នៅមុនចេញដំណើរបេសកកម្មទៅបស្ចឹមប្រទេសនៅថ្ងៃពុធនេះ លោកស្រី មូរ សុខហួរ មានប្រសាសន៍ថា លោកស្រីពុំអាចចូលរួមកិច្ចប្រជុំនេះបានទេ។
លោកស្រី មូរ សុខហួរ មានប្រសាសន៍ដូច្នេះថា ៖ «បើសិនជាគេរំលោភសិទ្ធិយើងប៉ុណ្ណឹងទៅហើយ តើគួរយើងបន្តចូលរួមទេ? ចំពោះខ្ញុំវិញ ខ្ញុំយល់ឃើញថា ឲ្យសន្តិសុខម្នាក់ដែលឆ្លើយមកខ្ញុំ ហើយបិទទ្វារក្ឌាំងៗ ហើយឆ្លើយមកវិញថា មិនស្គាល់លោកជំទាវ លោកជំទាវអត់ចូលបានទេ»។
សូមរំឭកថា អ្នកតំណាងរាស្ត្រ ឈាង វុន ដែលជាសហប្រធាននៃក្រុមរៀបចំសន្និសីទ IPU ប្រចាំតំបន់ តំណាងប្រទេសកម្ពុជា បានប្រាប់វិទ្យុអាស៊ីសេរីកាលពីម្សិលមិញអំពីបទបញ្ជារបស់លោកក្នុងការរក្សាសន្តិសុខនៃកិច្ចប្រជុំនោះ។
លោក ឈាង វុន មានប្រសាសន៍ថា ៖ «យើងបានបញ្ជាថា ដើម្បីសន្តិសុខរបស់អង្គសិក្ខាសាលា អ្នកដែលអាចចូលរួមបាន ទាល់តែមានច្បាប់ មានការចុះឈ្មោះ មានការបញ្ជាក់ថា ចូលរួមយើងមិនបានបញ្ជាថា មិនឲ្យលោកជំទាវ មូរ សុខហួរ ចូលរួមប្រជុំនោះទេ។ ហើយនៅក្នុងអង្គសិក្ខាសាលា ក្រោយពីបានដឹងហេតុការណ៍នេះកើតឡើង យើងបានប្រកាសនៅក្នុងអង្គសិក្ខាសាលាថា លោកជំទាវ មូរ សុខហួរ អាចចូលរួមក្នុងអង្គសិក្ខាសាលាគ្រប់ពេលវេលា ដែលលោកជំទាវអាចមកបាន»។
អ្នកតំណាងរាស្រ្តស្រ្តីខេត្តកំពត លោកស្រី មូរ សុខហួរ មានប្រសាសន៍ថា ប្រសាសន៍លោកសហប្រធានសន្និសីទ ឈាង វុន បានបង្ហាញអំពីការរំលោភកាន់តែច្បាស់ឡើងនៃក្រុមអ្នករៀបចំសន្និសីទទៅលើអ្នកតំណាងរាស្ត្រមកពីគណបក្សដែលមិនមែនជាគណបក្សប្រជាជនកម្ពុជា។
លោកស្រីមានប្រសាសន៍ថា លិខិតអញ្ជើញចូលរួមបានត្រូវបញ្ជូនចេញនៅថ្ងៃសុក្រចុងសប្តាហ៍នៅថ្ងៃទី៦ មីនា សម្រាប់កិច្ចប្រជុំថ្ងៃច័ន្ទ ទី៩ មីនា។
លោកស្រីបានសួរសំណួរផ្សេងៗដែលអ្នករៀបចំគួរពិនិត្យនិងឆ្លើយឲ្យបានត្រឹមត្រូវ ហើយការបញ្ជាផ្តាច់ការនោះបានរំលោភសិទ្ធិអ្នកតំណាងរាស្រ្ត។
លោកស្រី មូរ សុខហួរ មានប្រសាសន៍ដូច្នេះថា ៖ «តំណាងរាស្រ្ដប៉ុន្មានរូបដែលបានឆ្លើយទៅវិញថា ចូលរួម ឬមិនចូលរួមនោះ? ទី២ សូមមើលបញ្ជីឈ្មោះសាឡើងវិញ ខ្ញុំបានចុះឈ្មោះខ្ញុំច្បាស់ណាស់ ខ្ញុំចុះដោយដៃខ្លួនឯង។ ខ្ញុំទៅក្រោយគេ ដោយសារខ្ញុំឈឺភ្នែក ខ្ញុំសូមបញ្ជាក់ អ៊ីចឹងហើយបានខ្ញុំថា លោក ឈាង វុន មេត្តាសួរខ្ញុំសិន មុននឹងឡើងសំឡេងដាក់ទៅវិទ្យុឲ្យឮរាប់លាននាក់ មេត្តាសួរអ្នករងគ្រោះផង ហើយដែលខ្ញុំអត់មានសញ្ញាពាក់នេះ មិនមែនខុសពីខ្ញុំឯណា? សមាជិកដទៃគេមាន ហើយខ្ញុំគួរសួរទៅវិញថា ហេតុអីនៅពេលខ្ញុំចុះឈ្មោះហើយ អ្នករៀបចំបានប្រាប់មកខ្ញុំថា អស់ហើយសញ្ញាពាក់នឹងខ្លួននោះ អស់មានហើយ? ឆន្ទៈរបស់ខ្ញុំគឺមកចូលរួមសិក្ខាសាលាទទួលខុសត្រូវក្នុងនាមខ្ញុំជាអ្នកតំណាងរាស្រ្ដ ដោយសារការបញ្ជាផ្ដាច់ការហ្នឹងហើយ ដែលរំលោភសិទ្ធិខ្ញុំអ្នកតំណាងរាស្រ្ដ មិនឲ្យខ្ញុំបំពេញកាតព្វកិច្ចរបស់ខ្ញុំ តើលោក ឈាង វុន មានបានគិតទេរឿងអស់ហ្នឹង?»។
គួររំឭកផងដែរថា មកដល់ថ្ងៃពុធ ទី១១ មីនានេះ ដែលជាថ្ងៃទី៣ និងជាថ្ងៃប្រជុំបង្ហើយក្តី គេនៅពុំទាន់ឃើញមានសេចក្តីថ្លែងការណ៍ផ្លូវការណាមួយពីជំហររបស់សហភាពអន្តរសភា លើបញ្ហាទំនាស់ទាក់ទងនឹងការចោទប្រកាន់រំលោភសិទ្ធិរបស់អ្នកតំណាងរាស្រ្តខេត្តកំពតនេះឡើយ៕