ថ្លែងប្រាប់វិទ្យុអាស៊ីសេរីនៅថ្ងៃទី១៧ កក្កដានេះ លោក ម៉េវ សាម៉េត អះអាងថាការទិញក្របី១៤នោះមានលិខិតអនុញាតពីលោកមេភូមិ និងលោក ខ្លូត សារី ប្រធានការិយាល័យបសុសត្វស្រុកព្រះនេត្រព្រះត្រឹមត្រូវ ប៉ុន្តែខាងមន្ត្រីកសិកម្មខេត្តនៅតែចោទថា លិខិតនោះពុំមានឯកសារគ្រប់គ្រាន់ ។
លោក ម៉េវ សាម៉េត បានឲ្យដឹងថា ៖ «ខ្ញុំអ្នកទិញមិនមែនជួញដូរឆ្លងប្រទេសទេ ទិញប្រើប្រាស់ស្រុកខ្មែរយើង ស្រុកព្រះនេត្រព្រះហ្នឹងឯង ។ ក្របី១៤ក្បាលខ្ញុំទិញតពីស្វាយចេកមក គេចាប់ជំរិតយកតែម្ដង» ។
លោក ម៉េវ សាម៉េត បានបន្តថាកាលពីថ្ងៃទី១៥ កក្កដា សត្វក្របីចំនួន១៤ក្បាលនោះ លោកបានទិញមកពីអ្នកផ្សេងនៅស្រុកស្វាយចេក ហើយក្នុងខេត្តបន្ទាយមានជ័យ ហើយលក់ទៅឲ្យអ្នកផ្សេងទុកសម្រាប់ភ្ជួរស្រែនៅក្នុងស្រុកព្រះនេត្រព្រះ ត្រូវបានកងកម្លាំងអាជ្ញាធរប៉េអឹមចាប់បញ្ជូនទៅមន្ទីរកសិកម្មខេត្តបន្ទាយមានជ័យជំរិតទារលុយ១០លានរៀល ហើយព្រមទទួលយក៤លានរៀលវិញក្រោយពីមានការអង្វរករ ។
លោក អូច សាវន ប្រធានការិយាល័យផលិតកម្មបសុសត្វនៃមន្ទីរកសិកម្មខេត្តបន្ទាយមានជ័យ បានថ្លែងថាលុយចំនួន៤លានលោកបានទទួលមែន ប៉ុន្តែមិនមានជាការជំរិតទេគឺជាការអនុវត្តច្បាប់ ។
លោក អូច សាវន បានមានប្រសាសន៍ថា ៖ «មិនមែនជាការជំរិតទេ គឺការអនុវត្តវិធានការច្បាប់ អ៊ីចឹងក៏យើងទទួលប្រាក់៤លានជាការផាកពិន័យមិនមែនយើងជំរិតទេ» ។
លោកបន្តថាការផាកពិន័យនេះគឺផ្អែកលើអនុក្រឹត្យរាជរដ្ឋាភិបាលលេខ១៦ មាត្រា៩ និងយោងមាត្រា៦១, ៦២ នៃច្បាប់គ្រប់គ្រងសុវត្ថិភាព ហើយថាការចេញលិខិតអនុញ្ញាតរបស់លោក ខ្លូត សារី គឺជាខុសច្បាប់ ។
លោក ខ្លូត សារី ប្រធានការិយាល័យស្រុកព្រះនេត្រព្រះខេត្តបន្ទាយមានជ័យ បានមានប្រតិកម្មថាការចេញលិខិតអនុញ្ញាតឲ្យមានការចរាចរសត្វពាហនៈក្នុងស្រុកព្រះនេត្រព្រះ គឺមិនមែនជាការខុសច្បាប់ទេ ព្រោះមូលដ្ឋានស្រុកព្រះនេត្រព្រះស្ថិតនៅក្រោមការគ្រប់គ្រងរបស់លោក ។
លោក ខ្លូត សារី បានបញ្ជាក់ថា ៖ «បើថាខ្ញុំចេញក្រៅពីស្រុកខ្ញុំអាហ្នឹងបានថាខ្ញុំរំលោភសិទ្ធិថ្នាក់ខេត្ត» ។
លោក ស៊ុម ចាន់គា មន្ត្រីអង្គការការពារសិទ្ធិមនុស្សអាដហុកប្រចាំខេត្តបន្ទាយមានជ័យ បានថ្លែងថាករណីខាងលើនេះប្រៀបបានជាការចាប់ជំរិត ហើយរូបភាពបែបនេះមិនគួរកើតមាននោះទេ ។
លោក ស៊ុម ចាន់គា បានមានប្រសាសន៍ថា ៖ «អាហ្នឹងគឺជាអំពើចាប់ជំរិតមួយហើយ ។ បបូរមាត់លោកថាហ្នឹងមិនគួរណាកើតមានទេ» ។
ទោះជាយ៉ាងណាក៏ដោយ លោក ខ្លូត សារី ប្រធានការិយាល័យបសុសត្វស្រុកព្រះនេត្រព្រះ បានថ្លែងថា លោក ម៉េវ សាម៉េត គួរទទួលបានការព្រមានអប់រំតាមការចែងរបស់ច្បាប់ ពីព្រោះសត្វក្របីទាំងនោះគាត់ទិញយកទុកភ្ជួរស្រែ មិនជួញដូរដូចក្រុមហ៊ុនដែលមានអាជ្ញាប័ណ្ណនោះទេ ៕