លោក យ៉ង ភីរម្យ មានប្រសាសន៍ដូច្នេះថា ៖ «រឿងបាញ់ហ្នឹង តាមពិត យើងអត់មានខុសទេ ព្រោះយើងនៅកន្លែងរបស់យើង អ៊ីចឹងបើសិនជាគេចូលមកយកទ្រព្យសម្បត្តិហ្នឹងទៅហើយ អាហ្នឹងគិតថាវាជាចោរហើយ អ៊ីចឹងបើខ្ញុំបាញ់ងាប់ អាហ្នឹងទៅជារឿងប្លន់ហើយ ព្រោះគេចូលក្នុងដីរបស់ខ្ញុំ ផ្ទះរបស់ខ្ញុំហើយហ្នឹង។ បើសិនជាគាត់ចូលមកយប់ មុនម៉ោង៦ព្រឹក ប្រហែលជាមានការបាញ់មនុស្សតែម្ដង»។
កាលពីវេលាម៉ោង ៦ និង ១០នាទីព្រឹកថ្ងៃទី១៣ កញ្ញា ប្រជាពលរដ្ឋចំនួន ១៥នាក់ បានលើកគ្នាសម្រុកចូលទៅទីស្នាក់ការបរិស្ថាន ដណ្ដើមយករទេះនិងក្របីមួយនឹម ដែលមន្រ្តីបរិស្ថានបានចាប់រក្សាទុក ប៉ុន្តែត្រូវបានមន្រ្តីបរិស្ថានយកកាំភ្លើងអាកាបត់ បាញ់គំរាមបង្ហើរលើក្បាលចំនួន ២គ្រាប់។
វិទ្យុអាស៊ីសេរី មិនអាចទំនាក់ទំនងសុំប្រតិកម្មពីប្រជាពលរដ្ឋទាំង១៥នាក់នោះបានទេ ប៉ុន្តែ លោក ហុក ហឿត អធិការរងស្រុកសំឡូត បានបញ្ជាក់ថា ម្ចាស់រទេះក្របី ឈ្មោះ តូ កឿន អាយុ ៤២ឆ្នាំ និងប្រជាពលរដ្ឋដទៃទៀត រស់នៅភូមិឆករកា ឃុំសំឡូត បានមកសុំបង់លុយ ៦០ម៉ឺនរៀល ឲ្យទៅមន្ត្រីបរិស្ថាន ដើម្បីដោះដូរយករទេះនិងក្របីមួយនឹម ប៉ុន្តែមន្ត្រីបរិស្ថានមិនព្រម ហើយទាមទារឲ្យបងលុយចំនួន២លានរៀល។
លោក តុល ផន នាយសង្កាត់រដ្ឋបាលព្រៃឈើស្រុកសំឡូត បានថ្លែងថា ក្រុមមន្ត្រីបរិស្ថានគួរអប់រំចំពោះប្រជាពលរដ្ឋទាំងនោះ ៖ «គួរតែព្រមានគាត់សិន ធ្វើកិច្ចសន្យាអីអ៊ីចឹង ព្រោះអីសុទ្ធតែអ្នកស្រុកនៅហ្នឹងទាំងអស់»។
ទោះជាយ៉ាងនេះក្តី លោក យ៉ង ភីរម្យ បានថ្លែងថា មន្ត្រីរបស់លោកគ្រាន់តែអនុវត្តតាមច្បាប់។
កាលពីថ្ងៃអាទិត្យម្សិលមិញ លោក បែន សុវណ្ណ អភិបាលរងស្រុកសំឡូត បានមានប្រសាសន៍ថា សាលាស្រុកនិងកោះប្រជុំដើម្បីដោះស្រាយពីបញ្ហាការបាញ់គំរាម ដែលកើតឡើងដោយសារតែជម្លោះចាប់ឈើ ប៉ុន្តែ លោក យ៉ង ភីរម្យ ប្រធានស្នាក់ការបរិស្ថានប្រចាំស្រុកសំឡូតបានថ្លែងថា លោកមិនទាន់បានទទួលការកោះនោះទេ។
សូមបញ្ជាក់ថា ឈើពីរសន្លឹកដែលមន្ត្រីបរិស្ថានចាប់ទារលុយ២លានរៀលនោះ ជាប្រភេទឈើធ្នង់ មានបណ្តោយប្រវែង២ម៉ែត្រ ទំហំ ៣០សង្ទីម៉ែត្រ គុណនឹង ១០សង្ទីម៉ែត្រ និងមួយសន្លឹកទៀត ទំហំ ៨០សង្ទីម៉ែត្រគុណនឹង ១០សង្ទីម៉ែត្រ បច្ចុប្បន្នកំពុងរក្សាទុកនៅទីស្នាក់ការរបស់មន្ត្រីបរិស្ថានក្រោយពីចាប់។ ចំណែកឯ រទេះ១ និងក្របីមួយនឹមត្រូវបានប្រជាពលរដ្ឋយកចេញទៅវិញហើយ៕