងឃុំឃាំងអតីតមេដឹកនាំជាន់ខ្ពស់ខ្មែរក្រហមចំនួន ៤នាក់ ក្នុងសំណុំរឿង ០០២ រួមមាន នួន ជា, ខៀវ សំផន, អៀង សារី និង អៀង ធីរិទ្ធ។
មន្ត្រីរដ្ឋាភិបាល និងមន្ត្រីតុលាការខ្មែរក្រហម បដិសេធនៅថ្ងៃអង្គារថា រដ្ឋាភិបាលមិនបានជ្រៀតជ្រែកចូលក្នុងតុលាការខ្មែរក្រហមទេ។
ប្រធានផ្នែកកិច្ចការសាធារណៈរបស់តុលាការខ្មែរក្រហម លោក រាជ សម្បត្តិ នៅថ្ងៃអង្គារបានបដិសេធចំពោះការចោទប្រកាន់ថា មានការគាបសង្កត់តុលាការខ្មែរក្រហម មិនឲ្យនាំខ្លួនជនសង្ស័យបន្ថែមមកតុលាការ។
លោក រាជ សម្បត្តិ បានបញ្ជាក់ថា ៖ «គេបានសាទរជាមួយនឹងសាលក្រមហ្នឹង តែពួកក្រុមគាត់ហ្នឹងតាំងពីដើមមក គាត់មិនដែលសាទរទេ! អ៊ីចឹងនេះជាចំណុចវិជ្ជមានខ្លាំងណាស់សម្រាប់តុលាការ។ រឿងរ៉ាវដទៃទៀតដែលគេព្រួយបារម្ភ គេពុំត្រូវសួរទេ ទាក់ទងនឹងការជ្រៀតជ្រែកពីខាងក្រៅអី! យើងត្រូវដឹង នេះគឺជាតុលាការ គេធ្វើអីទៅតាមច្បាប់! អ្នកថា គាត់ចេះតែថាទៅហ្នឹង!»។
អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន មានប្រសាសន៍នៅថ្ងៃអង្គារថា រដ្ឋាភិបាលមិនបានលូកដៃចូលកិច្ចការរបស់តុលាការខ្មែរក្រហម ក្នុងការសម្រេចចិត្តនាំខ្លួនជនសង្ស័យបន្ថែមទេ។ លោកថា អង្គការក្រៅរដ្ឋាភិបាលតែងតែចោទប្រកាន់រដ្ឋាភិបាលកម្ពុជា ប៉ុន្តែការចោទប្រកាន់ទាំងនោះគ្មានការពិតទេ។
ក្រសួងការបរទេសសហរដ្ឋអាមេរិក ស្ថានទូតបារាំង និងជប៉ុន នៅប្រទេសកម្ពុជា កាលពីថ្ងៃទី២៦ កក្កដា បានស្វាគមន៍ការប្រកាសសាលក្រម ឌុច។ សេចក្ដីថ្លែងការណ៍ទាំង ៣ បានសរសើរការងារឯករាជរបស់ចៅក្រមជាតិ និងអន្តរជាតិ ក្នុងការពង្រឹងយុត្តិធម៌តាមលក្ខណៈអន្តរជាតិ៕