នៅក្នុងលិខិតដែលមានចុះហត្ថលេខារបស់លោក យឹម សុវណ្ណ និងលោកស្រី មូរ សុខហួរ បានសរសេរថា «ដោយសារការរៀបចំថ្នាក់ដឹកនាំគណៈកម្មការជំនាញនានានៃរដ្ឋសភាកន្លងមក មិនបានពិភាក្សាជាមួយនឹងថ្នាក់ដឹកនាំនៃគណបក្សសមរង្ស៊ី យើងខ្ញុំយល់ឃើញថា គណបក្សមិនចាំបាច់បញ្ជូនឈ្មោះអ្នកតំណាងរាស្ត្ររបស់ខ្លួន ទៅធ្វើជាសមាជិកគណៈកម្មការជំនាញទាំងនោះឡើយ»។
លោកស្រី មូរ សុខហួរ បានមានប្រសាសន៍ពន្យល់បន្ថែមអំពីមូលហេតុនៃការផ្តាច់ខ្លួនមិនឲ្យសមាជិកគណបក្សប្រឆាំង ចូលក្នុងគណៈកម្មការសភាយ៉ាងនេះថា ៖ «គណបក្សសមរង្ស៊ី ជាមួយនឹងគណបក្សសិទ្ធិមនុស្សដែរ យើងឃើញថា រដ្ឋធម្មនុញ្ញនៃប្រទេសកម្ពុជាយើង បាននិយាយអំពីប្រទេសមួយដែលគ្រប់គ្រងដោយគោលការណ៍លទ្ធិប្រជាធិបតេយ្យ ហើយនិងពហុបក្ស។ រហូតដល់ពេលនេះ យើងឃើញថា ការបោះឆ្នោតជាកញ្ចប់ ការបោះឆ្នោតមានតាំងពីប្រធានរដ្ឋសភា អនុប្រធានរដ្ឋសភា ប្រធាននិងអនុប្រធានគណៈកម្មការនៅក្នុងសភាសុទ្ធតែមកពីគណបក្សប្រជាជន។ ហើយយើងយល់ឃើញថា បើសិនជាយើងគណបក្សសមរង្ស៊ីចូលមក... មិនឆ្លុះបញ្ចាំងនូវអ្វីដែលជាលទ្ធិប្រជាធិបតេយ្យ មិនឆ្លុះបញ្ចាំង ដែលនិយាយអំពីតុល្យភាពនិងការទទួលស្គាល់នៃសំឡេងនៃគណបក្សដែលបានសំឡេងដែលហៅថា គណបក្សប្រឆាំងទេ»។
ម៉ាយ៉ារិទ្ធិ ៖ តើបញ្ហាដែលមិនបញ្ចូលនេះ គណបក្សយល់ថា ជាការខាតដែរឬទេ នៅក្នុងការផ្ដល់យោបល់ណាមួយជូនទៅដល់រដ្ឋសភានោះ?
មូរ សុខហួរ ៖ «មិនមែនជាគណបក្សសមរង្ស៊ី ឬគណបក្សណាមួយដែលមិនបានទទួលតួនាទីនោះខាតទេ សភាទាំងមូលខាត ជាតិទាំងមូលខាត។ យើងចង់ជជែកគ្នាស្ថាបនាប្រទេសជាតិ តាមគោលការណ៍ប្រជាធិបតេយ្យ។ គោលការណ៍ប្រជាធិបតេយ្យសំខាន់ណាស់ ជាពិសេសនៅក្នុងរដ្ឋសភា ដែលត្រូវតែឆ្លុះបញ្ចាំងនូវសិទ្ធរបស់គណបក្ស យើងកុំហៅថា គណបក្សប្រឆាំង [យើងហៅថា] គណបក្សដែលមិននៅក្នុងរដ្ឋាភិបាល គណបក្សដែលមានសំឡេងភាគតិច ឆ្លុះបញ្ចាំងឆន្ទៈរបស់ប្រជាពលរដ្ឋ ដែលបានបោះឆ្នោតឲ្យគណបក្សសមរង្ស៊ី គណបក្សសិទ្ធិមនុស្ស គណបក្សណាដែលមិនចូលរួមជាមួយរដ្ឋាភិបាល គឺត្រូវតែមានតួនាទីសំខាន់ៗ នៅក្នុង ជាពិសេស គណៈកម្មការរដ្ឋសភាហ្នឹងឯង»។
ទោះយ៉ាងណាក្តី លោកស្រី មួរ សុខហួរ បានថ្លែងថា ទោះបីជាសមាជិកគណបក្សសមរង្ស៊ីមិនចូលរួមក្នុងគណៈកម្មការរដ្ឋសភា មិនមែនមានន័យថា សំឡេងតស៊ូមតិរបស់គណបក្សប្រឆាំងនឹងអស់សកម្មភាពនោះទេ ហើយលោកស្រីបញ្ជាក់ថា គណបក្សសមរង្ស៊ី នៅតែព្យាយាមការតស៊ូបញ្ចេញយោបល់នៅក្នុងកិច្ចប្រជុំសភានានាតទៅទៀត៕