របាយការណ៍ពីអាជ្ញាធរមូលដ្ឋាន និងក្រសួងជំនាញឧតុនិយម បានឲ្យដឹងថា នៅក្នុងរយៈពេល ៤ខែ ដើមឆ្នាំ២០១២ កន្លងមកនេះ រន្ទះបាញ់បានសំលាប់ប្រជាពលរដ្ឋចំនួន ៥នាក់ រងរបួសចំនួន ៣នាក់ និងខ្យល់ព្យុះ បានបំផ្លាញផ្ទះសំបែងប្រជាពលរដ្ឋចំនួនជាង ២០០ខ្នង និងធ្វើឲ្យមនុស្សស្លាប់ ១នាក់ និងរងរបួសចំនួន ១២នាក់។
ការព្រួយបារម្ភអំពីការប្រែប្រួលអាកាសធាតុ និងការខូចខាតដោយសារគ្រោះទឹកជំនន់នៅឆ្នាំ២០១១ កន្លងទៅនេះ ត្រូវបានលើកមកពិភាក្សារវាងអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ លោក ញឹម វណ្ណដា ជាមួយបេសកជនពិសេសរបស់អង្គការសហប្រជាជាតិ លោកស្រី ម៉ាហ្គារ៉េតា វ៉ូលស្រ្តម (Margareta Wahlstrom) ទទួលបន្ទុកកាត់បន្ថយហានិភ័យនៃគ្រោះមហន្តរាយរបស់អង្គការសហប្រជាជាតិ ដែលមកធ្វើទស្សនកិច្ចនៅប្រទេសកម្ពុជា។
អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ លោក ញឹម វណ្ណដា បានមានប្រសាសន៍ប្រាប់អ្នកកាសែតថា គ្រោះធម្មជាតិនេះ គឺបណ្ដាលមកពីការប្រែប្រួលអាកាសធាតុនៅលើពិភពលោក។ ប្រទេសកម្ពុជា បានរងគ្រោះខ្លាំងជាងគេនៅតំបន់អាស៊ីប៉ាស៊ីហ្វិក (ASIA PACIFIC) កន្លងមកនេះ។
លោក ញឹម វណ្ណដា៖ «ខ្យល់ព្យុះឥឡូវនេះវាអត់ប្រាប់មុនទេ វាមក វាខ្មៅនៅលើ ...វាមកចំត្រង់ណាកួចយកផ្ទះត្រង់ហ្នឹងតែម្ដង។ ហើយជាមួយនោះ ភ្លៀងមកទៀត ហើយភ្លៀងមកទៀត ថែមទាំងរន្ទះបាញ់ទៀត ហើយក្ដៅណាស់ដល់ថ្ងៃនេះ គឺគ្រប់កន្លែងក្ដៅណាស់ ហើយភ្លៀងមិនទៀងទាត់។ តាមខ្ញុំដឹងនៅតាមសមុទ្រ និងខេត្តមួយចំនួនជួបការរាំងស្ងួតខ្លាំងណាស់»។
លោកស្រី ម៉ាហ្គារ៉េតា វ៉ូលស្រ្តម បានមានប្រសាសន៍ថា លោកស្រីសុំឲ្យរដ្ឋាភិបាលកម្ពុជា ពង្រឹងប្រព័ន្ធការពារ និងសង្គ្រោះជនរងគ្រោះឲ្យបានឆាប់រហ័ស និងទាន់ពេលវេលា នៅគ្រាដែលមានគ្រោះមហន្តរាយគ្រោះធម្មជាតិ និងហានិភ័យ ដូចជាខ្យល់ព្យុះ និងទឹកជំនន់ជាដើម។
ប្រជាពលរដ្ឋ ឈ្មោះ លឹម កាំង អាយុ ៥១ឆ្នាំ នៅស្រុកគូលែនខាងជើង ខេត្តព្រះវិហារ បាននិយាយថា ប្រជាពលរដ្ឋតែងតែព្រួយបារម្ភយ៉ាងខ្លាំង នៅពេលមានភ្លៀងធ្លាក់ម្តងៗ ពីព្រោះខ្លាចរន្ទះបាញ់ និងខ្យល់ព្យុះ៖ «ចាស់ ពីដើម ពេលខ្ញុំមិនទាន់កើតមិនដែលមានភ្លៀងរន្ទះបាញ់មនុស្ស ហើយនិងខ្យល់ព្យុះ ដូរធាតុអាកាសមកក្ដៅប្រែប្រួលអ៊ីចឹង អត់ដែលមានទេ ទើបតែមកសម័យនេះខ្ញុំឆ្ងល់បណ្ដោយ។ ខ្ញុំសង្ស័យថា មកពីអស់ព្រៃឈើ ក្រុមហ៊ុនចុះមកវាអស់រាប់ម៉ឺនរាប់ពាន់ហិកតារ បានវាទៅជារាល់ថ្ងៃ វាប្រែប្រួលរាល់ថ្ងៃ»។
របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយនៅក្នុងរយៈពេល ៣ខែ ដើមឆ្នាំ២០១២ កន្លងមកនេះ បានឲ្យដឹងថា រន្ទះបាញ់បានសំលាប់ប្រជាពលរដ្ឋ ៥នាក់ រងរបួសចំនួន ៣នាក់ងាប់ក្របីចំនួន ៣ក្បាល នៅខេត្តបន្ទាយមានជ័យ បាត់ដំបង ពោធិ៍សាត់ ព្រៃវែង និងខេត្តកំពត។
នៅឆ្នាំ២០១១ កន្លងទៅនេះ រន្ទះបាញ់បានសំលាប់ប្រជាពលរដ្ឋសរុបចំនួន ១៦៥នាក់។
បេសកជនពិសេសរបស់អង្គការសហប្រជាជាតិ លោកស្រី ម៉ាហ្គារ៉េតា វ៉ូលស្រ្តម ទទួលបន្ទុកកាត់បន្ថយហានិភ័យនៃគ្រោះមហន្តរាយ បានឯកភាពថា គណៈកម្មាធិការជាតិគ្រប់គ្រងគ្រោះមហន្តរាយ និងអង្គការ UNDP និងរដ្ឋាភិបាលគប្បីពង្រឹងកិច្ចសហប្រតិបត្តិការជាមួយគ្នាឲ្យបានជិតស្និទ្ធ ដើម្បីឆ្លើយតប និងដោះស្រាយភ្លាមៗនៅពេលមានគ្រោះមហន្តរាយកើតឡើងនៅកម្ពុជា៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។