លោក ទៀ បាញ់ បានអះអាងថា បច្ចុប្បន្នស្ថានការណ៍នៅតាមបន្ទាត់ព្រំដែនគឺស្ថិតនៅស្ងប់ស្ងាត់ជាធម្មតា មិនតែប៉ុណ្ណោះមេបញ្ជាការកងទ័ពទាំងពីរប្រទេសនៅខ្សែត្រៀមជួរមុខនៅព្រំដែនមានជម្លោះបានជួបប្រជុំគ្នាជាប់ជានិច្ច ដើម្បីធ្វើយ៉ាងណារក្សាមិនបង្កឲ្យសង្គ្រាមប្រដាប់អាវុធកើតឡើងជាថ្មីទៀតនៅតាមព្រំដែនប្រទេសទាំងពីរ។
លោក ទៀត បាញ់ មានប្រសាសន៍ដូច្នេះ ៖ «រឿងព្រំដែន និយាយរួមគឺនៅស្ងប់ស្ងាត់នៅឡើយទេ ពិតមែនតែកន្លងមកយើងឃើញមានបញ្ហាប្រទូស្តប្រទាំសគ្នារវាងក្រុងភ្នំពេញ-បាងកក ប៉ុន្តែយើងបានឃើញហើយ ព្រំដែននៅតែស្ងប់ស្ងាត់ទេ។ និយាយឲ្យចំទៅទាហាននៅតែនិយាយគ្នាបាន ទៅមករកគ្នា មានស្អីពិភាក្សាគ្នា រក្សាបានអ្វីដែលយើងហៅថា ចៀសវាងបំផុតកុំឲ្យមានការប៉ះទង្គិចគ្នា នេះជាបញ្ហាដ៏ធំបំផុត។ អត់មានបញ្ហាអីទេ នៅបន្តស្ងប់ស្ងាត់»។
លោក ចន ចនសុន (John Johnson) មន្ត្រីនាំពាក្យស្ថានទូតសហរដ្ឋអាមេរិកប្រចាំទីក្រុងភ្នំពេញ មានប្រសាសន៍ជាភាសាខ្មែរយ៉ាងច្បាស់ថា ជម្លោះព្រំដែនដែលកើតមានរវាងកម្ពុជា-ថៃ ដែលអូសបន្លាយពេលជាយូរនិងកំពុងបន្តកើតមាន សហរដ្ឋអាមេរិកមិនលូកដៃចូលទេ ព្រោះជារឿងទ្វេភាគីរវាងកម្ពុជា-ថៃ ដែលត្រូវដោះស្រាយ ៖ «យើងមិនអាចធ្វើអត្ថាធិប្បាយអំពីរឿងហ្នឹងទេ»។
លោក កុយ គួង អនុរដ្ឋលេខាធិការនិងជាមន្ត្រីនាំពាក្យក្រសួងការបរទេសកម្ពុជា មានប្រសាសន៍ថា ទំនាក់ទំនងរវាងកម្ពុជា-ថៃ គឺស្ថិតនៅធម្មតា បើទោះបីជាប្រទេសទាំងពីរបានដកឯកអគ្គរាជទូតចេញពីប្រទេសរៀងខ្លួនបែបណាក៏ដោយ។
ជម្លោះព្រំដែនកម្ពុជា-ថៃនៅតំបន់ប្រាសាទព្រះវិហារ គឺបានកើតមានឡើងជាថ្មី ក្រោយមួយសប្តាហ៍ ដែលប្រទេសកម្ពុជា បានដាក់បញ្ចូលប្រាសាទព្រះវិហារចូលទៅក្នុងបញ្ជីសម្បត្តិបេតិកភណ្ឌពិភពលោកនៃអង្គការយូណេស្កូ កាលពីថ្ងៃទី៧ ខែកក្កដា ឆ្នាំ២០០៨ កន្លងមក ដែលរហូតមកដល់ពេលនេះជម្លោះនៅតែបន្តកើតមាននៅឡើយ៕