លោក ម៉ាក់ សឿន អនុប្រធាននាយកដ្ឋានផែនការ ស្ថិតិ និងសហប្រតិបត្តិការអន្តរជាតិ របស់ក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ប្រាប់វិទ្យុអាស៊ីសេរីថា នៅឆ្នាំ២០០៨នេះ មានការកើនទ្បើងនៃការធ្វើស្រូវរដូវវស្សារហូតដល់ជាង២លាន២សែនហិកតារច្រើនជាងឆ្នាំ២០០៧កន្លងទៅ ដូច្នេះលោករំពឹងថា ផលិតផលស្រូវរដូវវស្សាឆ្នាំ២០០៨នេះនឹងមានការកើនឡើងជាងឆ្នាំ២០០៧កន្លងទៅនោះ។
លោក ម៉ាក់ សឿន បានមានប្រសាសន៍ថា ៖ «យើងបូកសរុបយើងបង្កបង្កើនផលជាង២លាន២សែនហិកតារ គិតរដូវវស្សា ប្រាំងអត់ទាន់បូកសរុប។ មើលអាកាសធាតុដែលអំណោយផលចុងឆ្នាំហ្នឹង យើងសង្ឃឹមថាបានអាចលើសឆ្នាំទៅមិញ ផ្ទៃដីបង្កបង្កើនផលលើសដែរ យើងបានលើសឆ្នាំទៅមិញដែរ»។
លោកបានឲ្យដឹងថា ផលិតផលស្រូវកាលពីឆ្នាំ២០០៧កន្លងទៅ គឺមានចំនួនប្រមាណ៧លាន៦សែនតោននៅទូទាំងប្រទេសកម្ពុជា។
ទាក់ទងនឹងស្ថានការណ៍ធ្វើស្រូវរដូវវស្សាឆ្នាំ២០០៨នេះ កសិករឈ្មោះ ជុំ ជួប រស់នៅក្នុងភូមិក្តុយ ឃុំស្តើងជ័យ ស្រុកជើងព្រៃ ខេត្តកំពង់ចាម បានមានប្រសាសន៍ថា ស្រូវរដូវរបស់លោកចំនួន៣ហិកតារបានទទួលរងគ្រោះការរាំងស្ងួត ហើយក្រោយមកមានភ្លៀងធ្លាក់ខ្លាំងក៏រងគ្រោះនឹងទឹកជំនន់ទៀតនៅចុងឆ្នាំ២០០៨នេះ។
លោក ជុំ ជួប បានឲ្យដឹងថា ៖ «ស្រែស្រូវខូចអស់៧០%ហើយ... រាំងក៏ខូច ហើយដល់បានតិចតួចមក ជំនន់ខូចបន្តិចទៀត ស្រូវខ្ញុំ៣ហិកតារ ...អ្នកភូមិដទៃទៀតក៏អ៊ីចឹង ខូចជាង២០០គ្រួសារ»។
លោក ភូ ភឿន ជាមេភូមិក្តុយ ឃុំស្តើងជ័យ ស្រុកជើងព្រៃ ខេត្តកំពង់ចាម បានមានប្រសាសន៍ថា ៖ «សព្វថ្ងៃហ្នឹងបើនិយាយពីការព្រួយបារម្ភ វាមានការព្រួយបារម្ភតាំងពីខែដើមឆ្នាំមក ដោយសារទី១ គឺអំណោយផលទឹកភ្លៀងបានមិនដល់ ហើយទី២ ប្រជាកសិករហ្នឹងគាត់ផលិតក្នុងរដូវបង្កបង្កើនផលហ្នឹងបានតិចតួចមក ភ្លៀងហ្នឹងវារាងជ្រមុជបន្តិចមក ដើមស្រូវវាទន់បន្តិចទៅ ហើយភាគច្រើនគឺគាត់ចេញដំណើរទៅប្រកបមុខរបររកទទួលទាននៅភូមិក្រៅឆ្ងាយៗហ្នឹងភាគច្រើន»។
សូមរំឭកថា ធនាគារអភិវឌ្ឍន៍អាស៊ី ADB នៅក្នុងប្រទេសកម្ពុជា បានចំណាយទឹកប្រាក់ប្រមាណ៣៥លានដុល្លារអាមេរិក សម្រាប់ជួយជាស្បៀងអង្ករសង្រ្គោះបន្ទាន់ចែកជូនប្រជាពលរដ្ឋទីទ័លក្រដែលគ្មានដីស្រែចម្ការ គ្រួសារជនពិការ អ្នកមានជំងឺរ៉ាំរ៉ៃ មនុស្សគ្មានទីពឹង ជាច្រើនពាន់គ្រួសារ នៅក្នុងខេត្តចំនួន៧នៅជុំវិញបឹងទន្លេសាបសម្រាប់រយៈពេលបីឆ្នាំចាប់ពីឆ្នាំ២០០៨រហូតដល់ឆ្នាំ២០១១៕