លោក កឹម សុខា ប្រធានគណបក្សសិទ្ធិមនុស្សដែលជាគណបក្សមួយក្នុងចំណោមគណបក្សដៃគូជាមួយនឹងគណបក្សសមរង្ស៊ីដែលប្រឆាំងនឹងលទ្ធផលបោះឆ្នោត បានមានប្រសាសន៍ថាក្នុងស្ថានភាពជាក់ស្តែងការសុំជំនួយពីព្រះមហាក្សត្រគឺមិនសូវបានឃើញលទ្ធផលទេ ។
លោក កឹម សុខា បានមានប្រសាសន៍ថា ៖ «យើងមិនធ្វើទេ ពីព្រោះអាហ្នឹងកុំឲ្យថាលោកទើសទ័ល ។ ហើយក៏យើងដឹងហើយថា កន្លងមកទោះជាយើងសុំអីលោកច្រើនដង ច្រើនរឿងណាស់ហើយ ក៏លោកអត់មានលទ្ធភាពជួយអីយើងច្រើនទេ ពីព្រោះនៅតែលើរដ្ឋាភិបាលសម្រេចដដែល» ។
ឥឡូវនេះមានតែគណបក្សសិទ្ធិមនុស្សនិងគណបក្សសមរង្ស៊ីប៉ុណ្ណោះដែលនៅរក្សាជំហរប្រកាសពហិការរបស់ខ្លួនក្នុងកិច្ចប្រជុំស្បថទទួលតំណែងសភានាពេលខាងមុខ បើសិនជាមិនមានការដោះស្រាយបណ្តឹងបោះឆ្នោតឲ្យបានត្រឹមត្រូវនោះ ។
នាពេលនេះបណ្តឹងការបោះឆ្នោតរបស់គណបក្សប្រឆាំងទាំងនោះបានស្ថិតនៅក្នុងដៃក្រុមប្រឹក្សាធម្មនុញ្ញជាអ្នកសម្រេច ។
មេដឹកនាំគណបក្សសមរង្ស៊ីបានថ្លែងថា នៅពេលនេះគណបក្សសម្ព័ន្ធភាពតាំងពីមិនទាន់ពិចារណាអំពីការចូលរួមឬមិនចូលរួមក្នុងកិច្ចប្រជុំស្បថទទួលតំណែងសភានោះទេ គឺពួកគេកំពុងតែស្វះស្វែងដើម្បីឲ្យមានការដោះស្រាយបញ្ហាបណ្តឹងបោះឆ្នោត ។
លោក សម រង្ស៊ី ក៏បានឲ្យដឹងដែរថាគណបក្សប្រឆាំងកំពុងតែរង់ចាំការប្រទានរបស់ព្រះមហាក្សត្រដើម្បីចូលគាល់រាយការណ៍ថ្វាយលោកអំពីបញ្ហាក្នុងការបោះឆ្នោតកន្លងមកដែរ ។
លោក សម រង្ស៊ី បានឲ្យដឹងថា ៖ «សរសេរលិខិតមួយទៅថ្វាយព្រះមហាក្សត្រដើម្បីសុំគាល់ព្រះអង្គ មិនទាន់បានទទួលចម្លើយពីព្រះបរមរាជវាំងទេ ប៉ុន្តែយើងនឹងទួលថ្វាយព្រះអង្គផ្ទាល់ពេលណាដែលយើងមានឱកាសនិងមានកិត្តិយសទៅគាល់ព្រះអង្គ» ។
ទាក់ទងទៅនឹងបញ្ហានេះ ព្រះអង្គម្ចាស់ ស៊ីសុវត្ថិ ធម្មិកោ មន្រ្តីខុទ្ទកាល័យព្រះបរមរាជវាំងបានមានបន្ទូលថា សំណើរបស់គណបក្សប្រឆាំងនោះអាចនឹងទទួលបានក្នុងពេលណាមួយដ៏សមស្រប ។
ព្រះអង្គម្ចាស់ ស៊ីសុវត្ថិ ធម្មិកោ បានមានបន្ទូលថា ៖ «តាំងពីស្ដេចយាងមកពីប៉េកាំងមកវិញ គឺថាលោកមានកម្មវិធីញឹកញាប់ ដូច្នេះគ្រាន់តែយូរហើយនិងឆាប់ទេ លោកគង់តែប្រទានឲ្យគាល់ទេ» ។
គួរបញ្ជាក់ថាតាមលទ្ធផលដែលគណៈកម្មាធិការជាតិរៀបចំការបោះឆ្នោតបានប្រកាសជាផ្លូវការបណ្តោះអាសន្នរួចទៅហើយនោះ គណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន បានទទួល៩០អាសនៈក្នុងចំណោម១២៣ គណបក្សសមរង្ស៊ីបានទទួល២៦អាសនៈ គណបក្សសិទ្ធិមនុស្សបានទទួល៣អាសនៈ គណបក្សហ៊្វុនស៊ិនប៉ិច និងគណបក្ស នរោត្តម រណឫទ្ធិ បានទទួល២អាសនៈក្នុងគណបក្សនីមួយៗ ។
កាលពីដើមខែសីហានេះលោកនាយករដ្ឋមន្ត្រី ហ៊ុន សែន ធ្លាប់បានព្រមានមេដឹកនាំគណបក្សសមរង្ស៊ី ថាមិនអាចរារាំងកិច្ចប្រជុំដើម្បីបង្កើតសភាថ្មីដោយធ្វើពហិការនោះទេ ហើយថាបើមានពហិការមែននោះនឹងធ្វើឲ្យអស់សុពលភាពតំណាងរាស្ត្ររបស់ខ្លួន ៕