កិច្ចប្រជុំនេះបានប្រព្រឹត្តទៅដោយបិទទ្វារជិត នៅគ្រាដែលមេដឹកនាំអាស៊ាន និងមេដឹកនាំប្រទេសដៃគូចាប់ផ្ដើមពិភាក្សា។
ប្រមុខរដ្ឋាភិបាលកម្ពុជា លោក ហ៊ុន សែន នៅថ្ងៃទី២០ ខែវិច្ឆិកា បានប្រកាសជំរុញឲ្យមេដឹកនាំប្រទេសសមាជិកអាស៊ានទាំង១០ ពង្រឹងវិស័យសេដ្ឋកិច្ច និងពាណិជ្ជកម្មនៅតំបន់អាស៊ាន ដោយខ្លួនឯង នៅគ្រាដែលនៅតំបន់អឺរ៉ុប (EU) និងសហរដ្ឋអាមេរិក (U.S) មិនទាន់បានចាកផុតពីវិបត្តិសេដ្ឋកិច្ចសាកលនៅឡើយ ដែលបានធ្វើឲ្យសេដ្ឋកិច្ចនៅតំបន់នោះស្ថិតក្នុងស្ថានការណ៍មិនច្បាស់លាស់។
ប្រទេសដៃគូសំខាន់ចំនួន៨ របស់អាស៊ានក្នុងកិច្ចពិភាក្សានោះ មានដូចជា ប្រទេសអូស្ត្រាលី ចិន ឥណ្ឌា ជប៉ុន កូរ៉េខាងត្បូង រុស្ស៊ី សហរដ្ឋអាមេរិក និងប្រទេសនូវែលហ្សេឡង់ (New Zealand)។
ក្រៅពីនេះ មានស្ថាប័នអន្តរជាតិធំៗមួយចំនួន ដូចជា ធនាគារពិភពលោក (World Bank) អង្គការពាណិជ្ជកម្មពិភពលោក (WTO) អង្គការរូបិយវត្ថុអន្តរជាតិ (IMF) ធនាគារអភិវឌ្ឍន៍អាស៊ី (ADB) និងអង្គការអន្តរជាតិធំៗមួយចំនួនទៀត។
លោកនាយករដ្ឋមន្ត្រី ហ៊ុន សែន បានមានប្រសាសន៍ថា ការបន្តវិបត្តិសេដ្ឋកិច្ចនៅតំបន់ប្រទេសជឿនលឿននៅតំបន់អឺរ៉ុប និងសហរដ្ឋអាមេរិក បានធ្វើឲ្យទីផ្សារមូលធនអន្តរជាតិ ប្រឈមមុខនឹងស្ថានការណ៍អស្ថិរភាព ហើយអ្នកវិនិយោគទុនមិនហ៊ានដាក់ទុនវិនិយោគនៅតំបន់នោះ៖ «យ៉ាងណាមិញ យើងក៏ទទួលស្គាល់ដែរថា ប្រសិនបើស្ថានភាពសេដ្ឋកិច្ចពិភពលោកនៅតែបន្តមានភាពទន់ខ្សោយ អាស៊ានច្បាស់ជាមិនអាចគេចផុតផលពិបាកនៃវិបត្តិបានរហូតទេ»។
នៅមុនការចាប់ផ្ដើមកិច្ចពិភាក្សានោះ អគ្គលេខាធិការអាស៊ាន លោក សុរិន្ទ ពិតសុវណ្ណ (Surin Pit suwan) បានមានប្រសាសន៍ប្រាប់អ្នកកាសែតនៅឯវិមានសន្តិភាពថា យើងកំពុងតែពេញចិត្តជាមួយនឹងយុទ្ធសាស្ត្រដោះស្រាយវិបត្តិសេដ្ឋកិច្ចដោយខ្លួនយើងក្នុងប្រឈមមុខវិបត្តិសេដ្ឋកិច្ចកាលពីឆ្នាំ១៩៩៧ កន្លងមក។ ប៉ុន្តែយើងបានកែទម្រង់ ដោយបានបង្កើតស្ថាប័ននៃរដ្ឋាភិបាលល្អៗ និងមានអភិបាលកិច្ចល្អកន្លងមក៖ «សេដ្ឋកិច្ចរបស់អាស៊ានយើងមានកំណើនយឺតៗកន្លងមក និងបានរងផលប៉ះពាល់កន្លងមកនៅគ្រាដែលសេដ្ឋកិច្ចនៅតំបន់អឺរ៉ុប និងតំបន់អាមេរិកខាងជើង មិនបានទាន់បានងើបឡើងវិញនោះ ប៉ុន្តែយើងរក្សាលំនឹងសេដ្ឋកិច្ចដោយខ្លួនឯង»។
កិច្ចប្រជុំស្ដីពីគំនិតផ្ដួចផ្ដើមនៅឈាងម៉ៃ ប្រទេសថៃ (Chaing Mai Initiative) កាលពីឆ្នាំ២០០០ កន្លងមក បានសម្រេចបង្កើនថវិកាអាស៊ានពីចំនួន ១៤០ពាន់លានដុល្លារអាមេរិក ដល់ចំនួន ២៤០ពាន់លានដុល្លារអាមេរិក ដើម្បីទប់ទល់នឹងវិបត្តិសេដ្ឋកិច្ចនៅតំបន់អាស៊ាននៅថ្ងៃអនាគត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។