មន្ត្រីសង្គមស៊ីវិល រួមជាមួយអ្នកវិភាគស្ថានការណ៍នយោបាយ និងព្រំដែនមួយចំនួននៅកម្ពុជា បានចាត់ទុកកិច្ចប្រជុំគណៈកម្មការចម្រុះព្រំដែន (JBC) និងគណៈកម្មការព្រំដែនទូទៅ (GBC) កម្ពុជា-ថៃ នៅប្រទេសឥណ្ឌូណេស៊ីមានប្រធានអាស៊ានជាអាជ្ញាកណ្ដាល នាខែមីនានេះ មិនអាចជំរុញច្រានឲ្យស្ថានការណ៍ព្រំដែនតំបន់មានជម្លោះធូរស្រាលបានទេ។
លោក រ៉ុង ឈុន តំណាងក្រុមប្រឹក្សាឃ្លាំមើលព្រំដែន បានផ្ដល់បទសម្ភាសន៍ឲ្យវិទ្យុអាស៊ីសេរីដឹងនៅថ្ងៃទី១៣ ខែមីនាថា កិច្ចប្រជុំ JBC និង GBC នៅទីក្រុងប៊ូហ្គ័រ មិនអាចរកដំណោះស្រាយបញ្ចប់ជម្លោះព្រំដែនកម្ពុជា-ថៃបានទេ។
តាមលោក រ៉ុង ឈុន កិច្ចប្រជុំបន្ធូរបន្ថយជម្លោះព្រំដែនកម្ពុជា-ថៃ ដែលមានប្រធានអាស៊ានជាអាជ្ញាកណ្ដាល នៅទីក្រុងប៊ូហ្គ័រ ប្រទេសឥណ្ឌូណេស៊ី នាខែមីនានេះ អាស៊ានមិនមានអំណាចបរិបូរណ៍សម្រាប់បញ្ចប់ជម្លោះព្រំដែននេះទេ ៖ «គេមានល្បិចកលច្រើនណាស់ ពីព្រោះគេមានមហិច្ឆតាចង់ឈ្លានពាន ហើយគេចង់អូសបន្លាយស្ថានភាពបញ្ហាព្រំដែននេះ ភ្ជាប់ទៅនឹងស្ថានភាពនយោបាយក្នុងស្រុកគេ»។
លោក រ៉ុង ឈុន បានគូសបញ្ជាក់ថា យន្តការល្អសម្រាប់បញ្ចប់ជម្លោះព្រំដែនតំបន់កម្ពុជា-ថៃ ត្រូវលើកយកជម្លោះនេះ ដាក់ទៅតុលាការអន្តរជាតិ ឲ្យបកស្រាយខ្លឹមសារនៃសាលក្រមទីក្រុងឡាអេ ឆ្នាំ១៩៦២ ជំនួសវិញ ទើបប្រសើរ។
ស្រដៀងគ្នាដែរ លោកសាស្ត្រាចារ្យបណ្ឌិត សុខ ទូច អ្នកជំនាញវិទ្យាសាស្ត្រនយោបាយកម្ពុជា នៃរាជបណ្ឌិតសភាកម្ពុជា មិនរំពឹងទេថា កិច្ចប្រជុំគណៈកម្មការចម្រុះព្រំដែន និងគណៈកម្មការព្រំដែនទូទៅនាសប្ដាហ៍ខាងមុខនេះ មានលទ្ធផលអាចជំរុញឈានដល់ការបោះបង្គោលព្រំដែនប្រកបដោយសន្តិវិធីទេ ៖ «ចំណុចក្រោយ គឺយើងមានតែប្រមូលដៃគូអ្នកណាដែលយល់ថា បញ្ហាកម្ពុជានេះ ជាការត្រឹមត្រូវដែលភាគីកម្ពុជាគោរពទៅតាមគោលការណ៍ច្បាប់។ ប៉ុន្តែវាទាក់ទងទៅនឹងនយោបាយការបរទេសមួយ ដែលនិយាយថា គ្មានមិត្ត គ្មានសត្រូវ។ ចំណុចនេះមហាអំណាចចិន ក៏ដើរតាមផ្លូវហ្នឹង សហរដ្ឋអាមេរិក ក៏ដើរតាមផ្លូវហ្នឹងដែរ ដែលធ្វើឲ្យលំបាកនឹងទាញយកប្រទេសអាស៊ានធ្វើជាដៃគូសម្រាប់ធ្វើជាសាក្សីក្នុងការប្ដឹងទៅអង្គការសហប្រជាជាតិ ដែលផលប្រយោជន៍ប្រទេសទាំងអស់នោះមានច្រើននៅក្នុងប្រទេសថៃ»។
យ៉ាងនេះក្ដី លោកទេសរដ្ឋមន្ត្រី វ៉ា គីមហុង មន្ត្រីទទួលបន្ទុកកិច្ចការព្រំដែនកម្ពុជា បានឲ្យវិទ្យុអាស៊ីសេរីដឹងនៅថ្ងៃទី១៣ ខែមីនាថា កិច្ចប្រជុំ JBC ដែលនឹងរៀបចំនៅថ្ងៃទី២៤-២៥ ខែមីនា ប្រទេសកម្ពុជាបានត្រៀមឯកសារសំខាន់ៗមួយចំនួន សម្រាប់ប្រើជាឧបករណ៍រុករកបង្គោលព្រំដែនជាដើម ៖ «យើងមានបញ្ហាមួយចំនួនដែលយើងត្រូវដាក់លើតុចរចា អ្វីដែលយើងមិនបានធ្វើរហូតមកដល់សព្វថ្ងៃ ដូចជាការធ្វើផែនទីតាមរូបថតអាកាស នៅតាមបណ្ដោយព្រំដែន សម្រាប់ជួយក្នុងការរុករកបង្គោលព្រំដែន»។
ទោះជាបែបនេះ លោកទេសរដ្ឋមន្ត្រីថា រហូតមកដល់ពេលនេះ ខាងភាគីថៃក៏មិនទាន់មានការឆ្លើយតបជាផ្លូវការមកកម្ពុជា ឬទៅកាន់ប្រទេសឥណ្ឌូណេស៊ី ស្ដីពីកិច្ចប្រជុំនេះនៅឡើយទេ។
ប៉ុន្តែយោងតាមទីភ្នាក់ងារសារព័ត៌មានថៃ (TNA) កាលពីថ្ងៃទី១០ ខែមីនា បានដកស្រង់សម្ដីលោកអាប់ភីស៊ីត វាចាជីវ៉ាក់ (Abhisit Vijjajiva) នាយករដ្ឋមន្ត្រីថៃ មកចុះផ្សាយឲ្យដឹងថា ភាគីថៃបានត្រៀមលក្ខណៈរួចហើយ សម្រាប់ចូលរួមតុប្រជុំគណៈកម្មការចម្រុះព្រំដែន JBC រវាងកម្ពុជា-ថៃ នៅឥណ្ឌូណេស៊ី ក្នុងខែមីនានេះ។
លោក វ៉ា គឹមហុង ឲ្យដឹងថា បង្គោលព្រំដែនកម្ពុជា-ថៃ មានចំនួនសរុប ៧៣បង្គោល។ ក្នុងនោះមាន ៣៣បង្គោល ប្រទេសទាំងពីរបានឯកភាពជាមួយគ្នា។ មាន១៥បង្គោលមិនទាន់បានឯកភាព និង២៥បង្គោលមិនទាន់បានរកឃើញនៅឡើយ៕