បំរាមផ្អាកការរៀបការរវាងស្ត្រីខ្មែរនិងជនបរទេសមិនទាន់ក្លាយជាអចិន្ត្រៃយ៍ទេ

ដោយ សុខ សេរី

2008-07-04

មន្រ្តីជាន់ខ្ពស់របស់ក្រសួងមហាផ្ទៃប្រទេសកម្ពុជាដែលបានជួបប្រជុំគ្នាកាលពីពេលថ្មីៗនេះ ផែ្អកតាមប្រភពបានឲ្យដឹងថាគេនៅមិនទាន់បានយល់ព្រមឲ្យមានការដាក់បំរាមរបស់រដ្ឋាភិបាលជាអចិន្រ្តៃយ៍នៅទ្បើយទេ ក្នុងការផ្អាកការរៀបអាពាហ៍ពិពាហ៍រវាងស្រ្តីខែ្មរជាមួយនឹងជនបរទេសនោះ ។

លោកឧត្តមសេនីយ៍ឯក ខៀវ សុភ័គ មន្រ្តីអ្នកនាំពាក្យរបស់ក្រសួងមហាផៃ្ទនៃប្រទេសកម្ពុជា បានមានប្រសាសន៍ប្រាប់វិទ្យុអាស៊ីសេរីនៅថៃ្ងសុក្រនេះថា ៖ «អនុក្រឹត្យព្រាងហើយប៉ុន្តែមិនទាន់បានឯកភាពគ្នា មិនទាន់ដាក់ប្រជុំអន្តរក្រសួងនៅឡើយទេ ។ ក្រសួងពាក់ព័ន្ធមានទីស្ដីការគណៈរដ្ឋមន្ត្រី ក្រសួងការបរទេស ក្រសួងយុត្តិធម៌ ក្រសួងមហាផ្ទៃ ។ ព្រាងដើម្បីដាក់ជូនទៅរាជរដ្ឋាភិបាលសម្រេច ។ និយាយរួមក្រុមជំនាញដែលយើងធ្វើហ្នឹងគឺជំនាញរបស់ក្រសួងមហាផ្ទៃ និយាយអំពីនីតិវិធីនៃការធ្វើគឺធ្វើយ៉ាងម៉េច ហើយនិងលក្ខខណ្ឌចំពោះជនជាតិខ្មែរយើងត្រូវមានលក្ខខណ្ឌអី ហើយជនជាតិបរទេសត្រូវមានលក្ខខណ្ឌអីខ្លះ» ។

លោកបានបញ្ជាក់ថាដរាបណាអនុក្រឹត្យនៃការផ្អាកជាអចិន្រៃ្តយ៍មិនទាន់បានប្រកាសនៅឡើយ ដរាបនោះការផ្អាកជាបណ្តោះអាសន្ននៃអាពាហ៍ពិពាហ៍រវាងស្រ្តីខែ្មរជាមួយជនបរទេសកំពុងតែស្ថិតនៅជាធរមានជាដដែល ។

លោកស្រី ពុង ឈីវកេក ប្រធានអង្គការសិទ្ធិមនុស្សលីកាដូ បានមានប្រសាសន៍អត្ថាធិប្បាយប្រតិកម្មថា ៖ «ខ្ញុំសោកស្ដាយណាស់បើទៅជាអចិន្ត្រៃយ៍គឺជាការមិនល្អមួយសម្រាប់សិទ្ធិរបស់ស្ត្រី ព្រោះនេះជាការរំលោភសិទ្ធិរបស់ស្រ្តីហើយ ។ ស្ត្រីមានសិទ្ធិរៀបអាពាហ៍ពិពាហ៍ជាមួយបុរសណា យើងអត់ត្រូវរើសអើងពីសាសនាឬពីសញ្ជាតិរបស់បុរសនោះទេ ។ ម៉្យាងទៀតខ្ញុំយល់ឃើញថារដ្ឋាភិបាលលោកចង់ផ្អាកហ្នឹងដើម្បីទប់ស្កាត់ការជួញដូរស្ត្រី ខ្ញុំយល់ ប៉ុន្តែនេះមិនមែនជាមធ្យោបាយល្អទេសម្រាប់ទប់ស្កាត់នឹងអំពើជួញដូរស្ត្រីទៅបរទេស យើងអាចរកមធ្យោបាយផ្សេងៗទៀតធ្វើបាន ។ បើផ្អាកជាបណ្ដោះអាសន្នហើយលែងផ្អាកវិញជាការត្រឹមត្រូវ ព្រោះយើងអាចផ្សព្វផ្សាយឲ្យស្ត្រីហ្នឹងប្រុងប្រយ័ត្ន» ។

លោកស្រីបានបន្ទោសទៅលើបញ្ហានៃភាពក្រីក្រនិងបញ្ហាគ្មានការងារធ្វើរបស់ប្រជាពលរដ្ឋខ្មែរ បានជំរុញឲ្យប្រជាពលរដ្ឋខែ្មរមួយចំនួនធ្វើការជ្រើសរើសយកអាពាហ៍ពិពាហ៍ជាមួយនឹងជនបរទេសដើម្បីធ្វើឲ្យជីវភាពរបស់ខ្លួនល្អប្រសើរឡើង ។

សូមរំឮកថាក្រសួងមហាផ្ទៃនៃប្រទេសកម្ពុជា កាលពីថៃ្ងទី២៩ ខែមីនាកន្លងទៅថ្មីៗនេះ បានប្រកាសផ្អាកជាបណ្តោះអាសន្ននូវការអនុញ្ញាតនានានៃអាពាហ៍ពិពាហ៍រវាងប្រជាពលរដ្ឋខែ្មរជាមួយនឹងជនបរទេស ដោយមានហេតុផលថាអាពាហ៍ពិពាហ៍កន្លងមកគឺជាអាពាហ៍ពិពាហ៍ក្លែងក្លាយ បោកបញ្ឆោត និងមានអ្នករត់ការជាខែ្សបណ្តាញឬក្រុមហ៊ុនអាជីវកម្ម ដើម្បីយកស្រ្តីខែ្មរទៅបម្រើតាមផ្ទះឬលក់ទៅឲ្យមេបនបម្រើផ្លូវភេទ ។

ប្រភពពីអង្គការសិទ្ធិមនុស្សមួយចំនួនដែលបានតាមដានអំពីករណីនេះបានឲ្យដឹងថា ស្រ្តីខែ្មរភាគច្រើនត្រូវបានគេរៀបការនាំទៅប្រទេសកូរ៉េខាងត្បូងច្រើនជាងកោះតៃវ៉ាន់ ហើយស្រ្តីដែលរងគ្រោះដោយអំពើជួញដូរផ្លូវភេទ និងរងការធ្វើទារុណកម្មនានា ភាគតិចណាស់ត្រូវបានគេដឹងឮនិងត្រូវបានជួយសង្រ្គោះមកកម្ពុជាវិញ ៕

បោះពុម្ព អ៊ីម៉េល