«យើងខ្ញុំទាំងអស់គ្នាសូមអំពាវនាវដល់សម្ដេច ហេង សំរិន សូមលោកចេញមកមើលប្រជាពលរដ្ឋនៅមុខសភាផង សូមលោកកុំបិទទ្វារអី លោកចេញមកមើលចុះ ប្រជាពលរដ្ឋដីក្រហមគ្រប់គ្នាហូរទឹកភ្នែករហាម» ៖ សម្រែកអំពាវនាវរកការជួយរបស់ប្រជាពលរដ្ឋដែលរងគ្រោះដោយការប្រើអំពើហិង្សាពីក្រុមអាជ្ញាធរនិងក្រុមហ៊ុន 7NG បានឈានដល់ថ្ងៃទី៦ហើយរហូតមកទល់នឹងថ្ងៃព្រហស្បតិ៍កន្លងមកនេះ ប៉ុន្តែមិនទាន់បានទទួលការឆ្លើយតបណាមួយពីមន្ត្រីដឹកនាំរដ្ឋាភិបាលនោះឡើយ។
មន្ត្រីសិទ្ធិមនុស្សបានឲ្យដឹងថា ចាប់តាំងពីមានការប្រើត្រាក់ទ័រឈូសរំលើងផ្ទះនិងការប្រើអំពើហិង្សាវាយដំបង្ក្រាបប្រជាជនឲ្យខ្លាចរអាតាំងពីថ្ងៃទី២៤ មករានោះមក អ្នកបាត់បង់ទីជម្រកនៅតំបន់ដីក្រហមមិនហ៊ានវិលត្រឡប់ទៅនៅលើដីរបស់ខ្លួនវិញឡើយ។
មន្ត្រីមជ្ឈមណ្ឌលសិទ្ធិមនុស្សកម្ពុជា លោក ឈឹម សាវុធ បានថ្លែងថា ក្រុមគ្រួសារអ្នករងគ្រោះទាំងនោះបាននាំគ្នាស្នាក់នៅរាយប៉ាយដែលគ្មានអ្នកណាយកចិត្តទុកដាក់នោះឡើយ។
មន្ត្រីសិទ្ធិមនុស្សនិយាយថា អ្នកខ្លះត្រូវក្រុមសិទ្ធិមនុស្សបានទទួលឲ្យស្នាក់នៅជាបណ្តោះអាសន្ន អ្នកខ្លះត្រូវបង្ខំចិត្តដេកនៅតាមសួនច្បារ និងអ្នកខ្លះត្រូវការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សទទួលឲ្យស្នាក់នៅបណ្តោះអាសន្ន។
លោក ឈឹម សាវុធ បានមានប្រសាសន៍ថា ៖ «សំខាន់បំផុតការរស់នៅជីវភាពរបស់គាត់ផ្ទាល់ដោយសារអត់មានចានឆ្នាំង អត់មានអង្ករមានស្អីអ៊ីចឹង ដល់អ៊ីចឹងគាត់រស់នៅជាមួយគ្នាវាពិបាកមែនទែន ហើយបានខាងអង្គការគាត់ជួយឧបត្ថម្ភជាបន្តបន្តាប់»។
ព្រឹត្តិការណ៍បង្រ្កាបថ្ងៃទី២៤ មករា នៅលើតំបន់ដីក្រហមបានធ្វើឡើងនៅក្បែររដ្ឋសភាចម្ងាយប្រមាណជិត១០០ម៉ែត្រខាងត្បូងអគាររបស់អ្នកតាក់តែងច្បាប់សម្រាប់ប្រទេសកម្ពុជាទាំងមូលនោះ។ ប៉ុន្តែក្រុមអ្នករងគ្រោះបានថ្លែងថា ក្រុមអ្នកធ្វើច្បាប់និងតំណាងប្រជាពលរដ្ឋទូទាំងប្រទេសកម្ពុជានោះ បែរជាមិនអាចជួយធ្វើអន្តរាគមន៍អ្វីជួយដល់អ្នករងគ្រោះដែលមានជាង១៥០គ្រួសារនោះឡើយ។
នៅក្នុងការស្វែងរកក្រុមអ្នកតំណាងរាស្ត្រឲ្យជួយធ្វើអន្តរាគមន៍កាលពីក្នុងសប្តាហ៍នេះ ជនរងគ្រោះម្នាក់ លោក ច័ន្ទ វិចិត្រ បានថ្លែងអង្វរនៅពីមុខអគាររដ្ឋសភាយ៉ាងនេះថា ៖ «អស់លោកដែលជាតំណាងរាស្រ្ដគ្រាន់តែអើតចេញតាមបង្អួចមកគឺឃើញហើយ នៅដីក្រហមឃើញអេស្កាវ៉ាទ័រគេកំពុងតែចាប់បំផ្លាញផ្ទះបងប្អូននៅដីក្រហម។ ឥឡូវនេះសូម្បីតែបាយក៏យើងអត់មានហូបដែរ យើងបានអង្គការក្រៅរដ្ឋាភិបាលគាត់ជួយមួយពេលៗដោះទ័ល។ ឥឡូវនេះយើងអស់រលីងពីខ្លួនហើយ សូម្បីតែចានបែកមួយគេយើងយកមិនបានផង។ សូមអំពាវនាវដល់អស់លោក លោកស្រី ខ្ញុំនិយាយ ខ្ញុំអត់មានភាពក្លាហានដូចមុនទេ ខ្ញុំបានត្រឹមតែឈរមើលគេវ៉ៃកម្ទេចផ្ទះរបស់ខ្លួនឯង ផ្ទះរបស់ប្រជាពលរដ្ឋ។ ឥឡូវនេះយើងអស់ហើយ យើងរលីងរលត់ពីខ្លួនហើយ»។
ក្រុមសិទ្ធិមនុស្សបានរាយការណ៍ថា មានប្រជាជនចំនួនជិត២០នាក់បានរងរបួសក្នុងនោះមាន៥នាក់បានរងគ្រោះយ៉ាងធ្ងន់ធ្ងរ។ ស្ត្រីម្នាក់ដែលមានផ្ទៃពោះ៧ខែត្រូវគេវាយធ្វើបាប ផ្ទះជនរងគ្រោះដែលលក់គ្រឿងទេសត្រូវក្រុមអ្នករុះរើចូលប្លន់យកអីវ៉ាន់តាមចិត្តដោយគ្មានការរារាំងណាមួយពីក្រុមសមត្ថកិច្ចនោះឡើយ។
ស្ត្រីចាស់ជរាម្នាក់ឈ្មោះ ថាច់ រាំង បានមានប្រសាសន៍ទួញសោកយ៉ាងនេះថា ៖ «ខ្ញុំគ្មានដឹងថាវាមកធ្វើបាបអ៊ីចឹងទេ មកធ្វើបាបប្រជាជន ផ្ទះខ្ញុំវាមកវ៉ៃមុនគេ វ៉ៃត្រូវចៅ កូនខ្ញុំទាំងអស់ កូនខ្ញុំ៤-៥នាក់ត្រូវរបួសទាំងអស់គ្នា ហើមជើង ដាច់ជើងឈាមល្ហល្ហាចគ្រប់គ្នាទាំងអស់កូនចៅខ្ញុំ។ ខ្ញុំអាណិតតែចៅខ្ញុំតូចៗនេះ វាដេកមិនបានទេសព្វថ្ងៃនេះ ដេកយំថាឈឺណាស់យាយអើយ ឈឺដេកមិនលក់ទេ ខ្ញុំអាណិតចៅខ្ញុំណាស់លោកអើយ។ សូមសម្ដេច ហ៊ុន សែន ជួយខ្ញុំផង ខ្ញុំស្គាល់សម្ដេចទាំងបី ខ្ញុំសូមគោរពម្រាមដៃ១០ សូមឲ្យសម្ដេចជួយកូនចៅដីក្រហមនេះវេទនាខ្លាំងណាស់ៗ វេទនាប៉ុន្មានខែហើយ លោកអើយជួយខ្ញុំផងៗៗ សម្ដេចទាំង៣ ជួយខ្ញុំផងៗៗ»។
កាលពីថ្ងៃពុធ ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនិងអង្គការ Human Rights Watchដែលមានទីតាំងនៅបុរីញូវយ៉កបានធ្វើការថ្កោលទោសព្រឹត្តិការណ៍ថ្ងៃទី២៤ មករា និងបានស្នើសូមឲ្យរាជរដ្ឋាភិបាលចាត់វិធានការយកជនប្រើអំពើហិង្សានិងរំលោភលើសិទ្ធិទីលំនៅរបស់ប្រជាពលរដ្ឋយកទៅប្រឈមមុខនឹងច្បាប់តុលាការ។
អនុប្រធានប្រចាំការិយាល័យអាស៊ីនៃអង្គការ Human Rights Watch អ្នកស្រី Elaine Pearson បានមានប្រសាសន៍កត់សម្គាល់យ៉ាងនេះថា ៖ "យើងបានទទួលសេចក្តីរាយការណ៍មកថា មានការប្រើឧស្ម័នបង្ហូរទឹកភ្នែកនៅពេលបង្ក្រាបប្រជាជននិងមានការប្រើអំពើហិង្សានានាគំរាមដល់អ្នកស្រុក។ ហើយបើសិនជាមានសកម្មភាពទាំងនោះបានធ្វើចំពោះសហគមន៍អ្នកភូមិទាំងនោះមែន ជនដែលប្រព្រឹត្តមិនថាជាប៉ូលិសឬជាប៉េអឹមដែលប្រព្រឹត្តអំពើហិង្សាត្រូវតែនាំយកទៅកាត់ទោសនៅតុលាការ។ ប្រជាជនដែលរងគ្រោះទាំងនោះបានរស់នៅលើតំបន់ដីក្រហមយូរយារប្រមាណច្រើនទសវត្សមកហើយ ហើយដោយពិតទៅពួកគាត់មានសិទ្ធិរស់នៅលើដីនោះយោងតាមច្បាប់ភូមិបាលឆ្នាំ២០០១។ ដូច្នេះអ្វីដែលចាំបាច់ត្រូវធ្វើឲ្យរាជរដ្ឋាភិបាលអនុវត្តច្បាប់ជាជាងការប្រកាន់ទំនោរកាន់ជើងចំពោះក្រុមហ៊ុន 7NG នោះ"។
គួររំឭកផងដែរថា ព្រឹត្តិការណ៍ជម្លោះដីនៅតំបន់ដីក្រហមបានកើតតាំងពីចុងឆ្នាំ២០០៥ដែលពេលនោះមានអ្នករស់នៅទីនោះចំនួនជាង១០០០គ្រួសារ។ ក្រុមសិទ្ធិមនុស្សបានរាយការណ៍ថា ក្រុមហ៊ុន 7NG គ្រោងយកដីអ្នកភូមិទាំងនោះធ្វើជាតំបន់អភិវឌ្ឍន៍សេដ្ឋកិច្ច ប៉ុន្តែមិនមានសេចក្តីរាយការណ៍ច្បាស់លាស់អំពីគម្រោងលម្អិតនោះទេ។ នាពេលនេះទីបរិវេណដែលគេបណ្តេញប្រជាជនចេញត្រូវគេបិទច្រកមិនឲ្យមានមនុស្សចេញចូលនោះឡើយ។
ក្រុមជនរងគ្រោះកាលពីថ្ងៃព្រហសប្បតិ៍ ទី២៩ មករា បាននាំគ្នាធ្វើដំណើរទៅកាន់គេហដ្ឋានលោកនាយករដ្ឋមន្ត្រី ហ៊ុន សែន នៅទីក្រុងតាខ្មៅ ហើយបានដាក់ញត្តិមួយក្នុងបំណងរកការជួយពីលោកនាយករដ្ឋមន្ត្រី ហ៊ុន សែន នោះ។ ហើយរហូតមកទល់នឹងយប់ថ្ងៃព្រហស្បតិ៍គេនៅមិនទាន់ឃើញមានការឆ្លើយតបណាមួយពីលោកនាយករដ្ឋមន្រ្តី ហ៊ុន សែន នោះនៅឡើយ៕