លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យនិងជាសកម្មជនព្រំដែនផងនោះ បានលើកឡើងថា នេះជារឿងនយោបាយហើយក៏ឆ្លុះបញ្ចាំងឲ្យឃើញផងដែរថា កម្ពុជាស្ថិតនៅក្រោមឥទ្ធិពលនយោបាយរបស់ប្រទេសវៀតណាម ព្រោះបន្ទាប់ពីគណៈប្រតិភូជាន់ខ្ពស់វៀតណាមមកកម្ពុជាកាលពីពេលថ្មីៗនេះ ស្រាប់តែមានករណីដកអភ័យឯកសិទ្ធិនេះកើតឡើង។
លោក រ៉ុង ឈុន មានប្រសាសន៍ដូច្នេះ ៖ «មិនហ៊ានទទួលស្គាល់ការពិតបែរជានាំគ្នាមកដាក់បន្ទុកលើលោក សម រង្ស៊ី វាជាអំពើអយុត្តិធម៌មួយ។ ទង្វើនេះយើងមើលឃើញថា ជាការធ្វើផ្គាប់ចិត្តប្រទេសជិតខាង ហើយយើងក្នុងនាមជារដ្ឋឯករាជមួយ យើងមិនត្រូវទទួលឥទ្ធិពលនយោបាយពីប្រទេសជិតខាង ហើយមកដាក់បន្ទុកលើប្រជារាស្រ្ត លើអ្នកតំណាងរាស្រ្តរបស់ខ្លួនឯងនោះទេ»។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជាមានប្រសាសន៍ថា លោកពុំមានការភ្ញាក់ផ្អើលអ្វីទេជុំវិញនឹងការលើកអភ័យឯកសិទ្ធិលោក សម រង្ស៊ី នេះ ប៉ុន្តែវាឆ្លុះបញ្ចំាងម្តងទៀតអំពីការដឹកនាំប្រទេសតាមរបបផ្តាច់ការរបស់រដ្ឋាភិបាល។
លោក អ៊ូ វីរៈ មានប្រសាសន៍ថា ៖ «ប្រទេសយើងគឺនៅចូលចិត្តប្រើនូវអំណាចបង្ខំអំណាចផ្តាច់ការមួយចូលចិត្តធ្វើម៉េចគំរាមកំហែងអ្នកដទៃ ជាពិសេសគណបក្សប្រឆាំង។ នៅក្នុងករណីនេះខ្ញុំមើលទៅរឿងហ្នឹងវាមិនត្រូវ វាអត់ទៅជារឿងធំដល់ថ្នាក់ហ្នឹងទេ ប៉ុន្តែខ្ញុំមើលទៅគណបក្សប្រជាជនបែរជាចង់ឆ្លុះបញ្ចាំងកម្លាំងរបស់ខ្លួនហ្នឹង»។
សភាបានបោះឆ្នោតលើកអភ័យឯកសិទ្ធិលោក សម រង្ស៊ី អ្នកតំណាងរាស្រ្តមណ្ឌលកំពង់ចាម បានធ្វើទ្បើងដោយសំឡេងឯកច្ឆន្ទ គឺ៨៧លើ៨៧សំឡេងនៅក្នុងចំណោមតំណាងរាស្រ្តដែលបានចូលរួមប្រជុំនៅថ្ងៃទី១៦ វិច្ឆកា។ ក្រុមអ្នកកាសែតនានាមិនត្រូវបានអនុញ្ញាតឲ្យចូលសភាជាតិ ដើម្បីតាមដានការបោះឆ្នោតនោះទេ។
ស្របពេលជាមួយគ្នានេះគេសង្កេតឃើញក្រុមតំណាងរាស្រ្តគណបក្សសមរង្ស៊ីបានធ្វើពហិការមិន ចូលរួមក្នុងការប្រជុំសភានោះទេ ដោយពួកគេបានឈរនៅមុខមន្ទីររដ្ឋសភា ហើយបានធ្វើសេចក្តី ថ្លែងការណ៍ប្រឆាំងដាច់ខាតចំពោះការបោះឆ្នោតលើកអភ័យឯកសិទ្ធិលោក សម រង្ស៊ី នេះ។
លោក យឹម សុវណ្ណ មន្រ្តីនាំពាក្យគណបក្សជំទាស់និងជាអ្នកតំណាងរាស្រ្តផងនោះ បានបញ្ជាក់ថា ការលើកអភ័យឯកសិទ្ធិលោក សម រង្ស៊ី ពេលនេះ គឺជាវិធានការមួយរំលោភទៅលើរដ្ឋធម្មនុញ្ញនៃព្រះរាជាណាចក្រកម្ពុជា។
លោក យឹម សុវណ្ណ បញ្ជាក់ដូច្នេះ ៖ «នឹងបានបង្ហាញឲ្យឃើញយ៉ាងច្បាស់ថា អាជ្ញាធរកម្ពុជាបានអនុវត្តយ៉ាងត្រឹមត្រូវនូវបទបញ្ជារបស់រដ្ឋាភិបាលវៀតណាម។ កាលពីថ្ងៃទី៤ វិច្ឆិកា ឆ្នាំ២០០៩ នាយករដ្ឋមន្រ្តីវៀតណាម ង្វៀន តាន់យុង (Nguyen Tan Dung) បានស្នើឲ្យរដ្ឋាភិបាលកម្ពុជាចាត់វិធានការចំពោះសកម្មភាពអ្នកតំណាងរាស្រ្តសមរង្ស៊ីទាក់ទងនឹងបញ្ហាបោះបង្គោលតម្រុយព្រំដែនដែលបានបោះលើដីកសិករខ្មែរ ហើយបាននិយាយទៀតថា មិនត្រូវអនុញ្ញាតឲ្យករណីស្រដៀងគ្នានេះកើតឡើងជាថ្មីម្តងទៀតទេ»។
លោក ជាម យៀប ប្រធានគណៈកម្មការសេដ្ឋកិច្ចនិងហិរញ្ញវត្ថុនៃរដ្ឋសភា និងជាមន្រ្តីជាន់ខ្ពស់នៃគណបក្សប្រជាជនកម្ពុជា បានមានប្រសាសន៍ថា គណៈកម្មការនៃរដ្ឋសភាបានសម្រេចដកអភ័យឯកសិទ្ធិលោក សម រង្ស៊ី គឺយោងតាមសំណើរបស់តុលាការខែត្រស្វាយរៀង តាមរយៈរដ្ឋមន្រ្តីក្រសួងយុត្តិធម៌ក្រោយពីលោក សម រង្ស៊ី បានដកបង្គោលខណ្ឌសីមាខែត្រស្វាយរៀង កាលពីខែតុលា។
បណ្តាអង្គការសង្គមស៊ីវិលក៏ដូចជាប្រជាពលរដ្ឋបានលើកឡើងដូចគ្នាថា សភាបានបោះឆ្នោតលើក អភ័យឯកសិទ្ធិលោក សម រង្ស៊ី នេះ បានឆ្លុះបញ្ចំាងឲ្យឃើញអំពីតម្លៃនៃអភ័យឯកសិទ្ធិមានការធ្លាក់ចុះ ហើយនិងជាការបង្ហាញអំពីការគាបសង្កត់របស់គណបក្សកាន់អំណាចដែលមានសមាសភាពច្រើននៅក្នុងរដ្ឋសភាមកលើគណបក្សប្រឆាំងផងដែរ។
បណ្តាប្រជាពលរដ្ឋក្នុងរាជធានីភ្នំពេញ បានសម្តែងនូវការខកចិត្តចំពោះសភាដែលបានបោះឆ្នោតលើកអភ័យឯកសិទ្ធិលោក សម រង្ស៊ី ដូច្នេះ ៖ «ការដកនេះគឺវាអត់ត្រឹមត្រូវទេ ព្រោះគាត់ធ្វើដើម្បីខ្មែរមិនមែនបម្រើខួរក្បាលយួនឯណា។ ខ្ញុំឈឺចាប់ខ្លាំងណាស់។ ខ្ញុំប្រជាជន អ៊ីចឹខ្ញុំមានឆន្ទៈមកនេះដើម្បីគោលបំណងទាមទារមិនឲ្យរដ្ឋាភិបាលដកអភ័យឯកសិទ្ធិ សម រង្ស៊ី ចោលទេ»។
និស្សិតមួយរូបឈ្មោះ សារ៉ាវុធ បានមានប្រសាសន៍ថា លោកមានការសោកស្តាយចំពោះការដក អភ័យឯកសិទ្ធិលោក សម រង្ស៊ី ដោយលោកបញ្ជាក់ថា រដ្ឋាភិបាលក៏ដូចជាគណៈកម្មការសភាគួរតែចុះស៊ើបអង្កេតឲ្យច្បាស់លាស់ជាមុនសិន។
លោក សារ៉ាវុធ មានប្រសាសន៍ដូច្នេះ ៖ «ព្រោះធ្វើអីមួយយើងត្រូវសិក្សាឲ្យបានច្បាស់សិនកុំចេះតែដកចេះតែចោទអ៊ីចឹង ក្រែងលោគាត់ដកហ្នឹងប្រហែលជាគាត់ត្រូវអីដែរ អ៊ីចឹងទាល់តែសិក្សារឿងរ៉ាវហ្នឹងឲ្យបានយូរបន្តិច»។
ប្រជាពលរដ្ឋនៅខែត្រសៀមរាប ឈ្មោះ ស៊ីម សុភ័ណ ក៏បានលើកឡើងអំពីរដ្ឋាភិបាល ឬសភាគួរតែចុះពិនិត្យនៅព្រំដែនប៉ែកខាងកើតនោះ ឲ្យបានច្បាស់ផងដែរ ដោយគ្មានកងកម្លាំងការពារដូចព្រំដែនប៉ែកខាងលិចទេនោះ។
លោក ស៊ីម សុភ័ណ បានលើកឡើងដូច្នេះ ៖ «ខ្ញុំសំណូមពរដើម្បីឲ្យប្រទេសជាតិយើងកុំឲ្យមានបញ្ហានៅកន្លែងដែលលោក សម រង្ស៊ី ដកបង្គោលព្រំដែនហ្នឹង សូមឲ្យសភាជាតិយើងទាំងមូលនោះ ហើយប្រមុខរដ្ឋាភិបាលហ្នឹង សូមឲ្យលោកចុះទៅពិនិត្យជាក់ស្តែងមើល តើការបោះបង្គោលហ្នឹងចូលទៅលើដីស្រែរបស់គាត់ពិតប្រាកដមែនឬយ៉ាងណា?»។
លោក ជាម យៀប បានបញ្ជាក់អំពីបញ្ហានេះដូច្នេះ ៖ «វាមិនមែនជាភារកិច្ចរបស់រដ្ឋសភាអីទេ នៅកម្ពុជា រាជរដ្ឋាភិបាលអ្នកទទួលខុសនិងត្រូវចំពោះមុខច្បាប់ ចំពោះមុខច្បាប់មានន័យថា ចំពោះមុខរដ្ឋសភា ពីព្រោះរដ្ឋសភាអ្នកបង្កើតគាត់ឡើង ដល់អ៊ីចឹងទេគឺថា អ្វីៗគាត់ទទួលខុសត្រូវ។ សភាមានអ្នកបច្ចេកទេសឯណាទៅវាស់វែងឯណា»។
លោក កឹម សុខា ប្រធានគណបក្សសិទ្ធិមនុស្ស បានពន្យល់ថា តំណាងរាស្រ្តគ្រប់គណបក្សទាំងអស់ ជាតំណាងរបស់ប្រជាពលរដ្ឋដែលមានតួនាទីការពារផលប្រយោជន៍រួម និងផលប្រយោជន៍ប្រជាពលរដ្ឋ។
លោក កឹម សុខា ពន្យល់ដូច្នេះ ៖ «ខ្ញុំគិតថា គំរាមកំហែងផ្ទៃក្នុងដើម្បីឲ្យសកម្មភាពរបស់អ្នកស្នេហាជាតិហ្នឹងកុំឲ្យលើកពីរឿងបញ្ហាអីដែលរដ្ឋាភិបាលគាត់មិនចង់ឲ្យលើក ដើម្បីឲ្យប្រជាពលរដ្ឋដឹង ខ្លាចបាត់ប្រជាប្រិយភាពរបស់ខ្លួន»។
តាមប្រភពខាងលើបានឲ្យដឹងថា គេកត់សម្គាល់ឃើញថា នាពេលកន្លងមក តំណាងរាស្រ្តគណបក្សប្រឆាំងតែងតែត្រូវបានសភាជាតិដែលមានសមាសភាពមកពីគណបក្សកាន់អំណាចមានច្រើនរហូត ដល់២ភាគ៣នោះ គឺបានធ្វើការប្រជុំលើកអភ័យឯកសិទ្ធិតំណាងរាស្រ្តគណបក្សជំទាស់ជាហូរហែ នៅគ្រាដែលតំណាងរាស្រ្តទាំងនោះបានបញ្ចេញមតិប៉ះពាល់ទៅនឹងការដឹកនាំរបស់រដ្ឋាភិបាល ក៏ដូចជាអំពីការរំលោភឈ្លានព្រំដែនពីប្រទេសជិតខាង ពិសេសគឺប្រទេសប៉ែកខាងកើត។
មកទល់ពេលនេះលោក សម រង្ស៊ី កំពុងរស់នៅប្រទេសបារាំង ហើយគេនៅមិនទាន់ដឹងថា តើលោកនឹងវិលមកប្រទេសកម្ពុជាវិញនៅពេលណានៅឡើយទេ៕