ប្រធានគណៈកម្មការព្រំដែនកម្ពុជា លោក វ៉ា គឹមហុង នៅថ្ងៃអង្គារ ទី១៤ មិថុនា បានស្នើសុំឲ្យតំណាងរាស្ត្រគណបក្ស សម រង្ស៊ី និងគណបក្សសិទ្ធិមនុស្ស ចូលរួមធ្វើការពិភាក្សាលើសេចក្ដីព្រាងច្បាប់ស្ដីពីការកំណត់ចំណុចប្រសព្វនៃខ្សែបន្ទាត់ព្រំដែនកម្ពុជា វៀតណាម និងឡាវ។
ការស្នើសុំនេះធ្វើឡើងពីរថ្ងៃមុនរដ្ឋសភាជាតិនឹងកោះប្រជុំដើម្បីអនុម័តលើសេចក្ដីព្រាងច្បាប់កំណត់ចំណុចប្រសព្វខ្សែព្រំដែននៅថ្ងៃទី១៦ មិថុនា។
គណបក្សសិទ្ធិមនុស្ស បានប្រកាសធ្វើពហិការកិច្ចប្រជុំរដ្ឋសភានេះ ចំណែកគណបក្ស សម រង្ស៊ី ក៏បានប្រកាសមិនគាំទ្រសេចក្ដីព្រាងច្បាប់ ប៉ុន្តែនឹងចូលរួមកិច្ចប្រជុំ។
លោក វ៉ា គឹមហុង មានប្រសាសន៍ថា ការកំណត់ចំណុចប្រសព្វព្រំដែនកម្ពុជា វៀតណាម និងឡាវ ជាបញ្ហាសំខាន់ ហើយសេចក្ដីព្រាងច្បាប់នេះនឹងមិនធ្វើឲ្យកម្ពុជា បាត់បង់ទឹកដីឡើយ ៖ «ល្អ បើគាត់ចង់ចូលរួមប្រយោជន៍ការពារប្រយោជន៍ជាតិ គាត់គួរចូលរួម។ បើគាត់ទិតៀន គាត់ថាឲ្យ ឬផ្ដាំផ្ញើណែនាំអី ល្អជាជាងធ្វើពហិការមិនចូលរួម នេះល្អជាង ព្រោះធ្វើអ៊ីចឹងអត់បានការ ព្រោះចង់មិនចង់រដ្ឋាភិបាលលោកឲ្យសុំឲ្យសច្ចាប័នពីរដ្ឋសភាហើយ»។
ប្រធានគណបក្សសិទ្ធិមនុស្ស លោក កឹម សុខា មានប្រសាសន៍ថា តំណាងរាស្ត្រគណបក្សសិទ្ធិមនុស្សចំនួន ៣រូប នឹងធ្វើពហិការកិច្ចប្រជុំរដ្ឋសភាដោយសារ កន្លងមានបណ្ដឹងពីសំណាក់ប្រជាពលរដ្ឋរស់នៅតាមព្រំដែន ដោយអះអាងថា មានការបាត់ដីស្រែដោយការបោះបង្គោលព្រំដែនរវាងប្រទេសទាំងបី។
លោក កឹម សុខ បន្តថា ដោយសារតែបច្ចុប្បន្ននេះប្រទេសទាំងបីកំពុងមានបញ្ហាព្រំដែននោះ រដ្ឋាភិបាលត្រូវតែបង្កើតគណៈកម្មាធិការពិសេសមួយដោយមានការចូលរួមពីគណបក្សមានអាសនៈក្នុងរដ្ឋសភា ហើយសេចក្ដីព្រាងច្បាប់ពាក់ព័ន្ធនឹងព្រំដែន ត្រូវតែមានការឯកភាពជាតិជាមុនសិនមុននឹងធ្វើការជជែកពិភាក្សាក្នុងរដ្ឋសភាជាតិ។
លោក កឹម សុខា ៖ «ខ្ញុំគិតថា រដ្ឋាភិបាលយើងមិនគួរណាប្រញាប់ប្រញាល់ធ្វើអ្វីដែលគ្មានឯកភាពជាតិទេ ព្រោះបញ្ហាព្រំដែនជាបញ្ហាឯកភាពជាតិ»។
មន្ត្រីតាមដានសភាពការណ៍ព្រំដែនបានឲ្យដឹងថា បច្ចុប្បន្ននេះបញ្ហាព្រំដែនត្រូវបានគណបក្សនយោបាយប្រើប្រាស់ដើម្បីប្រជាប្រិយភាពនយោបាយ និងការគាំទ្រពីអ្នកបោះឆ្នោត។ គណបក្សប្រជាជនកម្ពុជា ត្រូវបានគេមើលឃើញថា កំពុងមានប្រជាប្រិយភាពដោយសារតែបញ្ហាព្រំដែននៅតំបន់ក្បែរប្រាសាទព្រះវិហារ ចំណែកឯគណបក្សប្រឆាំងបានស្វែងរកប្រជាប្រិយភាពខ្លួនពាក់ព័ន្ធនឹងបញ្ហាព្រំដែនជាមួយប្រទេសវៀតណាម។
អ្នកនាំពាក្យគណបក្ស សម រង្ស៊ី លោក យឹម សុវណ្ណ នៅថ្ងៃអង្គារ មានប្រសាសន៍ថា តំណាងរាស្ត្រគណបក្ស សម រង្ស៊ី នឹងចូលរួមកិច្ចប្រជុំ ប៉ុន្តែនឹងមិនគាំទ្រសេចក្ដីព្រាងច្បាប់នេះទេ ពីព្រោះសេចក្ដីព្រាងច្បាប់នេះយោងទៅតាមសន្ធិសញ្ញាបន្ថែមឆ្នាំ១៩៨៥ ដែលគណបក្សប្រឆាំងយល់ឃើញថា នឹងធ្វើឲ្យកម្ពុជា បាត់បង់ដី។
លោក យឹម សុវណ្ណ បន្ថែម ៖ «មុននឹងធ្វើអ្វីមួយយើងត្រូវឲ្យមានការចូលរួមពីតំណាងអង្គការក្រៅរដ្ឋាភិបាលឯករាជ្យឲ្យមានការចូលរួមពីតំណាងរាស្ត្រ ពីព្រោះយើងមិនអាចអង្គុយក្នុងបន្ទប់ម៉ាស៊ីនត្រជាក់ ចេះតែអនុម័តដោយមិនឃើញពីទិដ្ឋភាពជាក់ស្ដែងនោះទេ»។
រដ្ឋាភិបាលកម្ពុជា ហាក់បីដូចជាគ្មានការលើកលែងចំពោះការរិះគន់ពីការបាត់បង់ទឹកដីឲ្យប្រទេសវៀតណាមនោះទេ។
ប្រធានគណបក្ស សម រង្ស៊ី លោក សម រង្ស៊ី ត្រូវបានតុលាការកាត់ឲ្យជាប់គុក ១២ឆ្នាំ ដោយសារការរិះគន់រដ្ឋាភិបាលទាក់ទងនឹងបញ្ហាព្រំដែនវៀតណាម។ លោក វ៉ា គឹមហុង បានឲ្យដឹងថា លោកនឹងចូលរួមការពារសេចក្ដីព្រាងច្បាប់នៅក្នុងរដ្ឋសភាជាតិនៅថ្ងៃទី១៦ មិថុនា ខាងមុខនេះ៕