មន្រ្តីអង្គការសង្គមស៊ីវិលមួយចំនួនក្នុងប្រទេសកម្ពុជា បានសម្តែងទស្សនៈស្របគ្នាថា រដ្ឋាភិបាលខ្មែរនិងអង្គការសហប្រជាតិត្រូវតែរកវិធីឯកភាពគ្នាឡើងវិញអំពីយន្តការប្រឆាំងអំពើពុករលួយក្នុងតុលាការខ្មែរក្រហមដើម្បីដំណើរការតុលាការនេះបានពេញលេញនិងប្រកបដោយការជឿទុកចិត្តពីជនរងគ្រោះ។
កាលពីថ្ងៃពុធ ទី៨ មេសានេះ មន្ត្រីអង្គការសហប្រជាជាតិបានមានប្រសាសន៍ថា ការចរចាទ្វេភាគីរវាងអង្គការសហប្រជាជាតិ (អ.ស.ប.) និងមន្ត្រីជាន់ខ្ពស់កម្ពុជាដើម្បីបង្កើតយន្តការដោះស្រាយករណីចោទថា មានអំពើពុករលួយនៅតុលាការខ្មែរក្រហម ហើយការចរចានោះបានបញ្ចប់ទៅដោយគ្មានកិច្ចព្រមព្រៀងណាមួយនោះដែរ។
មន្ត្រីជំនួយការផ្នែកកិច្ចការច្បាប់របស់លោកអគ្គលេខាធិការអង្គការសហប្រជាជាតិគឺលោក ពីធ័រ តាក់សូអ៊ី-ហ្សិនសិន (Peter Taksoe-Jensen) មានប្រសាសន៍នៅក្នុងសេចក្តីថ្លែការណ៍ថា ៖ «នៅទីបញ្ចប់ យើងមិនអាចឈានដល់ការព្រមព្រៀងគ្នាទេ»។ លោកបន្តថា ៖ «យើងហៀបតែនឹងឈានដល់មានការព្រមព្រៀងគ្នាទៅហើយ។ ហើយថា លោកបានទុកសំណើមួយនៅលើតុជូនលោកឧបនាយករដ្ឋមន្ត្រី សុខ អាន ហើយបានស្នើឲ្យលោកពិចារណាសំណើនោះផង»។
មន្ត្រីសហប្រជាជាតិរូបនេះបានបន្តថា ៖ «ចាប់ពីពេលនេះតទៅ យើងនឹងមិនបន្តការចរចារបស់យើងទៀតឡើយ»។
ទាក់ទងនឹងបញ្ហានេះ លោក ឆាំង យុ ប្រធានមជ្ឈមណ្ឌលឯកសារកម្ពុជាដែលធ្វើការងារផ្តោតជាសំខាន់ការសម្លាប់រង្គាលដោយរបបកុម្មុយនីស្តខ្មែរពីឆ្នាំ១៩៧៥ ដល់ឆ្នាំ១៩៧៩នោះ បានមានប្រសាសន៍ថា ទោះបីជាការខ្វែងគំនិតគ្នា នាពេលនេះអាចចាត់ទុកថាជារឿងតិចតួចក៏ដោយ ប៉ុន្តែដើម្បីយុត្តិធម៌សម្រាប់ប្រជារាស្រ្តខ្មែរភាគីកម្ពុជានិងអង្គការសហប្រជាជាតិត្រូវតែរកដំណោះស្រាយសម្រាប់ដំណើរការសាលាក្តី។
លោក ឆាំង យុ មានប្រសាសន៍យ៉ាងដូច្នេះថា ៖ «អនាគតរបស់តុលាការនេះខ្ញុំថាវាសំខាន់ដែរ ដោយសារតែបញ្ហាដែលបានលើកឡើងទាក់ទងនឹងបញ្ហាភាពមិនប្រក្រតីនៃការចំណាយថវិកា ក៏វាអាចពាក់ព័ន្ធនឹងការចេញសាលក្រមរបស់តុលាការនេះដែរ។ អ៊ីចឹងខ្ញុំយល់ឃើញថា បញ្ហានេះវាមិនគួរជាបញ្ហាធំដុំ ហើយបើសិនជាបញ្ហាដែលបានលើកឡើងវាមិនពិត គួរតែមានការពន្យល់ដើម្បីជម្រះមន្ទិលសង្ស័យ ហើយបើសិនជាបញ្ហានេះពិតជាមានមែន យើងត្រូវតែចាត់វិធានការ។ អ៊ីចឹងយើងធ្វើយ៉ាងណារកដំណោះស្រាយជាជាងការប្រជែង ហើយរកហេតុផលរៀងៗខ្លួន»។
លោក ឡុង បញ្ញាវុឌ្ឍ មន្រ្តីនៃអង្គការគម្រោងយុត្តិធម៌នៅកម្ពុជា បានមានប្រសាសន៍ថា តុលាការកាត់ទោសមេដឹកនាំខ្មែរក្រហមដែលមានការចូលរួមដោយអង្គការសហប្រជាជាតិនោះមិនអាចដំណើរការដោយគ្មានតម្លាភាពនោះទេ។
លោក ឡុង បញ្ញាវុឌ្ឍ ថ្លែងដូច្នេះថា ៖ «បើសិនជាតុលាការមួយដំណើរការទៅហើយ ហើយរាំងស្ទះ ឬមួយក៏គ្រប់ពេលក្នុងដំណាក់កាលនីតិវិធីខាងមេធាវីតែងតែលើកគ្រប់ពេលវេលានូវបញ្ហាពុករលួយ ដូច្នេះវាធ្វើឲ្យប៉ះពាល់យ៉ាងធ្ងន់ធ្ងរទៅដល់នីត្យានុកូលភាពរបស់សាលាក្ដី ហើយបើមិនដោះស្រាយរឿងអំពើពុករលួយទេ។ ទោះបីជាតុលាការនេះទទួលបានលុយក៏ដោយ ក៏មិនអាចឲ្យតុលាការនេះនឹងកិត្តិយសនៅក្នុងឆាកអន្តរជាតិបានឡើយ»។
រីឯលោកស្រី ពុង ឈីវកេក ប្រធានអង្គការសិទ្ធិមនុស្សឈ្មោះ លីកាដូ បានសម្តែងក្តីបារម្ភថា ការខុសឆ្គង ឬការបរាជ័យផ្នែកណាមួយនៃសាលាក្តីនេះ នឹងធ្វើឲ្យមានការខកចិត្តជាខ្លាំងសម្រាប់ប្រជារាស្រ្តខ្មែរដែលជាជនរងគ្រោះ។
លោកស្រី ពុង ឈីវកេក មានប្រសាសន៍ដូច្នេះថា ៖ «ខ្លាចក្រែងលោគាត់អស់លុយទៅ តុលាការហ្នឹងមិនបានតទៅទៀត បានន័យថា មិនបានកាត់ទោសអ្នកជាប់ចោទ ៤នាក់ទៀត កាត់ទោសបានតែ ឌុច មួយទៅ អត់បានអ្នក ៤នាក់ទៀត ធ្វើឲ្យប្រជាពលរដ្ឋខ្មែរយើងកាន់តែព្រួយបារម្ភរឿងហ្នឹងហើយ មុខជាតឹងទ្រូង ព្រោះឃើញថាអត់បានរកយុត្តិធម៌ជូនប្រជាពលរដ្ឋដែលបាត់បង់ជីវិត និងគ្រួសាររបស់ជនរងគ្រោះទាំងប៉ុន្មានជិត ២លាននាក់ហ្នឹង»។
លោក ហង្ស ឆ័យា នាយកប្រតិបត្តិនៃវិទ្យាស្ថានខ្មែរសម្រាប់ប្រជាធិបតេយ្យបានថ្លែងពីទស្សនៈរបស់លោកថា ភាគីទាំងអស់ត្រូវតែបង្ហាញពីសុឆន្ទៈដើម្បីឲ្យតុលាការខ្មែរក្រហមនេះដំណើរការដោយឯករាជ្យ ៖ «ការលូកដៃចូលនៅផ្នែកខាងនយោបាយអីៗ អាហ្នឹងយើងជឿថាយើងចៀសវាងមិនកើត ប៉ុន្តែយើងគួរស្នើសុំកុំឲ្យវាមានការប៉ះពាល់ខ្លាំងពេក ពីព្រោះវាបានដំណើរការទៅហើយ ហើយដំណើរការមួយចំនួនដែលយើងបានប្រព្រឹត្តមកដល់ឥឡូវនេះ វាមានវិបត្តិណាដែលគួរដោះស្រាយ។ ហើយត្រង់ជំហរខ្លះដូចថាយើងចង់បានឲ្យមានតម្លាភាពនិងឯករាជភាព»។
លោក សុក សំអឿន ប្រធានអង្គការក្រុមអ្នកច្បាប់ការពារសិទ្ធិកម្ពុជា បានមានប្រសាសន៍ថា រដ្ឋាភិបាលខ្មែរគួរតែមានសុច្ឆន្ទៈសម្រាប់កិត្តិយសប្រវត្តិសាស្ត្រក្នុងរឿងនេះដែរ ៖ «បើសិនជាមានរឿងហ្នឹងកើតឡើង គឺថាបើសិនជាយើងការពារអ្នកដែលខុស ឬក៏មិនព្រមរកបើកឲ្យមានតម្លាភាព ធ្វើឲ្យទាំងប្រជាពលរដ្ឋខ្មែរ និយាយរួមទាំងជាតិទាំងអន្តរជាតិគេមានការសង្ស័យ ហើយគេលែងមានការទុកចិត្តទៅលើប្រព័ន្ធ ជាពិសេសលែងទុកចិត្តលើរដ្ឋាភិបាលតែម្ដង»។
ទោះជាយ៉ាងណាក៏ដោយ លោក ផៃ ស៊ីផាន រដ្ឋលេខាធិការនិងជាអ្នកនាំពាក្យទីស្តីការគណៈរដ្ឋមន្រ្តីបានមានប្រសាសន៍ថា មិនមានជម្លោះធំដុំណាមួយរវាងកម្ពុជានិងអង្គការសហប្រជាជាតិរឿងសាលាក្តីខ្មែរក្រហមនោះទេ ហើយលោកសង្ឃឹមថា បញ្ហានេះអាចនឹងដោះស្រាយបាននៅពេលឆាប់។
លោក ផៃ ស៊ីផាន មានប្រសាសន៍ដូច្នេះថា ៖ «អង្គការសហប្រជាជាតិជាដៃគូប្រទេសកម្ពុជា ក្នុងការចាត់ចែងធ្វើឲ្យដំណើរការនៃតុលាការខ្មែរក្រហមហ្នឹងទទួលបានជោគជ័យដើម្បីផ្ដល់យុត្តិធម៌ដល់កម្ពុជាទាំងអស់គ្នា គឺគ្មាននរណាចៅហ្វាយនរណាទេ»។
នៅពេលនេះអង្គជំនុំជម្រះវិសាមញ្ញនៃតុលាការកម្ពុជា ដែលហៅជាភាសាសាមញ្ញថា តុលាការខ្មែរក្រហមនោះ បានកំពុងដំណើរការកាត់ក្តីមេគុកស-២១ ឬគុកទួលស្លែង ឈ្មោះ កាំង ហ្កេកអ៊ាវ ហៅ ឌុច ក្នុងចំណោមមេដឹកនាំខ្មែរក្រហម ៥នាក់ ដែលបានចោទប្រកាន់រួចហើយនោះ រួមមាន នួន ជា ជាប្រធានសភាខ្មែរក្រហម ខៀវ សំផន ប្រធានគណៈប្រធានរដ្ឋ អៀង សារី ជារដ្ឋមន្រ្តីក្រសួងការបរទេស និងប្រពន្ធរបស់គាត់ឈ្មោះ អៀង ធីរីទ្ធ ជារដ្ឋមន្រ្តីក្រសួងសង្គមកិច្ច។
កាលពីសប្តាហ៍មុន ក្រុមចៅក្រមនៃតុលាការខ្មែរក្រហម បានបដិសេធមិនបើកការស៊ើបអង្កេតតាមការព្យាយាមលើកឡើងរបស់មេធាវីការពារក្តីឲ្យអតីតមេដឹកនាំខ្មែរក្រហម លោក ខៀវ សំផន និងមេធាវីរបស់លោក អៀង សារី ស្តីពីការចោទថា មានអំពើពុករលួយដែលថា បុគ្គលិកខ្មែរបានត្រូវបង្ខំឲ្យសូកលុយដើម្បីបានការងារធ្វើក្នុងតុលាការជាយូរមកហើយនោះ៕