អង្គការសិទ្ធិមនុស្សលីកាដូ កំពុងធ្វើការតាមដានសំណុំរឿងស្ត្រីជាប្រពន្ធមន្ត្រីប៉ូលិសក្រសួងមហាផ្ទៃ ពាក់ស័ក្ដិ៤កន្លះម្នាក់ ជាម្ចាស់ផ្ទះក្នុងខណ្ឌសែនសុខ ក្រុងភ្នំពេញ ដែលបានធ្វើទារុណកម្មលើកុមាររងគ្រោះ២នាក់បងប្អូនជាក្មេងបម្រើក្នុងផ្ទះ។
លោក អំ សំអាត មន្ត្រីស៊ើបអង្កេតជាន់ខ្ពស់នៃអង្គការលីកាដូ បានឲ្យដឹងថា អង្គការលីកាដូកំពុងធ្វើការស៊ើបអង្កេត ធ្វើយ៉ាងណាបញ្ជូនជនប្រព្រឹត្តទៅតុលាការ ដើម្បីចាត់វិធានការទៅតាមផ្លូវច្បាប់។ លោកថា ធ្វើដូច្នេះជាការផ្ដល់យុត្តិធម៌ដល់ជនរងគ្រោះ និងជៀសវាងការដោះលែង និងសម្របសម្រួលក្រៅប្រព័ន្ធតុលាការ ៖ «ឥឡូវយើងកំពុងតែទាក់ទងជាប់ គឺយើងសុំឲ្យគេចាត់វិធានការតាមផ្លូវច្បាប់ ដើម្បីបញ្ជូនអ្នកហ្នឹងទៅតុលាការធ្វើការតាមនីតិវិធី ហើយយើងផ្ដល់មេធាវីជួយជនរងគ្រោះនៅតុលាការជាបន្តទៀត ពីព្រោះជាអំពើអមនុស្សធម៌ ឃោរឃៅយង់ឃ្នង ដែលមិនថាតែអង្គការសង្គមស៊ីវិលទេ ទោះបីជាប្រជាពលរដ្ឋទាំងអស់ ក៏លោកមិនអាចទទួលយកបាននូវអំពើឃោរឃៅទាំងអស់នេះបានដែរ»។
កាលពីថ្ងៃទី១៣ សីហា កន្លងទៅនេះ ប៉ូលិសបានចាប់ខ្លួនស្ត្រីម្ចាស់ផ្ទះឈ្មោះ សៅ ចន្ធី អាយុ៤២ឆ្នាំ មុខរបរជាអ្នកលក់ចានឆ្នាំងនៅសង្កាត់ទឹកថ្លា ខណ្ឌសែនសុខ ដែលប្ដីរបស់គាត់ឈ្មោះ ម៉ិច ម៉ី អាយុ៤៨ឆ្នាំ ជាមន្ត្រីប៉ូលិសក្រសួងមហាផ្ទៃពាក់ស័ក្ដិ៤កន្លះ ពីបទចោទថា បានធ្វើទារុណកម្មយុវវ័យឈ្មោះ ឃឹម សារ៉ាយ ភេទប្រុស អាយុ១៧ឆ្នាំ និងប្អូនស្រីឈ្មោះ ឃឹម ស្រីម៉ៅ ភេទស្រី អាយុ១៤ឆ្នាំ។
ជនរងគ្រោះបានប្រាប់ដល់អ្នកសារព័ត៌មានថា ពួកគេតែងតែត្រូវម្ចាស់ផ្ទះឈ្មោះ សៅ ចន្ធី ជេរប្រមាថ និងវាយតប់ជាញឹកញាប់ នៅពេលដែលធ្វើខុសម្ដងៗ ដូចជាយកកូនកាំបិតស្រួចមកឆូតលើផ្ទៃមុខជាដើម ហើយកាលពីថ្ងៃទី៣ សីហា ស្ត្រីម្ចាស់ផ្ទះរូបនេះ បានជះទឹកក្ដៅស្រោចលើខ្លួនក្មេងប្រុសឈ្មោះ ឃឹម សា រ៉ាយ នាំឲ្យរលាកស្ទើរពេញដងខ្លួន និងដៃ ធ្វើឲ្យផ្អើលដល់អ្នកជិតខាង ហើយបែកការណ៍ដឹងដល់អង្គការសង្គមស៊ីវិល ហើយក៏បានជួយអន្តរាគមន៍។
ទោះជាយ៉ាងណា អធិការខណ្ឌសែនសុខ លោក ម៉ុក ហុង មានប្រសាសន៍ដោយខ្លីថា លោក និងមន្ត្រីក្រោមឱវាទកំពុងចាត់វិធានទៅតាមផ្លូវច្បាប់ ៖ «បាទឥឡូវយើងកំពុងអនុវត្តទៅតាមនីតិវិធីហើយហ្នឹង បញ្ជូនទៅតុលាការហ្នឹងហើយ»។
មេធាវីសិទ្ធិមនុស្សនៃអង្គការលីកាដូ លោកស្រី សន ស៊ូដាលែន បានថ្លែងថា ជនរងគ្រោះទាំង២នាក់បងប្អូននោះ កំពុងស្ថិតនៅក្នុងការថែទាំបណ្ដោះអាសន្នរបស់អង្គការលីកាដូ ដោយសារមានសំណូមពរពីម្ដាយរបស់ពួកគេ ៖ «ពួកយើងស៊ើបអង្កេតរឿងហ្នឹងទៅលើការអនុវត្តន៍ច្បាប់ នៅលើនីតិវិធីហ្នឹងថាតើប៉ូលិស គេនឹងធ្វើយ៉ាងម៉េចជាមួយនឹងជនល្មើសអ៊ីចឹង ហើយខាងយើងហ្នឹងផ្ដល់សេវាមេធាវីការពារឲ្យគាត់ ទាល់តែថ្ងៃច័ន្ទបានខ្ញុំបានធ្វើការជាមួយលោកព្រះរាជអាជ្ញាធរ ខ្ញុំចូលជួបគាត់សុំការពារក្មេង២នាក់»។
ជនរងគ្រោះទាំងពីរនាក់ មានស្រុកកំណើតនៅស្រុកត្រាំកក់ ខេត្តតាកែវ បានស្នាក់នៅជាអ្នកបម្រើស៊ីឈ្នួលនៅផ្ទះរបស់ស្ត្រីរូបនេះ ដោយបានកម្រៃក្នុង១ខែ ៥ម៉ឺនរៀល តាំងពីឆ្នាំ២០០៤ និងប្អូនស្រីមករស់នៅឆ្នាំ២០០៧៕