ការប្រកាសបដិសេធពីមន្ត្រីនៃរដ្ឋាភិបាលកម្ពុជានេះ បន្ទាប់ពីមានសារព័ត៌មានថៃ មួយឈ្មោះ ឌឹ ណេហ្សិន (The Nation) ដែលចេញផ្សាយនៅថ្ងៃចន្ទ ទី១១ ខែតុលា ដោយដកស្រង់ប្រសាសន៍លោកវរសនីយ៍ទោ ផាយ៉ៅ ថោងសែន (Payao Thongsen) មន្ត្រីទទួលបន្ទុកខាងស៊ើបអង្កេតផ្នែកភេរវកម្មនិយាយថា គាត់បានសួរចម្លើយក្រុមថៃអាវក្រហម ១១នាក់ ដែលប៉ូលិសថៃចាប់បាននៅខេត្តឈៀងម៉ៃ ហើយពួកគេបានឆ្លើយថា កម្ពុជាបានបង្ហាត់បច្ចេកទេសធ្វើសឹកសង្គ្រាមដល់ពួកថៃចំនួន ៣៩នាក់។
ក្រុមអាវក្រហមនោះបានឆ្លើយថា ថៃចំនួន ២៨ បានធ្វើដំណើរទៅខេត្តសៀមរាប ដើម្បីទទួលការហ្វឹកហាត់ក្នុងរយៈពេល ៣អាទិត្យ ហើយជនជាតិថៃចំនួន ៣៥នាក់បានវិលត្រឡប់ទៅប្រទេសថៃវិញ ក្នុងខែសីហាកន្លងទៅ បន្ទាប់ពីបានហ្វឹកហាត់រួច។
លោកវរសនីយ៍ទោ ផាយ៉ៅ ថោងសែន បន្តថា ក្រុមថៃទាំងនេះ ត្រូវបានគេបង្ហាត់ឲ្យស្អប់ក្រុមញាតិវង្សានុវង្សស្តេចថៃ ឲ្យចេះប្រើអាវុធច្រើនយ៉ាង រួមទាំងគ្រាប់បែកផង។
ទាក់ទិននឹងបញ្ហានេះ លោក កុយ គួង មន្ត្រីនាំពាក្យក្រសួងការបរទេសកម្ពុជា បានអធិប្បាយពីការចោទប្រកាន់របស់ភាគីថៃ តាមរយៈសារព័ត៌មាននេះថា ជាទង្វើដដែលៗ ពុំមានមូលដ្ឋានច្បាស់លាស់ និងពុំមានការទទួលខុសត្រូវ ៖ «កម្ពុជាតែងតែប្រកាន់ភ្ជាប់នូវរដ្ឋធម្មនុញ្ញរបស់ខ្លួន ជាពិសេសមាត្រាទី៥៣ ដែលមិនអនុញ្ញាតឲ្យមានកងទ័ពបរទេសណាបោះទីតាំងនៅលើទឹកដីរបស់ខ្លួនទេ ដូច្នេះការលើកឡើងរបស់ភាគីថៃថា មានក្រុមអាវក្រហមមកហ្វឹកហ្វឺនហាត់បាញ់អាវុធនៅលើទឹកដីកម្ពុជានោះ គឺជារឿងមិនពិតទេបាទ…!»។
លោក កុយ គួង បន្តថា នេះជាការទម្លាក់កំហុសមកឲ្យកម្ពុជា នៅពេលដែលប្រទេសថៃខ្លួនឯងពុំមានលទ្ធភាពដោះស្រាយជម្លោះផ្ទៃក្នុងរបស់ខ្លួនបាននោះ។ លោកសំណូមពរថា ភាគីថៃគួរបញ្ឈប់ជាបន្ទាន់នូវទង្វើដែលតែងតែព្យាយាមទម្លាក់កំហុសលើអ្នកដទៃ ហើយព្យាយាមដោះស្រាយវិបត្តិផ្ទៃក្នុងរវាងថៃ និងថៃគ្នាឯងឲ្យបានល្អទើបជាការប្រសើរ៕