សង្គមស៊ីវិលរង់ចាំចម្លើយពីរដ្ឋាភិបាលដើម្បីប្រគល់ញត្តិប្រឆាំងពុករលួយ
ដោយ សុខ សេរី
2008-05-19
សកម្មជនប្រឆាំងអំពើពុករលួយដែលជាសមាជិកនៃសម្ព័ន្ធអង្គការសង្គមស៊ីវិលកម្ពុជា ប្រឆាំងអំពើពុករលួយនោះ កំពុងតែរង់ចាំចម្លើយពីរដ្ឋាភិបាលកម្ពុជាដើម្បីបើកផ្លូវឲ្យពួកគេប្រគល់ញត្តិនឹងស្នាមផ្តិតមេដៃប្រជាពលរដ្ឋខ្មែរជាង ១លាន៩ម៉ឺននាក់ ក្នុងការទាមទារឲ្យរដ្ឋាភិបាលពន្លឿនការធ្វើសេចក្តីព្រាងច្បាប់ប្រឆាំងអំពើពុករលួយ ។
សកម្មជននៃអង្គការសង្គមស៊ីវិលនាំគ្នាដង្ហែក្បួនធ្វើយុទ្ធនាការទាមទារឲ្យរដ្ឋាភិបាលពន្លឿនការធ្វើច្បាប់ប្រឆាំងអំពើពុករលួយកាលពីចុងឆ្នាំ២០០៦ ។
លោក យង់ គឹមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព ដែលជាអង្គការមួយក្នុងចំណោមអង្គការចំនួន៤០ ជាសមាជិកនៃសម្ព័ន្ធនោះ បានមានប្រសាសន៍ប្រាប់វិទ្យុអាស៊ីសេរី ថា ៖ «យើងអត់ទាន់បានចម្លើយថាពេលណាដែលរដ្ឋាភិបាលឲ្យចូលជួប មិនដឹងពីមូលហេតុពិតប្រាកដ ប៉ុន្តែគ្រាន់តែថា អ្វីដែលសំខាន់ហ្នឹងយើងហាក់ដូចជាទន្ទឹងរង់ចាំយូរពេក ក្នុងការឆ្លើយតបនេះ» ។
ការទន្ទឹងរង់ចាំចម្លើយពីរដ្ឋាភិបាលនោះ គឺចាប់តាំងពីខ្លួនបានដាក់សំណើទៅរដ្ឋាភិបាលកាលពីមុនចូលឆ្នាំខ្មែរក្នុងខែមេសា កន្លងទៅ ។
គ្មានប្រភពពីមន្រ្តីរដ្ឋាភិបាលណាមួយអាចបញ្ជាក់អំពីជំហររបស់រដ្ឋាភិបាលថាតើគេនឹងទទួលយកឬមិនទទួលយកញត្តិនិងស្នាមផ្តិតមេដៃនោះ ប៉ុនែ្ត លោក ខៀវ កាញារីទ្ធ មន្រ្តីនាំពាក្យរបស់រដ្ឋាភិបាលកម្ពុជាបានមានប្រសាសន៍ប្រាប់វិទ្យុអាស៊ីសេរីទាក់ទងនឹងបញ្ហាញតិ្តនិងស្នាមផ្ដិតមេដៃនោះថា ៖ «ពីព្រោះឥឡូវហ្នឹង សភាគេចប់ហើយ ហើយទីពីរសេចក្ដីព្រាងច្បាប់ប្រឆាំងអំពើពុករលួយនេះមានហើយ តើមានបានឲ្យយោបល់ថា តើគួរកែកន្លែងណាទេ ។ រួចឆ្នាំទៅមិញ ក៏មិនធ្វើ ម៉េចក៏មកធ្វើឆ្នាំហ្នឹងអ៊ីចឹង?» ។
កាលពីថៃ្ងទី១៦ ខែឧសភា កន្លងទៅថ្មីៗនេះ សកម្មជនប្រឆាំងអំពើពុករលួយប្រមាណ ២០០នាក់ បានដើរដង្ហែញតិ្តនិងស្នាមផ្តិតមេដៃ ជាង១លាន ៩ម៉ឺននាក់ បានប្រគល់ឲ្យសភាជាតិ ដោយជោគជ័យ នៅសល់តែរដ្ឋាភិបាលមួយទៀតប៉ុណ្ណោះ ដែលសកម្មជនទាំងនោះចង់ប្រគល់ញតិ្តនិងស្នាមផ្តិតមេដៃដូចគ្នានោះដែរ ។
កាលពីឆ្នាំ២០០៦ កន្លងទៅ ក្រុមអង្គការក្រៅរដ្ឋាភិបាលបានដាក់ញតិ្តនិងស្នាមផ្តិតមេដៃនោះ ជូនសភាជាតិ និងរដ្ឋាភិបាលរួចម្តងទៅហើយ ដើម្បីទទូចសុំឲ្យពន្លឿនការធ្វើសេចក្តីព្រាងច្បាប់ប្រឆាំងអំពើពុករលួយឲ្យបានឆាប់ ។
សូមរំឭកថា រដ្ឋាភិបាលកម្ពុជាបានសន្យាចំពោះមុខប្រទេសម្ចាស់ជំនួយអន្តរជាតិរយៈពេលជាង ១០ឆ្នាំ មកហើយ ចាប់តំាងពីឆ្នាំ១៩៩៤ មកម៉្លេះ ប៉ុន្តែសេចក្តីព្រាងច្បាប់ប្រឆាំងអំពើពុករលួយនោះ នៅមិនទាន់បានបញ្ជូនមកសភាជាតិដើម្បីអនុម័តនៅទ្បើយទេ ។ ប្រភពបានឲ្យដឹងថា សេចក្តីព្រាងច្បាប់នោះ កំពុងស្ថិតក្នុងដៃរបស់រដ្ឋាភិបាលនៅទ្បើយ រហូតមកដល់ពេលនេះ ។
ប្រទេសកម្ពុជា ជាញឹកញាប់តែងតែរងការរិះគន់ថា មានការរីករាលដាលនៃអំពើពុករលួយក្នុងវិស័យសំខាន់ៗ ដូចជា គយ យោធា នគរបាល ពាណិជ្ជកម្ម វិស័យអប់រំ និងតុលាការ ។
ការសិក្សានានាកន្លងមកបានរកឃើញថា ប្រទេសកម្ពុជាបានបាត់ប្រាក់ចំណូលថវិការដ្ឋរវាងពី ៤០០លានដុល្លារអាមេរិកទៅ ៥០០លានដុល្លារអាមេរិកក្នុងមួយឆ្នាំៗ ដោយសារអំពើគេចពន្ធ និងអំពើល្មើសច្បាប់នានានៃអំពើពុករលួយនោះ ៕
ឧបករណ៍រឿង
|
ស្តាប់សំឡេង |
|
ថតសំឡេង |
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
អត្ថបទដែលទាក់ទង
កងវិស្វកម្មនៅស្រុកបាធាយចោទថា មេរបស់ខ្លួនកិបកេងប្រាក់ឧបត្ថម្ភ
ប៉ូលិសប្រឆាំងការជួញដូរមនុស្សនៅបាត់ដំបងរងការចោទប្រកាន់ថាពុករលួយ
សង្គមស៊ីវិលនិងបក្សនយោបាយគ្រោងប្រជុំពីបញ្ហាពុករលួយ
សង្គមស៊ីវិលនិងការជំរុញឲ្យមានច្បាប់ប្រឆាំងអំពើពុករលួយ
ការក្លែងបន្លំឯកសារអត្តសញ្ញាណនិងអំពើពុករលួយនៅច្រកប៉ោយប៉ែត
ហ៊ុន សែន ព្រមានពីការរឹបអូសទ្រព្យសម្បត្តិពីជនពុករលួយ
បេក្ខជនដាក់ពាក្យសុំធ្វើការជាអ្នករៀបចំបោះឆ្នោតចោទថា មានការទារប្រាក់
ប៉េអឹមស្រុកដូនកែវខេត្តតាកែវជំរិតទារប្រាក់អ្នកលក់ឱសថបុរាណ
រឿងពុករលួយក្នុងការចេញប័ណ្ណឆ្លងដែននៅច្រកប៉ោយប៉ែតត្រូវបានទម្លាយ
ពលរដ្ឋខ្មែរត្អូញត្អែរអំពីការទារប្រាក់នៅច្រកទ្វារប៉ោយប៉ែត
