មន្ត្រីតុលាការបំភ្លឺការចោទថាមានអំពើពុករលួយនៅពន្ធនាគារខេត្តកំពង់ឆ្នាំង
pb.mp3
ព្រះរាជអាជ្ញាអមសាលាដំបូងខេត្តកំពង់ឆ្នាំង បានឲ្យដឹងថា តាមការចុះពិនិត្យផ្ទាល់នៅពន្ធនាគារពុំឃើញមានចំណុចទាំងឡាយដូចការចោទប្រកាន់របស់អ្នកទោសដែលចេញពីពន្ធនាគារផ្ដល់ឲ្យប្រព័ន្ធផ្សព្វផ្សាយនោះទេ។
លោក ពេញ វិបុល ជាព្រះរាជអាជ្ញាអមសាលាដំបូងខេត្តកំពង់ឆ្នាំង។ លោកបានឲ្យដឹងនៅព្រឹកថ្ងៃទី៧ សីហា បន្ទាប់ពីវិទ្យុអាស៊ីសេរី បានផ្សាយព័ត៌មានថា មានអំពើពុករលួយនៅក្នុងពន្ធនាគារខេត្តកំពង់ឆ្នាំង នៅព្រឹកថ្ងៃទី៦ សីហា លោកបានសហការជាមួយអង្គការលីកាដូ ចុះទៅត្រួតពិនិត្យស្ថានភាពក្នុងពន្ធនាគារនេះ។
លោកបន្តថា តាមការពិនិត្យ និងស្រាវជ្រាវពុំឃើញមានបញ្ហាណាមួយកើតមានដូចការចោទប្រកាន់របស់អ្នកទោសដែលចេញពីពន្ធនាគារបានផ្ដល់ឲ្យប្រព័ន្ធផ្សព្វផ្សាយនោះទេ។ យ៉ាងនេះក្ដីករណីខ្លះលោកថា លោកនឹងបន្តធ្វើការស្រាវជ្រាវបន្ថែមទៀត ដូចជាករណីការប្រើប្រាស់សេវាទូរស័ព្ទ និងការនាំស្រីពេស្យាចូលក្នុងពន្ធនាគារជាដើម។
លោក ពេញ វិបុល៖ «អ្នកទោសគឺគេបែងចែកទៅតាមកម្រិតទោសឧក្រិដ្ឋ នៅតាមឧក្រិដ្ឋមជ្ឈិម នៅតាមមជ្ឈិម ដល់អ៊ីចឹងទៅអ្នកមិនដឹងថាគេបែងចែកវណ្ណៈអ្នកទោស មិនមែនទេ។ គេមិនគិតថា អ្នកមាន ឬអ្នកក្រអីទេ។ អត់មានការបែងចែកវណ្ណៈដូចការចោទប្រកាន់របស់អ្នកទោសដែលទើបតែចេញពីពន្ធនាគារនោះទេ...»។
កាលពីថ្ងៃទី៤ សីហា ទណ្ឌិតរួចផុតពីទោសម្នាក់ដែលសុំមិនបញ្ចេញឈ្មោះបានឲ្យដឹងថា ក្នុងពន្ធនាគារមានការបែងចែកវណ្ណៈអ្នកទោស ដូចជាប្រភេទអ្នកទោសដែលជាប់ពន្ធនាគារដោយសាររឿងលួចឆក់កំប៉ិកកំប៉ុក ពោលគឺអ្នកទោសក្រីក្រមានជីវភាពត្រដាបត្រដួស បរិភោគបាយដែលដាំដោយអង្ករប្រភេទអន់ដូចបាយជ្រូក។ ចំណែកអ្នកទោសដែលមានលុយបង់ប្រចាំខែឲ្យអ្នកដឹកនាំពន្ធនាគារ មិនត្រឹមតែបរិភោគបាយអង្ករល្អឈ្ងុយឆ្ងាញ់ប៉ុណ្ណោះទេ តែអាចប្រើប្រាស់ទូរស័ព្ទហៅចេញទៅខាងក្រៅបានដោយសេរី និងមានបន្ទប់ឯកជនទៀតផង៖ «អ្នកទោសឈឺអត់មានថ្នាំទេ កេងលើថ្នាំអ្នកទោស ហើយអង្ករគេឲ្យស៊ីអង្ករនាងមិញ គេដូរឲ្យស៊ីអង្ករក្រហម ឯការដេកវិញ បើគេអ្នកមានលុយបង់ គឺមានបន្ទប់គ្រែពូកមានកង្ហារ...»។
អនុប្រធានពន្ធនាគារខេត្តកំពង់ឆ្នាំង លោក ឈុន ផល្លី បានបដិសេធការចោទប្រកាន់ទាំងនេះ។ លោកពន្យល់ថា ការលើកឡើងបែបនេះ គឺជាការមួលបង្កាច់របស់ទណ្ឌិតដែលបានចេញពីពន្ធនាគារ ព្រោះពេលជាប់ក្នុងពន្ធនាគារគាត់មិនពេញចិត្តចំពោះវិន័យ និងវិធីអប់រំកែប្រែរបស់ពន្ធនាគារ។
លោកថាករណីចោទប្រកាន់ទាំងនេះមិនអាចកើតមានក្នុងពន្ធនាគារនោះទេ៖ «យើងមិនអាចធ្វើដូចពាក្យចោទប្រកាន់របស់គាត់បានទេ ព្រោះយើងនៅកៀកតុលាការ ហើយក៏មានការត្រួតពិនិត្យពីព្រះរាជអាជ្ញាជាប្រចាំ។ មិនតែប៉ុណ្ណោះ ខាងអគ្គនាយកដ្ឋានពន្ធនាគារក៏តែងតែចុះមកធ្វើការត្រួតពិនិត្យ ហើយអង្គការលីកាដូ ក៏តែងតែតាមដានជាប់ជាប្រចាំផងដែរ យើងមិនអាចធ្វើអ្វីខុសឆ្គងបានទេបង!»។
ទាក់ទិនចំពោះបញ្ហានេះ មន្ត្រីសម្របសម្រួលអង្គការលីកាដូ ខេត្តកំពង់ឆ្នាំង លោក គង់ ច័ន្ទមុនី សុំមិនធ្វើអត្ថាធិប្បាយចំពោះការចោទប្រកាន់របស់ទណ្ឌិតដែលបានចេញពីពន្ធនាគារនោះទេ។ លោកថា នេះជាសិទ្ធិក្នុងការបញ្ចេញមតិរបស់ជនគ្រប់រូបដែលត្រូវបានគាំទ្រដោយរដ្ឋធម្មនុញ្ញ។
របាយការណ៍របស់អង្គការលីកាដូ បង្ហាញថា គិតត្រឹមខែឧសភា ឆ្នាំ២០១២ ពន្ធនាគារខេត្តកំពង់ឆ្នាំង មានផ្ទុកអ្នកទោសចំនួន ៤៣៦នាក់ កើនឡើង ១០០នាក់ធៀបនឹងខែដដែលនៃឆ្នាំ២០១១។
យ៉ាងនេះក្ដី ទំហំផ្ទុកនៃពន្ធនាគារនេះក៏មានការកើនឡើងដល់ ៣៥០នាក់ បើធៀបទៅនឹងឆ្នាំ២០១១ ដែលទំហំផ្ទុកបានតែ ១៥០នាក់នោះ ដោយពន្ធនាគារនេះបានកសាងបន្ថែមបានអាគារចំនួន ២ ក្រោមជំនួយរបស់អង្គការស៊ីស៊ីជេប (CCJEP) ប្រទេសអូស្ត្រាលី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
