ប្រធានសមាគមអ្នកវាយតម្លៃអចលនវត្ថុជាតិកម្ពុជា លោក សឹង ប៊ុណ្ណា មានប្រសាសន៍ឲ្យដឹងថា ទីផ្សារអចលនទ្រព្យនៅកម្ពុជារហូតមកដល់ឆ្នាំ២០១០នេះ មិនមានអ្នកជំនាញណាមួយហ៊ានវាយតម្លៃពីស្ថានការណ៍ទីផ្សារអចលនទ្រព្យថា មានចលនានៃការទិញដូរបានច្រើនដូចមុនកម្ពុជាជួបវិបត្តិសេដ្ឋកិច្ចពិភពលោកនោះទេ តែលោកមានជំនឿថា ក្នុងរង្វង់២ឆ្នាំទៅមុខទៀតទើបអាចមានសង្ឃឹម។
លោក ប៊ុណ្ណា ឲ្យដឹងថា ទីផ្សារអចលនទ្រព្យក្នុងត្រីមាសទី១ ឆ្នាំ២០១០នេះ ឃើញមានចលនានៃការទិញលក់ខ្លះៗទៅលើដីធ្លីនិងផ្ទះនៅតំបន់មានសក្តានុពលសេដ្ឋកិច្ចនិងមានទីតាំងល្អ។
លោក សឹង ប៊ុណ្ណា បានឲ្យដឹងដូច្នេះ ៖ «នៅដើមត្រីមាសទី១ដើមឆ្នាំ២០១០នេះ ក៏វាមិនមានសកម្មភាពដែរ បានន័យថា វាជាពេលវេលាមួយដែលអ្នកទិញតែកាលណាដល់បាតគេហ៊ានទិញហើយ ក៏ប៉ុន្តែវាជាការទិញដូរដែលមានលក្ខណៈប្រយ័ត្នប្រយែងបំផុត គឺគេទិញតែរបស់ណាដែលមានសក្ដានុពលទេ ដែលមានចំណូល មានទីតាំងល្អ ផ្លូវធំ អ៊ីចឹងវាមានសកម្មភាពមួយចំនួនហើយ»។
ស្ត្រីបម្រើការផ្នែកលក់របស់ក្រុមហ៊ុនព្រីនថោន មានប្រសាសន៍មិនឲ្យបញ្ចេញឈ្មោះឲ្យដឹងថា បច្ចុប្បន្ននេះផ្ទះល្វែងដ៏ប្រណីត មានទីតាំងធំទូលាយនៅជាប់ផ្លូវធំក្នុងបុរីព្រីនថោនលក់មិនដាច់និងពុំមានអ្នកមករកទិញទៀតទេ បើទោះបីមានការបញ្ចុះតម្លៃពិសេសបែបណាក៏ដោយ ៖ «លក់អត់ដាច់ អត់សូវមានភ្ញៀវទិញ ទិញលក់បន្តក៏ស្ងាត់ មូលហេតុសេដ្ឋកិច្ចវាធ្លាក់»។
មន្ត្រីសមាគមអភិវឌ្ឍន៍អចលនទ្រព្យកម្ពុជា លោក គង់ វណ្ណសុធី មានប្រសាសន៍ដោយខ្លីថា ទីផ្សារអចលនទ្រព្យនៅឆ្នាំ២០១០ គឺមិនមានអ្វីខុសគ្នានឹងស្ថានការណ៍នៃការធ្លាក់ចុះតម្លៃទីផ្សារអចលនទ្រព្យកាលពីពាក់កណ្តាលឆ្នាំ២០០៩នោះទេ។ លោកបញ្ជាក់ថា បច្ចុប្បន្ននេះទីផ្សារដីនៅតែមានតម្លៃខ្ពស់ រីឯអ្នករកទិញមានចលនាខ្លះដែរ ប៉ុន្តែចង់បានតម្លៃទាប។ លោក សុធី ឲ្យដឹងថា សកម្មភាពទិញដូរអចលនទ្រព្យនៅប្រទេសកម្ពុជាបច្ចុប្បន្ន គឺមានសកម្មភាពខ្លះៗតែទៅលើផ្ទះមានទីតាំងល្អនិងតម្លៃទាប ចំណែកម្ចាស់ផ្ទះឬដីមិនទម្លាក់តម្លៃ គឺមិនមានអ្នករកទិញឡើយ។
បុគ្គលិកផ្នែកលក់នៃក្រុមហ៊ុនជ័យមង្គល លោកស្រី កែវ សាម៉ាដា មានប្រសាសន៍ឲ្យវិទ្យុអាស៊ីសេរីដឹងថា មកដល់ឆ្នាំ២០១០នេះ ចលនានៃការទិញលក់ផ្ទះនៅបុរីជ័យមង្គលមានចលនាខ្លះៗតែទៅលើអ្នកមករកទិញផ្ទះក្នុងតម្លៃទាបទុកសម្រាប់ធ្វើលំនៅ ប៉ុន្តែសម្រាប់ឈ្មួញមកទិញទុកលក់បន្តមិនមានដូចពេលមុនពិភពលោកជួបវិបត្តិសេដ្ឋកិច្ចហិរញ្ញវត្ថុទៀតឡើយ ទោះបីក្រុមហ៊ុនបានបញ្ចុះតម្លៃទាបបែបណាក៏ដោយ។
ក្រៅពីត្អូញត្អែរពីការលំបាកក្នុងការលក់ផ្ទះល្វែង លោកស្រី សាម៉ាដា បន្តថា ច្បាប់ថ្មីដែលរដ្ឋាភិបាលទើបបង្កើតយកពន្ធទៅលើដីធ្លី ផ្ទះសម្បែង ក៏ជាដើមហេតុធ្វើឲ្យចលនាទិញលក់អចលនទ្រព្យនៅកម្ពុជាគាំងមិនដំណើរការផងដែ។
លោកស្រី កែវ សាម៉ាដា មានប្រសាសន៍ថា ៖ «មនុស្សដែលទិញទុកលក់យកចំណេញហ្នឹងគេអត់ទិញទៀតទេឥឡូវនោះ។ ឥឡូវរដ្ឋាភិបាលគាត់មានគោលការណ៍បង់ពន្ធផ្ទះ បង់ពន្ធអីអ៊ីចឹងអតិថិជនគេរអាចិត្តបន្តិច។ វាមិនដូចមុនទេឥឡូវនេះ តម្លៃក៏ធ្លាក់ចុះ ហើយពិបាកលក់ជាងមុន...»។
ពាក់ព័ន្ធស្ថានភាពទីផ្សារអចលនទ្រព្យនេះ លោក ប៊ុណ្ណា បានព្យាករណ៍ថា ទីផ្សារអចលនទ្រព្យនៅកម្ពុជាអាចនឹងមានតម្លៃនិងចលនាឡើងវិញក្នុងរង្វង់២ឆ្នាំទៀត៕