មន្ត្រីតម្រួតព្រំដែននៅរតនគិរីត្រូវគេកាត់ឈ្មោះព្រោះតវ៉ារឿងប្រាក់ខែ?
ដោយ រដ្ឋា វិសាល
2008-11-20
ពលបាលត្រីមួយរូបដែលបម្រើការងារជាតម្រួតព្រំដែនជិត១០ឆ្នាំនៃវរការពារព្រំដែន២០៣ ប្រចាំស្នងការដ្ឋានប៉ូលិសខេត្តរតនគិរី អំពាវនាវចំពោះមន្ត្រីជាន់ខ្ពស់ក្រសួងមហាផ្ទៃឲ្យស្វែងរកយុត្តិធម៌ ចំពោះអ្វីដែលគាត់អះអាងថា ត្រូវបានគេកាត់ឈ្មោះចេញពីបញ្ជីក្របខ័ណ្ឌទាក់ទិនទៅនឹងការតវ៉ា អំពីប្រាក់បៀវត្សច្រើនខែដែលមេប៉ុស្តិ៍មិនបើកឲ្យ។
សេចក្តីអំពាវនាវនេះធ្វើឡើងតាមរយៈសមាគមការពារសិទ្ធិមនុស្សអាដហុកខេត្តរតនគិរីកាលពីដើមសប្តាហ៍នេះដើម្បីជួយអន្តរាគមន៍សុំឲ្យមានការស៊ើបអង្កេតក្នុងករណីនេះ។
ពលបាលត្រី សេង វណ្ណៈ ដែលអះអាងថាជាអ្នករងនូវអំពើរំលោភនិយាយថា ប្រាក់បៀវត្សចំនួន៥ខែជាប់គ្នាពីខែមករាដល់ខែឧសភា ឆ្នាំ២០០៨ មិនត្រូវបានបើក ហើយបន្ទាប់ពីការតវ៉ានាយប៉ុស្តិ៍បានឲ្យគាត់បើកបៀវត្សពីរខែ និងចោទប្រកាន់ថាមិនគោរពវិន័យដើរសេរី ហើយតម្រូវឲ្យធ្វើកិច្ចសន្យាក៏ប៉ុន្តែគាត់មិនយល់ព្រមទើបប្តឹងទៅមេបញ្ជាការវរការពារព្រំដែន ក៏ប៉ុន្តែមិនមានដំណោះស្រាយហើយរហូតដល់ខែវិច្ឆិកានេះទើបដឹងថាឈ្មោះគាត់ត្រូវបានកាត់ចេញពីបញ្ជីក្របខ័ណ្ឌប៉ូលិស។
លោក សេង វណ្ណៈ បានឲ្យដឹងថា ៖ «ខ្ញុំសូមឲ្យជួយរកយុត្តិធម៌ឲ្យខ្ញុំ បើខ្ញុំអត់បានសេរីទេ មេប៉ុស្តិ៍ថាខ្ញុំសេរី ឲ្យខ្ញុំធ្វើកិច្ចសន្យាឲ្យគាត់ រយៈពេល៥ខែ បើកពីរខែឲ្យខ្ញុំ ដល់ពេលអ៊ីចឹងខ្ញុំអត់ព្រម»។
តាមកំណត់ហេតុធ្វើឡើងដោយមន្ត្រីសមាគមអាដហុកខេត្តរតនគិរីពលបាលត្រី សេង វណ្ណៈ បម្រើការងារនៅប៉ុស្តិ៍ការពារព្រំដែន៥០១ មានទីតាំងនៅភូមិតាង៉ា ឃុំញ៉ាង ស្រុកអណ្តូងមាស។
កាលពីពាក់កណ្តាលខែមីនា ឆ្នាំ២០០៨ លោកបានសុំច្បាប់រៀបអាពាហ៍ពិពាហ៍ដល់ខែឧសភាគាត់បានចូលបំពេញការងារវិញជាមួយនឹងការសុំបើកប្រាក់បៀវត្ស ទើបកើតជម្លោះជាមួយអតីតប្រធានប៉ុស្តិ៍ លោក សឿង សាងវាសនា ហើយបន្ទាប់មកគាត់សុំកិច្ចអន្តរាគមន៍ទៅមេបញ្ជាការវរព្រំដែនលោក បុត្រ លី ក៏ប៉ុន្តែ លោក បុត្រ លី ណែនាំគាត់ឲ្យត្រឡប់ទៅផ្ទះរង់ចាំដំណោះស្រាយ ហើយក៏បាត់រហូតដល់បច្ចុប្បន្ននេះ។
វិទ្យុអាស៊ីសេរីមិនអាចទាក់ទងសុំការអធិប្បាយពីអតីតប្រធានប៉ុស្តិ៍និងមេបញ្ជាការវរព្រំដែនបានទៅនៅថ្ងៃព្រហស្បតិ៍នេះ ក៏ប៉ុន្តែបើតាមស្នងការរងនគរបាលខេត្តដែលទើបចូលនិវត្តន៍នាពេលថ្មីៗនេះ លោក ហោ អង្គ មានប្រសាសន៍ថា លោកក៏បានទទួលរបាយការណ៍ខាងលើនោះដែរ ហើយលោកបានព្យាយាមធ្វើការសម្របសម្រួលដើម្បីបញ្ចប់បញ្ហា ហើយលោកមិនបានដឹងពីការសម្រេចកាត់ឈ្មោះចេញពីបញ្ជីក្របខ័ណ្ឌនោះទាក់ទិនបញ្ហាអ្វីនោះទេ។
លោក ហោ អង្គ បានមានប្រសាសន៍ថា ៖ «វាដូចប្រកាន់បក្សប្រកាន់ពួកហ្នឹង អ៊ីចឹងទៅវាមានបញ្ហា។ ខ្ញុំក៏ព្យាយាមឲ្យធ្វើការសម្របសម្រួលដែរ ក៏ប៉ុន្តែឮតែអឺអើតែមាត់ ក្រោយមកទៀតវាអត់បានប្រយោជន៍»។
ចំណែកស្នងការរង លោក ព្រៃ ច្រំ ដែលជាប្រធានក្រុមប្រឹក្សាវិន័យមានប្រសាសន៍ដែរថា ក្រុមប្រឹក្សាវិន័យមិនបានស្នើដកចេញពីក្របខ័ណ្ឌគឺពលបាលត្រី សេង វណ្ណៈ អវត្តមាននៅពេលគណៈកម្មការចុះត្រួតពិនិត្យស្ថិតិកងនគរបាលទើបក្រសួងសម្រេចកាត់ឈ្មោះចេញ។
លោក ព្រៃ ច្រំ បានឲ្យដឹងថា ៖ «គោលការណ៍ក្រសួងគេចុះត្រួតពិនិត្យមនុស្ស អ្នកណាអត់មានមុខក្នុងបញ្ជី កាត់ចេញ»។
មន្ត្រីសម្របសម្រួលអង្គការអាដហុកខេត្តរតនគិរី លោក ប៉ែន ប៊ុណ្ណារ៍ បញ្ជាក់ថា នៅសប្តាហ៍ក្រោយនេះលោកនឹងធ្វើលិខិតអន្តរាគមន៍ទៅក្រសួងមហាផ្ទៃដើម្បីសុំឲ្យមានការស៊ើបអង្កេតតាមសំណើរបស់ពលបាលត្រីរូបនោះ៕
អត្ថបទដែលទាក់ទង
អង្គការសេដាក់គ្រោងនាំអង្ករសរីរាង្គទៅទីផ្សារអឺរ៉ុបនិងអាមេរិក
អាជ្ញាធរស្វែងរកការបិទមន្ទីរព្យាបាលជំងឺមួយនៅរតនគិរី
អតីតប្រធានាធិបតីអាមេរិកសម្ពោធផ្ទះសម្រាប់ជនក្រីក្រនៅខែត្រកណ្ដាល
ទីតាំងផលិតប្រេងម្រះព្រៅភ្នំ២កន្លែងនៅពោធិ៍សាត់ត្រូវបានកម្ទេច
គណៈកម្មការខ្មែរម្ចាស់ស្រុកនឹងរៀបចំកិច្ចប្រជុំស្ដីពីបញ្ហានៅកម្ពុជា
អាជ្ញាធរខេត្តឧត្ដរមានជ័យរារាំងរថយន្តដឹកព្រះពុទ្ធបដិមារបស់ម៉មសូណង់ដូ
ប្រជានេសាទប្រតិកម្មចំពោះការកំណត់ប្រភេទឧបករណ៍នេសាទ
បញ្ហាធូលីហុយនៅតាមផ្លូវជាតិលេខ៣ប៉ះពាល់ដល់សុខភាពអ្នកស្រុក
ពលរដ្ឋនៅព្រៃវែងត្អូញពីបញ្ហាសមត្ថកិច្ចស្ទាក់ទារប្រាក់តាមផ្លូវ
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
មើលមតិទាំងអស់.