លោក សម រង្ស៊ី ប្រធានគណបក្សសមរង្ស៊ីនិងលោក កឹម សុខា ប្រធានគណបក្សសិទ្ធិមនុស្សដែលខណៈនេះឋិតនៅឯប្រទេសបារាំង បានថ្លែងបញ្ជាក់ពីជំហររបស់ខ្លួន បដិសេធលទ្ធផលការបោះឆ្នោតសាកលថ្ងៃ២៧កក្កដាកន្លងមកនេះ នាកិច្ចប្រជុំមួយដែលមានជនជាតិខ្មែរនៅក្នុងនិងជុំវិញក្រុងប៉ារីសចំនួនជាង ១០០នាក់ចូលរួម កាលពីថ្ងៃអាទិត្យ។
លោក សម រង្ស៊ី មានប្រសាសន៍ដូច្នេះ ៖ «គណបក្សសិទ្ធិមនុស្ស ហើយគណបក្សសមរង្ស៊ី ដែលមានតំណាងរាស្រ្ដជាប់ឆ្នោតថ្មីៗនេះ ២៩រូប គឺយើងបានសម្រេចមិនចូលរួមក្នុងកិច្ចប្រជុំលើកទី១ នៃរដ្ឋសភា ហើយមិនចូលរួមក្នុងពិធិសច្ចាប្រណិធានជាមួយនឹងគណបក្សប្រជាជន។ តំណាងរាស្រ្ដគណបក្សប្រជាជន ដែលជាប់ឆ្នោតនោះ យើងយល់ឃើញថា មួយចំនួនធំ គឺបានមកពីការលួចបន្លំសន្លឹកឆ្នោត ដូច្នេះយើងអត់ទៅចូលរួមស្បថជាមួយអ្នកទាំងអស់នោះទេ យើងនឹងចូលរួមក្នុងពិធីធ្វើសច្ចាប្រណិធានដោយឡែក»។
ក្រៅពីជួបអធិប្បាយពីស្ថានការណ៍ស្រុកខ្មែរជូនជនរួមជាតិនៅក្រុងប៉ារីសហើយ មេដឹកនាំគណបក្សប្រឆាំងទាំង២ ក៏មានគម្រោងផ្សព្វផ្សាយពីពហិការរបស់បក្សនិងពីភាពមិនត្រឹមត្រូវនៃការបោះឆ្នោតកន្លងមកនេះ នៅទីផ្សេងៗមួយចំនួនទៀត ៖ «យើងមានគម្រោង គឺយើងជួបថ្នាក់ដឹកនាំប្រទេសបារាំង ទាំងតំណាងខាងរដ្ឋាភិបាល ទាំងតំណាងខាងសភាប្រទេសបារាំង បន្ទាប់មកនឹងទៅទីក្រុងប្រ៊ូសែល គឺជាទីស្នាក់ការធំនៃសហភាពអឺរ៉ុប ដែលមានប្រទេស ២៧ប្រទេស ដែលជាសមាជិកនៃសហភាពអឺរ៉ុបនេះ។ យើងទៅសភាអឺរ៉ុបផង យើងទៅជួបគណៈកម្មការអឺរ៉ុប ដែលជាស្ថាប័នដឹកនាំសហភាពអឺរ៉ុបនេះ ហើយបើយើងអាចធ្វើទៅបាន អាស្រ័យទៅលើកម្មវិធីថ្នាក់ដឹកនាំប្រទេសមួយចំនួន ដូចជាប្រទេសអាល្លឺម៉ង់ អាចទៅទីក្រុងប៊ែរឡាំងទៀត។ ក៏ប៉ុន្តែលើកនេះ ប្រហែលជាពេលវេលាខ្លីពេក យើងទៅប្រទេសកម្ពុជាវិញ ឲ្យទាន់ថ្ងៃ១៥ ពីព្រោះពេលនោះ មានតំណាងជាន់ខ្ពស់នៃរដ្ឋាភិបាលសហរដ្ឋអាមេរិក គឺអនុរដ្ឋមន្រ្តីក្រសួងការបរទេសសហរដ្ឋអាមេរិក ... លោកនឹងទៅដល់ប្រទេសកម្ពុជាថ្ងៃទី១៥ ហើយយើងត្រូវទៅជួបគាត់ ថ្ងៃទី១៥ នៅទីក្រុងភ្នំពេញ។ ហើយបន្ទាប់ហ្នឹង យើងអាចនឹងទៅទីក្រុងវ៉ាស៊ីនតុន និងទៅទីក្រុងញូវយ៉ក ទៅជួបតំណាងអង្គការសហប្រជាជាតិ នៅទីក្រុងញូវយ៉ក»។
ឆ្លើយតបនឹងសំណួរថាតើមិនខ្លាចលោកនាយករដ្ឋមន្ត្រី ហ៊ុន សែន យកអាសនៈទាំង ២៩ របស់គណបក្សទាំង២ ទៅចែកចាយដល់បក្សដទៃទេឬនោះ លោក សម រង្ស៊ី ពន្យល់យ៉ាងដូច្នេះថា ៖ «មិនអាចទៅរួចទេ មិនអាចលួចប្លន់សន្លឹកឆ្នោតផង ហើយលួចប្លន់អាសនៈនៅរដ្ឋសភាថែមទៀត មិនអាចទៅរួចទេ បើថាគណបក្សប្រជាជនហ៊ានធ្វើដល់កម្រិតហ្នឹង គឺពេលនោះ នឹងមានការថ្កោលទោសពីសំណាក់សហគមន៍អន្តរជាតិទាំងមូល ហើយអត់មាននរណាទទួលស្គាល់ទេ សភាហ្នឹងមិនមែនជាសភាជាតិទេ គឺជាសភាបក្ស សភាគណបក្សប្រជាជន ដែលខ្ញុំ សម រង្ស៊ី ហៅថា សភាចោរ ព្រោះសភាហ្នឹង គឺតំណាងរាស្រ្ដភាគច្រើនលួចសន្លឹកឆ្នោត លួចឈ្មោះអ្នកដឹកនាំ ជាសភាចោរ ជាសភាខ្មោច ពីព្រោះឲ្យអ្នកដែលអត់មានសិទ្ធិបោះឆ្នោត យកឈ្មោះខ្មោចយកទៅបោះច្រើនណាស់ ហើយជាសភាយួន។ មានជនជាតិយួនបានបន្លំធ្វើជាខ្មែរ ទៅបោះឆ្នោតជាមួយខ្មែរ បោះឆ្នោតដោយខុសច្បាប់ ដូច្នេះ មិនមែនជាសភាជាតិទេ ជាសភាចោរ ជាសភាខ្មោច និងជាសភាយួន សភាបែបនេះ អត់មាននរណាទទួលស្គាល់ទេ»៕